Bapaizi 15
Zyakulilotela akuzwa zisesemya
1 Lino Mwami Leza wakaambila Mozesi a Aloni kuti, 2 “Ambila Baisilayeli kuti muntu naa kazwa zisesemya kubwaalumi tasalali, 3 nikuba kuti kazicizwa naa zyaleka. 4 Kufumbwa bulo mbwaaona bulasofwaala. 5 Kufumbwa uuguma bulo bwakwe uleelede kusanzya zisani zyakwe alwakwe mwini, nikuba boobo unoosofweede kusikila kumangolezya. 6 Alimwi kufumbwa uukkala aali coonse ncaakkede ooyo, uleelede kusanzya zisani zyakwe alwakwe mwini, nikuba boobo unoosofweede kusikila kumangolezya. 7 Kufumbwa muntu wagumana amuntu ooyo, uuzwa zisesemya, uleelede kusanzya zisani zyakwe alwakwe mwini, nikuba boobo unoosofweede kusikila kumangolezya. 8 Alimwi kuti ooyo uuzwa zisesemya waswida muntu umwi, waswidwa ooyo uleelede kusanzya zisani zyakwe, alwakwe mwini, nikuba boobo unoosofweede kusikila kumangolezya. 9 Kufumbwa cuuno ncaakkala muntu ooyo cilisofweede. 10 Alimwi kufumbwa muntu uuguma cintu eeco muntu ooyo ncaakkede, awalo ulasofwaala kusikila kumangolezya. Alimwi kufumbwa muntu uubweza cintu nociba buti cali aakkede muntu ooyo, uleelede kusanzya zisani zyakwe alwakwe mwini, nikuba boobo unoosofweede kusikila kumangolezya. 11 Alimwi muntu ooyo uuzwa zisesemya waguma muntu katanasamba mumaanza wagumwa ooyo uleelede kusanzya zisani zyakwe alwakwe mwini, nikuba boobo unoosofweede kusikila kumangolezya. 12 Kufumbwa cibiya cagumwa amuntu ooyo cileelede kupwaigwa, alimwi kuti waguma mutiba wacisamu, mutiba ooyo uleelede kusanzigwa. Muntu ooyo wapona uleelede kulindila mazuba aali ciloba, 13 kwamana asanzye zisani zyakwe, alwakwe mwini mumaanzi aakasensa, eelyo inga wasalala mumulawo. 14 Lino mubuzuba bwalusele uyootola nziba zyobilo naa tukwilimba tobilo kumulyango watente lyakuswaanganina, akazipe mupaizi, 15 walo mupaizi uyoopaizya yomwe kuti cibe cipaizyo cakugwisya zinyonyoono aimbi ibe cipaizyo cakutenta. Munzila eeyi muntu ooyo ulacita ciyanza cakusalazya.
16 “Kuti naa mwaalumi walilotela, uleelede kusamba mubili woonse, pele nikuba boobo unoosofweede kusikila kumangolezya. 17 Kufumbwa cisani naa cikutu aawida bwaalumi, zintu eezyo zileelede kusanzigwa, pele cintu eeco cinoosofweede kusikila kumangolezya. 18 Mwaalumi waswaangana amukaintu, boonse bobilo baleelede kusamba, pele banoosofweede kusikila kumangolezya.
Mukaintu nali kuya bakaintu
19 “Lino ciindi mukaintu nali kuya bakaintu unoosofweede kwamazuba aali ciloba. Kufumbwa wamuguma awalo unoosofweede kusikila kumangolezya. 20 Cintu coonse ncaakkala naa koona kuciindi eeci, cilasofwaala. 21-23 Kufumbwa muntu uuguma bulo bwakwe niciba cintu ncaakkede, uleelede kusanzya zisani zyakwe alwakwe mwini, pele unoosofweede kusikila kumangolezya. 24 Alimwi kuti mwaalumi waswaangana amukaintu ooyo, mwaalumi inga wayambukilwa busofwaazi bwamukaintu, nkabela unoosofweede kwamazuba aali ciloba. Kufumbwa bulo mbwaalala abwalo bulasofwaala.
25 “Kuti naa mukaintu waindilizya ciindi cakwe, naa kubona mwezi alimwi, tanoosalali kwaciindi coonse ncanoociswa mbubonya mbuli ciindi cakwe. 26 Kufumbwa abulo mpaaona nikuba ncaakkala tacisalali naaindilizya ciindi cakwe. 27 Kufumbwa waziguma awalo tasalali. Mbubonya buyo, kufumbwa uuziguma ulasofwaala aboobo uyoosanzya zisani zyakwe alwakwe mwini, pele tanoosalali kusikila kumangolezya. 28 Ciindi naapona, uleelede kulindila kwamazuba aali ciloba, ndendilyo nayoosalala mumulawo. 29 Mubuzuba bwalusele uyoobweza nziba zyobilo naa nkwilimba zyobilo akuzitola kumupaizi kumulyango watente lyakuswaanganina. 30 Mupaizi uyootola imwi kuti ikabe cipaizyo cakugwisya zinyonyoono, imwi iyooba cipaizyo cakutenta. Munzila eeyi uyoocita ciyanza cakusalazya busofwaazi bakwe.”
31 Mwami Leza wakaambila Mozesi kuti acenjezye Baisilayeli kuti batantamuke kuzintu zisofwaazya kutegwa batasofwaazyi tente lyakukkalila lyalo lyakali akati kazivuka zyabo. Kuti naa tabaciti oobo, bayoojaigwa.
32 Aaya ngamalailile aamwaalumi uuzwa zisesemya naa kulilotela, 33 amukaintu uuli kuciindi cakwe. Malailile aaya alajatikizya mwaalumi naa mukaintu uuzwa zisofweede naba mwaalumi wakaswaangana amukaintu uucisofweede mumulawo.