Daniyeli 5

Pobwe lya Belisyaza

¹ Mwami Belisyaza wakapanga pobwe lyabantu bakwe balemenede bali cuulu, wakanywa waini kumbele lyabo. ² Lino Belisyaza naakacili kunywa waini wakwe, wakalailila kuti kuletwe nkomeki zyangolida ansiliva eezyo Nebukadineza wisi nzyaakagwisya muŋanda ya Leza ku Jelusalemu, kutegwa mwami abalemenede bakwe, bakaintu bakwe abamwanakasuwa bakwe banywide mulinzizyo. ³ Nkaako bakaleta nkomeki zyangolida eezyo zyakazwida muŋanda ya Leza ku Jelusalemu, nkabela mwami abantu bakwe balemenede, bakaintu bakwe, abamwanakasuwa bakwe bakanywida mulinzizyo. ⁴ Lino nibakali kunywa waini, bakatembaula baleza bangolida, bansiliva, bamukuba, balubulo, bazisamu abamabwe.

⁵ Mpoonya-mpoonya kwakaboneka munwe wajanza lyamuntu uulemba abwaanda, kumbali acikkazikilo calambe muŋanda yabwami. Mwami wakalangilizya janza eelyo kalilemba. ⁶ Wakasyulungana, wakayoowa kapati cakuti mazwi akali kundekema aalo maulu aakwe akalebuka.

⁷ Mwami wakaita basikulota, baŋanga, abasondi, eelyo wakaambila bantu basongo bamu Babuloni aaba kuti, “Kufumbwa uutibale malembo aaya akundaambila ncaaamba ulasamikwa masani aacisombo, alimwi ulasamikwa kawenge kangolida munsingo, ulacitwa kuti asumpulwe abe watatu mubwami boonse.”

⁸ Mpoonya bantu basongo boonse bamwami bakaitwa, pele tiibakakonzya kubala malembo nokuba kukonzya kwaambila mwami ncaaamba. ⁹ Nkaako mwami Belisyaza wakayoowesya, eelyo wakasyulungana kwiindilila. Balemenede bakwe bakagambwa.

¹⁰ Lino mwami mukaintu naakamvwa majwi aamwami aabalemenede bakwe, wakanjila muŋanda yapobwe. Wakati, “Omwami oongole! Utayoowi pe! Utausani boobu! ¹¹ Mubwami bwako kuli mwaalumi uujisi muuya wabaleza basalala mulinguwe. Uso kacili muumi mwaalumi ooyu wakajanika kuti ulijisi maanu aakumvwisya abusongo mbubonya mbuli bwabaleza. Mwami Nebukadineza uso, iiyi, ndati uso omwami, wakamucita kuti abe mupati wabasimabibo, basikulota, baŋanga, abasondi. ¹² Mwaalumi ooyo ngu Daniyeli mwami ngwakali kwiita kuti Belitesyaza, wakajanika kuti wakalicenjede, muntu waluzibo uumvwisya zintu, alimwi wakali kukonzya kupandulula ziloto, kulabulula tulabi akukonzya akusalazya makani aakatazya kapati. Mwiite Daniyeli, nkabela uzookwaambila ncaaamba malembo aaya.”

¹³ Aawo Daniyeli wakaletwa kumbele lyamwami, wakati kulinguwe, “Sena ndonduwe Daniyeli, umwi wabaange aabo mwami taata mbaakaleta kuzwa kucisi ca Juda? ¹⁴ Ndamvwa kuti ulijisi muuya wabaleza basalala akuti ulamvwisya zintu ulaamaanu, ulaabusongo bugambya. ¹⁵ Bantu basongo basikulota bakaletwa kulindime kuti babale malembo aaya, bandaambile ncaaamba, pele tiibakonzya kundipandulwida. ¹⁶ Lino ndamvwa kuti yebo ulakonzya kupandulula alimwi akusalazya makani aakatazya kapati. Kuti naa ukonzye kubala malembo aaya akundaambila ncaaamba, ulasamikwa masani aacisombo akusamikwa kawenge kangolida munsingo, alimwi ulasumpulwa akuba watatu mubwami boonse.”

¹⁷ Daniyeli wakaingula kuti, “Pe, kobambide buyo zipego zyako, alimwi bulumbu oobo ubupe kumuntu uumbi kutali ndime. Nikuba boobo ndakubalila malembo akukwaambila ncaaamba.

¹⁸ “Omwami, Leza Sijulu wamajulu wakapa Nebukadineza uso bwami bupati, nguzu abulemu. ¹⁹ Lino akaambo kakusumpuka nkwaakamusumpula, bantu boonse, misyobo yoonse amilaka yoonse yakakankama akumuyoowa. Aabo mwami mbaakayanda kuti bajaigwe, wakabajaya, aabo mbaakayanda kuti abaleke, wakabaleka, aabo mbaakayanda kusumpula, wakabasumpula, aabo mbaakayanda kubombya, wakababombya. ²⁰ Pele moyo wakwe niwakaba walutuzi akuba sicinguni mukulisumpula wakaatulwa acuuno cakwe cabwami akunyangwa bulemu bwakwe. ²¹ Wakagwisigwa akati kabantu, wakapegwa moyo wamunyama, wakatalika kukkala abacibize kacela bwizu mbuli ŋombe, mubili wakwe wakateta amume wakujulu mane kusikila naakaziba kuti Leza Sijulu wamajulu nguulela malelo aabantu oonse, alimwi ulaapa kumuntu kufumbwa ngwayanda.

²² “Pele yebo omwanaakwe, Belisyaza, toolibombya pe, nikuba kuti wakalaazi makani aaya oonse. ²³ Walicita kuti ulwane Mwami wakujulu. Wakacita kuti uletelwe nkomeki zyakazwa muŋanda ya Leza, eelyo yebo abalemenede bako, bakaintu bako abamwanakasuwa bako mwakanywida mulinzizyo. Wakatembaula baleza bansiliva, bangolida, bamukuba, balubulo, bazisamu abamabwe, batakonzyi kubona, kumvwa nokuba kuteelela. Pele tookapa bulemu kuli Leza ooyo uujisi buumi bwako mujanza lyakwe anzila zyako zyoonse. ²⁴ Nkaako nguwakatuma janza lyakazoolemba malembo aayo.

²⁵ “Lino ngaaya malembo aakalembedwe, MENE, MENE, TEKELI, PASINI.

²⁶ “Mboobu bupanduluzi bwamajwi aaya, Mene caamba kuti Leza wabala mazuba aakulela kwako, uyanda kuti aamane.

²⁷ “Tekeli caamba kuti wapimwa azipimyo, uli muuba.

²⁸ “Pelesi caamba kuti bwami bwako bwaandaanyizigwa, bwapegwa Bamedi a Bapesiya.”

²⁹ Mpawo Belisyaza wakalailila kuti Daniyeli asamikwe masani aacisombo, wakasamikwa akawenge kangolida munsingo, kumane wakaambilizigwa kuti waba ngowatatu mubwami.

³⁰ Masiku aayo ngoonya Belisyaza mwami wa Bakalodiya wakajaigwa, ³¹ Daliyasi Mumedi wakatola bwami oobo, kali aamyaka iili makumi aali cisambomwe aibili.