Ciibalusyo 23

Bantu bakasigwa kunjila mumbungano

¹ “Taakwe muzibe naa uukoswedwe weelede kubungana abantu ba Mwami Leza.

² “Taakwe mwana wamusokwe naba umwi walunyungu lwakwe weelede kubungana abantu ba Mwami Leza mane kusikila kuzyalani lyakkumi.

³ “Taakwe Muamoni naba Mumowabu naba umwi wamusyobo wabo weelede kubungana abantu ba Mwami Leza, mane kusikila kuzyalani lyakkumi. ⁴ Nkaambo aaba bakakaka kumupa zyakulya ciindi ciya nimwakazwa mu Ijipiti. Bakaita Balaamu mwanaa Peyo uuzwa ku Petoo ku Mesopotamiya kuti azoomusinganye. ⁵ Nikuba boobo Mwami Leza wanu taakaswiilila zyakaamba Balaamu. Nkaako wakasandula kusinganya ooku kuti cibe cileleko canu, nkaambo kakuti Mwami Leza wanu ulamuyanda. ⁶ Mubuumi bwanu boonse tamweelede kuyoopangana cizuminano caluumuno alusumpuko abantu aaba pe.

⁷ “Tamweelede kusampaula Baedomu, nkaambo mulilunyungu lomwe. Tamweelede kusampaula Baijipiti, nkaambo mwakakkala munyika yabo mbuli bazwamasi. ⁸ Balunyungu lwabo, bazyalani lyatatu balakonzya kubungana abantu ba Mwami Leza.

Zyakusalazya zivuka zyabasilumamba

⁹ “Naa mwainka kuyoolwana basinkondonyoko, muleelede kubona kuti mwalitantamuna kuzwa kuzintu zyoonse eezyo zikonzya kumusofwaazya. ¹⁰ Kuti umwi wanu walisofwaazya akaambo kakuti walilotela, weelede kuya kunze lyazivuka, akkale ooko. ¹¹ Pele kwaba kumangolezya asambe amubili, eelyo lyabbila ulakonzya kunjila muzivuka.

¹² “Musale lubazu lwazivuka nkonkuko nkomuti busena bwakuligwasyila. ¹³ Muleelede kubeza cibelesyo cimwi cakuyoosisya, aawo mpomuyanda kukkalila, mwamana muvwikile. ¹⁴ Nkaambo Mwami Leza wanu uleendeenda muzivuka zyanu kuti amukwabilile akwaaba basinkondonyoko kulindinywe. Zivuka zyanu kazisalala, kuti Mwami Leza wanu ataboni tubi mukuti inga wamufutatila.

Zyamilawo imwi

¹⁵ “Kuti muzike umwi watija simalelaakwe akuboola kulinduwe, utamupilusyi pe. ¹⁶ Muleke akkale anduwe, ulakonzya kuunka akukkala mumunzi uuli woonse ngwaayanda. Toelede kumupenzya pe.

¹⁷ “Taakwe Muisilayeli mwaalumi naba mukaintu weelede kuba muvuule wakuŋanda ya Leza. ¹⁸ Mali aajanwa munzila eeyi taaelede kupegwa ku Mwami Leza wanu kuti azuzikizye cikonke cakwe, nkaambo Mwami Leza wanu taziyandi zintu zili boobu.

¹⁹ “Toelede kukweletesya Muisilayelinyoko mali niziba zilyo niciba cili buti coonse kuti ujane mpindu pe. ²⁰ Muzwamasi ulakonzya kumucita oobo, pele kutali Muisilayelinyoko, kuti Mwami Leza wanu akamuleleke mumilimo yanu munyika eeyo njayoomupa. ²¹ Kuti wakonkezya ku Mwami Leza wako, toelede kumuka kubamba cikonke eeco, nkaambo Mwami Leza uyooyanda kuti ucite mbookaamba, kwataba boobo uyooba aamulandu. ²² Pele kuti tokonkezyi, tokooyooba aamulandu pe. ²³ Kufumbwa eeco ncooamba weelede kucicita ncobeni, kayi waliyandila buya ku Mwami Leza wako.

²⁴ “Kuti naa wanjila mumuunda wamweenzinyoko wansaansa, ulakonzya kulya mboyanda, pele toelede kutolelezya mucinzuma ozwa pe. ²⁵ Kuti wanjila mumuunda wamweenzinyoko wamaila, ulakonzya kupuka makunka, pele toelede kugonka maila aimvwi acigonsyo pe.