Bapaizi 14
Mbwasalazigwa sicinsenda
1 Lino Mwami Leza wakaambila Mozesi 2 kuti, “Ngooyu mulawo wakusalazya muntu uulaacinsenda. Buzuba mbwataambilizigwe kuti wapona, uyooletwa kumupaizi, 3 walo mupaizi uyoomugwisya akumutola anze lyazivuka akumulanga-langa. Kuti naa bulwazi bwapona, 4 mupaizi inga waambila muntu ooyo kuti alete bayuni bobilo bakonzya kupaizigwa ankuni yamukamba, butonje busalala pyu, akatabi kahisopo. 5 Lino mupaizi ulaambilizya kuti muyuni umwi ajaigwe mumutiba wabulongo uujisi maanzi aakasensa. 6 Alimwi akabweze muyuni wasyaala akamunyike antoomwe ankuni yamukamba abutonje busalala pyu akatabi kahisopo mubulowa bwamuyuni wajaigwa. 7 Nkabela mupaizi uyoosansaila ziindi zili ciloba amuntu ooyo uuyanda kusalazigwa, akwaamba kuti lino wasalala. Wamana natilekezye muyuni uupona akauleke musokwe. 8 Muntu ooyo akasanzye zisani zyakwe, akagele masusu, akasambe, ndendilyo nayoosalala mumulawo. Uyoonjila mukati, pele uleelede kukkala anze lyatente lyakwe kwamazuba aali ciloba. 9 Alimwi mubuzuba bwaciloba uleelede kugela alimwi anyoole cilezu, ankoye aboya boonse buli amubili, akasanzye zisani zyakwe zyoonse alwakwe mwini akasambe, eelyo uyoosalala mumulawo.
10 “Lino mubuzuba bwalusele akalete bagutu bobilo akabelele kapwizi kamwaka omwe zitajisi kampenda, nsangwa yabusu bukandidwe amafuta, alufulu lwamafuta. 11 Amana mupaizi uumusalazya uyootola muntu ooyo azipaizyo kumulyango watente lyakuswaanganina. 12 Eelyo mupaizi akatole mugutu omwe, akamupaizye mbuli cipaizyo camulandu antoomwe alufulu lwamafuta, zitikabe cipaizyo cakuzumbaanya ku Mwami Leza. 13 Eelyo uyoojaya kapwizi kubusena ooko kujailwa cipaizyo cakugwisya zinyonyoono acakutenta. Uleelede kucicita eeci nkaambo ncipaizyo camulandu, calo cili mbuli cipaizyo cakukombelezezya zinyonyoono, ncamupaizi alimwi cilasalala kapati. 14 Lino mupaizi uyoobweza bumwi bulowa bwakapwizi akubulamba kukutwi kwalulyo kwamuntu ooyo, akucala calulyo, akucala cakukuulu kwalulyo kwamuntu ooyo uutegwa wasalala mumulawo. 15 Mupaizi uyooungula mafuta amwi mulufulu akwaatila mujanza lyalumwensi lwakwe. 16 Amana akanyike munwe wakwe walulyo mumafuta, nkabela akasansaile kwaziindi zili ciloba nkukonya ooko kumbele lya Mwami Leza. 17 Akaungule aamwi mafuta aasyaala mujanza lyakwe antoomwe abulowa bwakapwizi, akalambe kumpela lyakutwi kwalulyo, akucala calulyo, akukantengezya kakuulu kwakululyo kwamuntu ooyo sikusalazigwa. 18 Lino mafuta aayo aasyaala mujanza akaatile amutwe wamuntu ooyo. Mbombuboobu mbwayoocita cipaizyo camulandu.
19 “Lino mupaizi uyoopa cipaizyo cakugwisya zinyonyoono akucita ciyanza cakusalazya. Aakumana kucita oobo natikajaye munyama wacipaizyo cakutenta, 20 akumupaizya acipaililo antoomwe acipaizyo camaila. Munzila eeyi mupaizi mbwayoocita mulimo wakusalazya, nkaako muntu ooyo uyoosalala ncobeni.
21 “Kuti naa muntu ooyo kali mucete uutakonzyi kujana zintu zinji, inga ulaleta kagutu komwe buyo kakusalazigwa kwakwe, kabe kacipaizyo camulandu cakuzumbaanya kuli Leza. Alimwi alete ansangwa yabusu bunante bukandidwe amafuta, alufulu lwamafuta, zibe cipaizyo kuli Leza. 22 Alimwi aletelele anziba zyobilo naa tukwilimba tobilo, imwi njacipaizyo cakugwisya zinyonyoono, imwi njacipaizyo cakutenta. 23 Lino mubuzuba bwalusele bwaciyanza cakusalazigwa kwakwe, uyoozileta kumupaizi kumulyango watente lyakuswaanganina. 24 Mupaizi atole kagutu amafuta, akuzizumbaanya ku Mwami Leza, zibe cipaizyo camulandu. 25 Mupaizi uyoojaya kabelele akugwisya bumwi bulowa akubulamba kumpela lyakutwi kwalulyo akucala cajanza lyalulyo, akucala cakuulu kwalulyo kwamuntu ooyo. 26 Mupaizi uyooungula mafuta mujanza lyakwe lyalumwensi, 27 eelyo ajanza lyakwe lyalulyo uyoosansaila mafuta amwi ziindi zili ciloba kumbele lya Mwami Leza. 28 Uyoolamba mafuta amwi mbubonya, kumpela lyakutwi kwalulyo, akucala cajanza lyalulyo, akucala cakuulu kwalulyo kwamuntu ooyo. 29 Lino mafuta aayoosyaala mujanza lyamupaizi akatilwe amutwe wamuntu ooyo. Mbombuboobu mbwayoosalazigwa muntu ooyo. 30 Kwamana uleelede kupa nziba yomwe naa nkwilimba yomwe, kufumbwa ncakonzya, 31 kuti cimwi cibe cipaizyo cakugwisya zinyonyoono, cimwi cibe cipaizyo cakutenta antoomwe amaila. Mbombuboobu mbwayoosalazigwa muntu ooyo. 32 Aaya ngamalailile aayooyo uuciswa cinsenda, uutakonzyi kuleta zipaizyo zyeelede kuti asalazigwe.”
Ngubi zyamaanda
33 Lino Mwami Leza wakaambila Mozesi a Aloni kuti, 34 “Mwaakunjila buyo mu Kenani, nyika njeyoomupa kuti ibe yanu, mwaakubona ngubi mumaanda aanu, mukacite boobu. 35 Mwini ŋanda uleelede kuya kumupaizi kuti akamuzibye makani aaya. 36 Nkabela mupaizi uyoolailila kuti zintu zyoonse zili muŋanda zigwisigwe anze, kuti zitatabukilwi. Eelyo mupaizi uyoonjila muŋanda eeyo, 37 akwiilanga-langa. Kuti kwajanika ngubi abwaanda bwaŋanda, 38 uyoozwa muŋanda oomo akwiijala kwamazuba aali ciloba. 39 Lino mubuzuba bwaciloba, mupaizi uyoobweeda alimwi kuti akailange-lange. Kuti wabona kuti ngubi yayandilila, 40 uyoolailila kuti mabwe ajisi ngubi agwisigwe asowegwe kubusena bwamakwisyilili, kunze lyamunzi. 41 Kwamana boobo, bwaanda bwaŋanda eeyo bukapalwe-palwe mobuli mukati, makomwe oonse aakasowegwe anze lyamunzi kubusena bwamakwisyilili. 42 Nkabela bakalete mabwe aambi mubusena bwayaayo aasowegwa bamana basyingulule alimwi bwaanda boonse mukati.
43 “Kuti ngubi yajanika alimwi muŋanda oomo mwakasyingululwa kale, kaali mabwe akagwisigwa kale, 44 mupaizi uleelede kuunka akiilange-lange alimwi. Kuti ngubi yayandilila muŋanda eeyo ningubi mbyaabi, ŋanda eeyo tiisalali pe. 45 Ileelede kumwaigwa, mabwe amakomwe zyoonse zikasowelwe anze lyamunzi kubusena bwamakwisyilili. 46 Kufumbwa uyoonjila muŋanda eeyo iijalidwe, takooyoosalala mane kusikila ciindi cakumangolezya. 47 Kufumbwa uyoonjila akoona akulida mumo, uleelede kusanzya zisani zyakwe.
48 “Kuti naa mupaizi wiilanga-langa ŋanda eeyo, wajana kuti ngubi tiiyayandilila mukati ciindi niyasyingulululwa alimwi, uyooambilizya kuti ŋanda eeyo ilasalala, nkaambo kakuti ngubi yamana. 49 Lino mukuti ŋanda isalazigwe, ulaayo uyootola tuyuni tobilo, ankuni yamukamba, butonje busalala pyu, akatabi kahisopo. 50 Uleelede kujaya kayuni komwe mumutiba wabulongo uujisi maanzi aakasensa. 51 Wamana abweze nkuni yamukamba akatabi kahisopo, butonje busalala pyu, akayuni kapona akazinyike mubulowa bwakayuni kajaigwa mumaanzi aayo. Nkabela akasansaile ŋanda ziindi zili ciloba. 52 Mbombuboobu mbwayoosalazya ŋanda abulowa bwakayuni, maanzi aakasensa, kayuni kapona, nkuni zyamukamba, katabi kahisopo, alimwi abutonje busalala pyu. 53 Wamana uyookalekezya kayuni kapona kunze lyamunzi. Eeci nceciyanza cakusalazya ŋanda, eelyo iyoosalala mumulawo.”
54 Lino aaya ngamalailile aabulwazi bwacinsenda. 55-56 Zilonda, zyuute, azibabo, ngubi mumaanda aazisani, 57 kuti zizibwe naa zilasalala naa pe. Aaya ngamalailile aabulwazi bwacinsenda.