Ciyubunuzyo 20
Zyamyaka iili cuulu
1 Lino ndakabona mungelo kaseluka kuzwa kujulu. Mujanza wakajisi kkii wamulindi uutagoli anketani mpati. 2 Nkabela wakajata tosi, nzoka yakaindi iilya, nguwe Siluuni, Saatani, akumwaanga kwamyaka iili cuulu. 3 Mungelo wakamufusila mumulindi uutagoli, wakamujalila akumusinkila kuti atacengi limbi bantu mane kusikila myaka iili cuulu ikamane. Musule lyakooku uyooangununwa kwakaindi kaniini.
4 Mpawo ndakabona zyuuno zyabwami mpobakkede aabo bakapegwa nguzu zyakubeteka. Alimwi ndakabona myuuya yabaabo bakakosolwa mitwe akaambo kakupa bumboni bwa Jesu abwa Majwi aa Leza. Balo tiibakakomba munyama amutuni wakwe, alimwi tiibakatambula cisimbo cakwe ankumo zyabo nimuba mumaanza aabo. Bantu aaba bakaba baumi, bakalela antoomwe a Kilisito kwamyaka iili cuulu. 5 Bunji bwabafu bakasyaala, tiibakabuka mane kusikila myaka iili cuulu niyakamana. Ooku nkokubuka kwakusaanguna. 6 Ulilelekedwe alimwi ulasalala ooyo uuyoobuka mububuke butaanzi. Kuli baaba lufu lwabili talukwe nguzu, pele bayooba bapaizi ba Leza aba Kilisito, nkabela bayoolela anguwe kwamyaka iili cuulu.
Saatani mbwaakazundwa
7 Lino myaka iili cuulu yaakumana, Saatani uyooangununwa kuzwa muntolongo, 8 uyooinka kuyoocenga masi oonse aali muzyooko zyone zyanyika, nkokuti Gogi a Magogi. Saatani uyoobabunganya antoomwe kuti acite nkondo, banooli banji-banji cakuti bayooboneka mbuli musenga wankomwe yalwizi. 9 Bakeenda munyika yoonse akuzinguluka cilawo cabasalali amunzi uuyandika. Pele mulilo wakaloka kuzwa kujulu, wabasyukuta boonse. 10 Eelyo Siluuni wakabacenga wakafusilwa mubbibi lyamulilo wamabwe aasalufa, oomo munyama amusinsimi mubeji mobakabede. Nkabela bayoopenga sikati amasiku mane kukabe kutamani.
Zyalubeta lwamamanino
11 Lino ndakabona cuuno cituba cipati cabwami, ayooyo uukkede ali ncico. Nyika ajulu zyakamutija, nkabela tiizyakabonwa limbi pe. 12 Mpoonya ndakabona bafu, bapati abaniini, kabaimvwi kumbele lyacuuno eeco, eelyo mabbuku akavununwa. Alimwi kwakali alimbi bbuku lyakavununwa, eeli lyakali bbuku lyabuumi. Bafu bakabetekwa mbubonya mbuli mbukwakalembedwe mumabbuku, kweendelana amilimo yabo. 13 Lwizi lwakagwisya bafu bali muli ndulo. Lufu acikkalilo cabafu zyakagwisya bafu bakali muli nzizyo, nkabela boonse bakabetekwa kweendelana amilimo yabo njibakacita. 14 Mpoonya aawo lufu acikkalilo cabafu zyakafusilwa mubbibi lyamulilo. (Bbibi lyamulilo eeli ndolufu lwabili.) 15 Nkabela kufumbwa ooyo watakajanwa zina mubbuku lyabuumi wakafusilwa mubbibi lyamulilo.