2 Samuyele 6
Bbokesi lyacizuminano ca Leza mbulyakaletwa ku Jelusalemu
1 Lino alimwi Devedi wakabunganya boonse baalumi bakasalidwe ba Baisilayeli, bakali zyuulu zili makumi otatwe. 2 Mpawo wakanyamuka abantu boonse bakali kuzwa kumunzi wa Baale mucisi ca Juda kuyooleta bbokesi lyacizuminano ca Leza, bbokesi eelyo liitwa azina lya Mwami Leza Singuzuzyoonse uukkala akati kabakelebu bakwe, aabo bali atala aabbokesi eelyo. 3 Eelyo bakabweza bbokesi lyacizuminano ca Leza mucikwiliba mpya baligwisya muŋanda ya Abinadabu yakali acilundu. Uza a Ahiyo bana ba Abinadabu mbibakali kweenzya cikwiliba 4 mwakabede bbokesi lyacizuminano ca Leza, walo Ahiyo wakali kweendela kumbele lyabbokesi. 5 Mpoonya Devedi abantu boonse Baisilayeli bakasekelela kapati kulemeka Mwami Leza anguzu zyabo zyoonse, kabaimba nyimbo, kuuma banamalwa, tulumbu, tooma, nsakalala, amyeembo.
6 Lino nibakasika kucuumino ca Nakoni, Uza wakatandabika janza akujata bbokesi lyacizuminano ca Leza, nkaambo basune bakatililosye. 7 Mwami Leza wakanyemena Uza, wakamuuma nkukonya ooko nkaambo wakajata bbokesi lyacizuminano, wakafwa mpoonya aawo kumbali abbokesi lyacizuminano ca Leza. 8 Aawo Devedi wakabijilwa kapati nkaambo Mwami Leza wakajaya Uza. Ncenciceeco busena oobo asunu cobutegwa Peleziuza.
9 Lino akaambo kakuyoowa Mwami Leza Devedi wakati, “Ino mbubuti mbwenga ndalitola bbokesi lya Mwami Leza eeli?” 10 Nkaako Devedi taakacili kuyanda kulonzya bbokesi lyacizuminano kulinjizya mumunzi wa Devedi, pele wakalitola kumbali kuŋanda ya Obediedomu Mugati. 11 Bbokesi eelyo lyakakkala muŋanda ya Obediedomu kwa myezi yotatwe, eelyo Mwami Leza wakaleleka mukwasyi wa Obediedomu azintu zyoonse nzyaakajisi abamukwasyi wakwe.
12 Lino mwami Devedi wakaambilwa kuti, “Mwami Leza wakaleleka mukwasyi wa Obediedomu azyoonse nzyajisi, nkaambo kabbokesi lyacizuminano ca Leza. Aboobo Devedi wakainka kuyoolyeeta bbokesi lyacizuminano kuzwa kuŋanda ya Obediedomu kulitola kumunzi wakwe, kaya busekelela. 13 Eelyo aabo basikuyumuna bbokesi lyacizuminano ca Leza nibakeenda ntaamo zili cisambomwe, Devedi wakapaizya musune amoombe uuneneede. 14 Nkabela Devedi wakazyana canguzu mukulemeka Mwami Leza, kasamide kabaki kabupaizi katuba. 15 Devedi abantu boonse Baisilayeli bakeeta bbokesi lyacizuminano ku Jelusalemu kumwi kabaulubuzya akulizya myeembo.”
16 Lino bbokesi kalinjizigwa mumunzi Mikalo mwanaa Saulu wakasondela ampulungwido. Naakabona mwami Devedi kasotoka akuzyana mukulemeka Mwami Leza, wakamusampaula mumoyo wakwe. 17 Mpoonya bakalinjizya bbokesi lyacizuminano, bakalibikka mubusena bwalyo mukati katente Devedi ndyaakayakila bbokesi. Devedi wakapa zipaizyo zyakutenta azipaizyo zyalumvwano ku Mwami Leza. 18 Amane buyo kupa zipaizyo eezyo, wakaleleka bantu muzina lya Mwami Leza Singuzuzyoonse. 19 Eelyo Devedi wakapa Muisilayeli omwe-omwe mwaalumi naba mukaintu cinkwa comwe acituli canyama njoke, ansaansa ziyanikidwe. Kumane bantu boonse bakamwaika akuunka kumaanda aabo.
20 Azwe waawo Devedi wakapiluka kuyooleleka mukwasyi wakwe. Pele Mikalo mwanaa Saulu, wakazwida anze kuti azooswaanganye Devedi wakati, “Ino sunu watangala buti mwami wa Isilayeli ncalivumbaula akati kabasimbi babelesi bakwe mbubonya mbuli bulivumbaula bafuba-fuba!”
21 Eelyo Devedi wakati kuli Mikalo, “Ndacita boobo kulemeka Mwami Leza, walo wakandisala mubusena bwauso amukwasyi wakwe woonse, kuti mbe mwami wa Isilayeli, bantu ba Mwami Leza. Ndeelede kusekelela mukulemeka Mwami Leza. 22 Alimwi nzoosowa bulemu bwiinda mbundakacita sunu, nkabela uzoondisampaule yebo, pele aabo basimbi mboamba, mbabazoondilemeka.” 23 Aboobo Mikalo mwanaa Saulu wakaakwiide kufwa kataboni mwana.