Bapaizi 17

Malailile aamba zyabulowa

¹ Lino Mwami Leza wakaambila Mozesi kuti, ² “Ambila Aloni abana bakwe alimwi a Baisilayeli malailile aaya. ³ Muisilayeli tazumizidwe kupaizya ŋombe niiba mbelele naa mpongo muzivuka naaba anze lyazivuka, ⁴ pele ukonzya buyo kupaizya kumulyango watente lyakuswaanganina, kuti wacita oobo waba aamulandu wabujayi. Nkaambo watila bulowa, aboobo takategwa ngumwi wabantu ba Leza. ⁵ Eeci caamba kuti Baisilayeli balakonzya kuleta zipaizyo ku Mwami Leza nzyobakali kujaila anze. Nkabela banoozileta kubapaizi kumulyango watente lyakuswaanganina nkobayoozijaila kuti zibe zipaizyo zyalumvwano ku Mwami Leza. ⁶ Mupaizi unoosansaila bulowa acipaililo, kumulyango watente lyakuswaanganina, wamana uyootenta mafuta abe bweema bubotelezya ku Mwami Leza. ⁷ Aboobo Baisilayeli batakaipaizizyi limbi mituni njobalisofwaazya. Baleelede kutobela mulawo ooyu kwamazyalani oonse.

⁸ “Kufumbwa Muisilayeli naba wamasi uukkala ambabo uupaizya cipaizyo cakutenta niciba cipaizyo cimbi ku Mwami Leza ⁹ kubusena bumbi kutali kumulyango watente lyakuswaanganina, ooyo tacinooyoobalwi limbi muciinga cabantu ba Leza.

¹⁰ “Alimwi kuti naa Muisilayeli naba wamasi uukkala ambabo walya bulowa, Leza uyoomunyemena, tacinooyooli wakwe pe. ¹¹ Nkaambo kakuti buumi bwacintu buli mubulowa, ncenciceeco Leza ncaakaambila kuti mutuuzye bulowa acipaililo mukugwisya zinyonyoono zyanu, ¹² nkaambo tee kayi mbulowa bununuzya buumi bwabantu. Nkankakaako Leza ncaakaambila Baisilayeli abamasi bakkala akati kabo kuti taakwe naba umwi wabo weelede kulya nyama iijisi bulowa.

¹³ “Alimwi kuti naa Muisilayeli naba wamasi uukkala ambabo waca munyama naa muyuni uukonzya kuligwa mumulawo, uleelede kutila bulowa ansi akubuvwikkila. ¹⁴ Nkaambo kakuti buumi bwabanyama buli mubulowa. Aboobo Mwami Leza wakaambila Baisilayeli kuti tabeelede kulya nyama iijisi bulowa pe. Kufumbwa muntu wiilya tacili wa Leza pe.

¹⁵ “Kufumbwa Muisilayeli naba wamasi uukkala ambabo, walya munyama walifwida naba walumwa, muntu ooyo uleelede kusanzya zisani zyakwe alwakwe mwini, kwamana unoosofweede kusikila kumangolezya. ¹⁶ Kuti naa taciti oobo, uyooba aamulandu.”