Daniyeli 4
Ciloto cabili ca Nebukadineza
1 Mwami Nebukadineza, ulajuzya bantu bamisyobo yoonse, zisi zyoonse bantu bamilaka yoonse aabo bakkala munyika yoonse mbwiizulwa. Ulati,
“Amuzwidilile kapati!”
2 Ndiboteledwe kapati kuti ndimwaambile zyamaleele
azigambya eezyo Leza Sijulu wakujulu nzyaakandicitila.
3 Zitondezyo zyakwe nzipati kapati, zigambya zyakwe nzyanguzu!
Bwami bwakwe tabumani, kweendelezya kwakwe nkwamazyalani oonse.
4 Mebo nde Nebukadineza, ndakalikkede muŋanda yabwami bwangu, nkandiliibide akulikwaya. 5 Ndakalota ciloto eeco cakandiyoosya. Nindakalede abulo, zikozyanyo azilengaano eezyo nzindakali kutelaika mumoyo zyakandiyoosya. 6 Eelyo ndakalailila kuti bantu basongo boonse bamu Babuloni baletwe kulindime kuti bazoondipandulwide ciloto. 7 Lino basimabibo, basikulota, baŋanga abasondi nibakasika, ndakabaambila ciloto eeco, pele tiibakakonzya kundipandulwida ncico pe. 8 Kumamanino, Daniyeli wakaboola kulindime, kumane ndakamwaambila ciloto eeco. Daniyeli nguuitwa kuti Belitesyaza, ndakamuulika zina lyaleza wangu akaambo kamuuya wabaleza basalala uuli mulinguwe.
9 Ndakati, “Belitesyaza, omupati wabasimabibo, ndizi kuti muuya wabaleza uli mulinduwe, nkaako taakwe maseseke aakonzya kukuyumina pe. Mboobu mbocibede ciloto cangu, kondipandulwida. 10 Nzeezi zilengaano nzindakabona ciindi nindakalede. Ndakalanga, lino ndakabona musamu wakali akati kanyika. Wakali mulamfu kapati. 11 Musamu ooyo wakakomena akuba aanguzu mpela yawo yakali kuguma kujulu, wakali kuboneka kuzwa kumagolelo aanyika oonse. 12 Matu aawo akali kweebeka, wakalizyede micelo minji, wakalijisi micelo yakuti bantu boonse kabalya. Banyama bamusokwe bakali kulala munsi lyawo, bayuni bakali kukkala mumitabi kuzwa mulinguwo zilenge zyoonse muzyakali kujana zyakulya.”
13 Muzilengaano eezi nzindakabona kandilede, ndakalanga, eelyo ndakabona mutumwa uusalala kaboola ansi kuzwa kujulu. 14 Wakaita kuzwa kujulu cakupozomoka wakati, “Amugonke musamu ooyu, mukwezaule mitabi yawo, mukunkumune matu aawo, musowaile micelo yawo. Banyama munsi lyawo batije abalo bayuni bakkala mumitabi yawo bazwe. 15 Pele cisiko cawo amucileke antoomwe amiyanda yaco, cisiko eeco caangidwe zibulo amukuba cisyaale munyika mubwizu musokwe.”
Amumuleke atete mume uuloka kuzwa kujulu, amumuleke akkale abanyama akati kazisyango zyamunyika. 16 Amumuleke moyo wakwe usanduke kuzwa kubuntu, mumuleke abe amoyo uuli mbuli wamunyama, mane kusikila myaka iili ciloba imane.
17 Muzeezo ooyu waambilizigwa abatumwa, basalali baambilizya zyamakani aaya, kutegwa baumi bazibe kuti Mutalabala nguuendelezya malelo oonse aabantu alimwi ulaapa kumuntu kufumbwa ooyo ngwayanda, ulabapa kuti beendelezegwe abantu balibombya. 18 Mbombuboobu mbocibede ciloto ncindakalota mebo ndemwami Nebukadineza. Lino yebo O Belitesyaza, pandulula ciloto eeci, nkaambo basongo boonse bamubwami bwangu bakacilwa kundipandulwida ncocaamba, pele yebo ulakonzya, nkaambo muuya wabaleza basalala uli mulinduwe.
Daniyeli mbwaakapandulula ciloto
19 Mpawo Daniyeli ngonguwe uutegwa Belitesyaza wakakatazigwa kwaciindi cili mbocibede, wakayoowa. Aboobo mwami wakati, “Belitesyaza, ciloto eeci nobuba bupanduluzi bwaco butakuyoosyi pe.”
Belitesyaza wakaingula kuti, “O simalelo wangu, nicabota kuti naa ciloto eeci nicali kujatikizya basinkondonyoko kacaamba baabo bakulwana! 20 Musamu ooyo ngookabona, wakakomena akuba aanguzu, mpela yawo kaisikide kujulu cakuti wakali kubonwa munyika yoonse. 21 Wakajisi matu mabotu amicelo minji cakuti zilenge zyoonse nkuzyakali kujana zyakulya, banyama bamusokwe nkobakali kulyookezezya. Bayuni bamuluuwo bakali kuyaka ziteente zyabo mumitabi yawo. 22 Yebo omwami, ndonduwe musamu ooyo! Wakakomena akuba aanguzu, bupati bwako bwakakomena mane bwakaakusika kujulu, bweendelezi bulasika amumasi aali kulaale munyika.
23 “Yebo, omwami, wakabona mutumwa uusalala kaboola kuzwa kujulu kati, ‘Boola uzoogonke musamu, pele musiye cisiko cawo caangidwe alubulo amukuba, mubwizu, pele miyanda yaco ili munyika. Atete amume wakujulu, amumuleke abe munyama wamusokwe, mane kusikila myaka iili ciloba imane.’
24 “Lino mboobu bupanduluzi omwami, alimwi ngaaya malailile Mutalabala ngaakaamba azyasimalelo wangu, 25 wakati yebo uyoogwisigwa akati kabantu, uyookkala abanyama bamusokwe, uyoocela bwizu mbuli ŋombe alimwi uyooteta mume wakujulu. Myaka iili ciloba yaakumana ndendilyo noyooziba kuti Mutalabala nguuendelezya malelo aabantu oonse, alimwi ulaapa kumuntu kufumbwa ngwaayanda. 26 Malailile aakuti cisiko cisyaale amiyanda yaco caamba kuti bwami bwako buyoopilusigwa kulinduwe waakuziba Leza wakujulu kuti nguulela. 27 Nkaako omwami, cita mbwetikulailile. Lyaambe zinyonyoono zyako kuti ucite ziluleme uleke bubi bwako, weelede kubafwida luzyalo aabo badyaminidwe. Ambweni inga unoocizwidilide mubuvubi bwako.
28 “Zyoonse eezi zyakacitika kumwami Nebukadineza. 29 Nikwakainda myezi iili kkumi aibili ciindi mwami naakali kweendeenda aciluli caŋanda yabwami mu Babuloni 30 wakati, ‘Sena tauli munzi ooyu mupati wa Babuloni ngundakayaka kuti ube wabwami munguzu amubulemu bwangu?’”
31 Lino kacaambaula kwakamvwigwa ijwi lyakazwa kujulu, lyakati, “Ngaaya malailile aakugeme omwami Nebukadineza. Wanyangwa nguzu zyako zyabwami. 32 Uyoogwisigwa akati kubantu, uyookkala abanyama bamusokwe, uyoocela bwizu mbuli ŋombe. Kwamyaka iili ciloba, ndendilyo noyooziba kuti Mutalabala nguuendelezya malelo aabantu oonse, alimwi ulaapa kufumbwa ngwaayanda.”
33 Mpoonya-mpoonya eezyo zyakaambwa akaambo ka Nebukadineza zyakacitika. Wakagwisigwa akati kabantu watalika kucela bwizu mbuli ŋombe. Mubili wakwe wakateta amume wakujulu mane aalo masusu aakwe akalampa mbuli mapepe aasikwaze, mala akaba mbuli mala amuyuni.
34 Lino ciindi eeco nicakamana, mebo nde Nebukadineza, ndakalungumana kujulu, eelyo maanu aangu akaboola. Mpawo ndakatembaula Mutalabala, ndakamulumbaizya akumulemeka ooyo Uuliwo lyoonse.
Bweendelezi bwakwe mbweendelezi butamani, bwami bwakwe mbwamazyalani oonse.
35 Bantu boonse bamunyika mbabuyo. Walo ulacita mbuli mbwayanda mwini
munguzu zyakwe, akubantu boonse baansi.
Taakwe muntu uukonzya kumukasya kucita ncayanda
nokuba kumubuzya kuti, “Ncinzi ncocita?”
36 Lino ciindi eeco nciconya maanu naakandiboolela, bulemu abupati bwabwami bwangu bwakandiboolela. Balailili bangu abalemenede mubwami bwangu bakandilangaula, bakandipilusya acuuno cabwami, eelyo ndakasumpuka kwiinda mbundakabede kusaanguna. 37 Lino mebo nde Nebukadineza, ndatembaula, ndalumbaizya akupa bulemu ku Mwami wakujulu, nkaambo zintu zyoonse nzyacita zililuleme, nzila zyakwe zyoonse zililuzi. Aabo beenda cakulisumpula ulababombya.