Bapaizi 18
Ziyanza zitondwa zyabwaalumi
1 Lino Mwami Leza wakaambila Mozesi 2 kuti aambile Baisilayeli makani aaya aakuti, “Ndime Mwami, Leza wanu. 3 Mutatobeli ziyanza zya Baijipiti, ooko nkomwakakkede, niziba ziyanza zyabantu bamu Kenani ooko nkondimutola lino. 4 Amutobele milawo yangu alimwi mucite kufumbwa ncindamulailila. Ndime Mwami Leza wanu. 5 Amutobele milawo akucita ncindamulailila, nkaambo uucita boobo uyoofutuka. Ndime Mwami Leza.
6 “Mutakwatani mumukowa pe. Ndime Mwami Leza. 7 Alimwi utausyi uso nsoni mukuti wanjila muŋanda yakwe. Nkaambo mbaanyoko, utabasiki amubili. 8 Utausyi uso nsoni nkaambo kakuya mumaanda aakwe aamwi. 9 Utamusiki amubili mucizi, naba muzaanyina, naba wakakulila muŋanda naa kuletelelwa. 10 Utamusiki amubili muzyukulu wako, nkaambo inga cilakuusya nsoni kapati. 11 Utamusiki amubili waŋanda imwi, nkaambo mucizi wako. 12-13 Utamusiki amubili mucizi wauso naba wabanyoko. 14 Utamusiki amubili mukaintu wauso mupati naa wauso musyoonto nkaambo mbaanyoko. 15 Utamusiki amubili mukamwanaako, nkaambo mwanaako. 16 Utamusiki amubili mukamwanookwanu, nkaambo ciyoosampuzya mwanookwanu. 17 Utamusiki amubili muzyukulu wamukaintu wako umwi nkaambo nciinga comwe amukaintu ooyo, ncibi. 18 Utamusiki amubili mulamwaako kacipona mukaintu wako, nkaambo mmucizi wako.
19 “Utaswaangani amukaintu ciindi nali kuya bakaintu, nkaambo kakuti mumulawo tasalali pe. 20 Uteendi amukamweenzinyoko nkaambo ciyookusofwaazya. 21 Mutapaizyi bana banu kuli Moleki, nkaambo ciyoousisya nsoni Leza wanu. Ndime Mwami Leza. 22 Muntu ataciti citaambiki amwaaluminyina nkaambo eeco Leza taciyandi aasyoonto pe. 23 Taakwe mwaalumi naba mukaintu weelede kulala amunyama, eeco cilasofwaazya.
24 “Mutalisofwaazyi azeezi zyoonse ziyanza ziteelede kucitwa. Eezi nzeziyanza zyasofwaazya misyobo yacisi nceyoomupa, nkaako Leza uyoobatanda kuzwa mucisi eeco. 25 Nkaambo nzyobacita zyabisya nyika, ndiyoobasubula akubatanda munyika njobakkala. 26-27 Bakacita zitu eezi zisesemya zyakasofwaazya nyika, pele nywebo mukabambe milawo ya Mwami Leza. Taakwe Muisilayeli naba wamasi akati kanu, weelede kuyoozicita zintu zili boobu. 28 Mwacita boobo nyika iyoomukaka, mbuli mboyakabakaka bakunze bakali kukkala mulinjiyo kamutana. 29 Mulizi kale kuti kufumbwa uyoocita zintu eezi zisesemya takooyoobalwa limbi mubantu ba Leza.”
30 Alimwi Mwami Leza wakaamba kuti, “Amutobele malailile ngendamupa. Mutatobeli nzibacita bakiikkede kamutana. Mutalisofwaazyi pe mukucita zintu zibi zili boobo. Nkaambo ndime Mwami Leza wanu.”