Ciibalusyo 22
1 “Kuti wabona ŋombe niiba mbelele ya Muisilayelinyoko iiswekede, toelede kwiileka buyo, weelede kwiitola kulinguwe. 2 Kuti muntu ooyo katazwi afwiifwi, naa kotamuzi, weelede kwiitola kwako akwiibamba nkabela mwini aboole kwiilangaula, umupe. 3 Ucite mbubonya oobo kumbongolo yakwe, niciba cisani cakwe, niciba cintu cili buti ncaasweekelwa Muisilayelinyoko. Toelede kucileka buyo pe.
4 “Kuti wabona mbongolo naa musune wa Muisilayelinyoko kawide, utaindilili, uleelede kumubusya.
5 “Mukaintu teelede kusama zisani zyamwaalumi, awalo mwaalumi teelede kusama zisani zyamukaintu, nkaambo Mwami Leza wanu ulimusulide muntu uucita cili boobo.
6 “Kuti wajana citeente cakayuni munsi aanzila, nimuba mumusamu, naa ansi kanyina kakali atwana naa amayi, toelede kutola kanyina antoomwe atwana pe. 7 Ulakonzya kutola twana pele kanyina weelede kukaleka, zintu nozitikweendele kabotu alimwi uloongola.
8 “Kuti wayaka ŋanda mpya, weelede kuyaka cikwabilizyo kuzinguluka ciluli. Ndendilyo notakooyooba aamulandu wabujayi kuti naa umwi wawa akufwa.
9 “Mumuunda wako wansaansa, toelede kusyanga mbuto zyamisyobo yobilo. Naa wacita oobo, tazili buyo zisyango eezyo zisofwaala, pele nsaansa zini.
10 “Utalimyi musune antoomwe ambongolo.
11 “Utasami cisani caboya bwambelele cisumidwe antoomwe acisani candeketela.
12 “Usume maaya muzyooko zyone zyacisani cako.
Zyamilawo yalukwato
13 “Kuti mwaalumi wakwata musimbi, nkabela kwainda mazuba ongaye, tacimuyandi, 14 aboobo watalika kumutamizya eeci aceeci, akumusampaula kuti naakamukwata taakali musimbi wini-wini pe.
15 “Kuti naa eeci cacitika, bazyali bamusimbi ooyo bakabweze cisani ncaakabelesya, bakacitole kubapati bamunzi, eeci cibe cakutondezya kuti mwanaabo wakali musimbi wini-wini. 16 Wisi musimbi uyooambila bapati aabo kuti, ‘Ndakakwasya mwanaangu ooyu kumwaalumi ooyu, pele ono tacimuyandi. 17 Wamutamikizya kuti ciindi naakamukwata, taakali musimbi wini-wini pe.’ Amana kwaamba boobo, bazyali babikke cisani eeco kumbele lyabapati bamunzi. 18 Mpoonya aawo bapati bamunzi bamuume mwaalumi ooyo. 19 Bamana bamubbadelesya nsiliva zili mwaanda, bazipe wisi musimbi ooyo, nkaambo wasampaula musimbi Muisilayeli. Kwamana boobo unooli mukaintu wakwe, takonzyi kumuleka mubuumi bwakwe boonse pe.
20 “Pele kuti makani aayo kaali aakasimpe, alimwi kakunyina citondezyo kuti wakali musimbi wini-wini, 21 baleelede kutola musimbi ooyo kumulyango waŋanda yawisi kuti bantu bamumunzi wakwe bamuume mabwe afwe. Nkaambo wakacita cintu cijazya nsoni Muisilayeli kwiindila mukuvuula kacili kwabo. Mbombuboobu mbomuyoogwisya bubi akati kanu.
22 “Kuti umwi wabbunukilwa amukaintu uukwetwe, boonse bobilo baleelede kujaigwa. Mbombuboobu mbomuyoogwisya bubi mu Isilayeli.
23 “Atwaambe kuti umwi wajatwa amusimbi uukkalidwe mukati kamunzi, 24 boonse bobilo muleelede kubaleta kumulyango wamunzi, mubaume mabwe bafwe. Musimbi ulafwida kaambo kakuti nikuba kuti wali mumunzi, taakwe naalila pe. Mwaalumi ulafwida kaambo kakuti waya kuli mukamuntu. Mbombuboobu mbomuyoogwisya bubi akati kanu.
25 “Atwaambe kuti mwaalumi wajana musimbi uukkalidwe kusokwe, kwamana wamujata, mwaalumi ooyo alikke nguuelede kujaigwa. 26 Taakwe ncomuticite kumusimbi ooyo. Walo taakwe naacita mulandu weelede lufu pe. Mulandu wamwaalumi ooyu uli mbuli wamuntu uunga wajaya mweenzinyina acaali. 27 Mwaalumi ooyu wajata musimbi uukkalidwe kusokwe, nikuba kuti musimbi kalila, taakwe wali kunga wamuvuna.
28 “Lino atwaambe kuti mwaalumi wajata musimbi uutakkalidwe kwamana bajatwa, mwaalumi ooyo 29 uyoobbadela wisi musimbi nsiliva zili makumi osanwe. Kwamana uleelede kumukwata, nkaambo woona aanguwe. Teelede kumuleka mubuumi bwakwe boonse.
30 “Taakwe weelede kukwata mukawisi, nikuba koona aawe.