2 Samuyele 5
Devedi mbwaakaba mwami wa Isilayeli a Juda
1 Kuzwa waawo mikwasyi yoonse ya Isilayeli yakasika kuli Devedi ku Hebuloni akwaamba kuti, “Kwaambisya swebo tuli bamwi anduwe. 2 Ciindi cakamana, Saulu naakacili mwami wesu, nduwe wakasolweda Baisilayeli munkondo, alimwi Mwami Leza wako wakati kulinduwe, ‘Nduwe ooyooembela bantu bangu Baisilayeli, alimwi nduwe uuyoobalela.’” 3 Ciindi basololi boonse bamu Isilayeli nibakasika kumwami Devedi ku Hebuloni, wakapangana ambabo cizuminano kumbele lya Mwami Leza. Mpawo bakamunanika kuba mwami waba Isilayeli. 4 Devedi wakalijisi myaka iili makumi otatwe ciindi naakatalika kulela, nkabela wakalela kwamyaka iili makumi one. 5 Ku Hebuloni wakalela Bajuda kwamyaka iili ciloba acisela, nkabela ku Jelusalemu wakalela bantu Baisilayeli boonse kwamyaka iili makumi otatwe aitatu.
6 Eelyo mwami abantu bakwe bakainka ku Jelusalemu kuyoolwana Bajebusi bakali kukkala mucisi eeco. Aabo bakaamba kuti kuli Devedi, “Tokoonjila muno pe, boofu abalema bazookutanda,” bakali kuyeeya kuti, Devedi takonzyi kunjila. 7 Nikubaboobo Devedi wakazoouzunda ncobeni munzi uukwabililidwe wa Ziyoni, uuli ngomunzi wa Devedi.
8 Nkabela oobo buzuba Devedi wakaambide kuti, “Bajebusi ndilibasulide kapati, kufumbwa uuyanda kuzunda baya balema, boofu weelede kwiinda mukankolola.” Ncokwaambwa kuti, “Boofu balema tabakooyoonjila muŋanda ya bwami.”
9 Lino Devedi wakaakukkala mubusena bukwabililidwe oobo, akubwiita kuti munzi wa Devedi. Kumane Devedi wakayakulula munzi ooyo kutalikila kucikwabilizyo ca Milo kuyoosika kulukwakwa luzingulukide. 10 Lino Devedi wakaindilila munguzu, nkaambo kakuti Mwami Leza Singuzuzyoonse wakali aanguwe.
11 Lino Mwami Hilamu waku Taya wakatuma batumwa bakwe kuli devedi. Wakatumina masamu aamulombe abasikuyasya mabwe ababezi kuyoomuyakila ŋanda mpati yabwami. 12 Devedi wakaziba kuti Mwami Leza nguwakkazika bwami bwakwe Muisilayeli, akuti Leza wabusumpula bwami bwakwe akaambo kabantu bakwe Baisilayeli.
13 Lino Devedi wakalijisi bamwanakasuwa banji abakaintu bamuŋanda ciindi naakazwa ku Hebuloni, kuya ku Jelusalemu. Nkabela Devedi wakazyala bana balombe abasimbi banji. 14 Ngaaya mazina aabaabo mbaakazyala mu Jelusalemu: Syamuwa, Syobabu, Natani, Solomoni, 15 Iba, Elisyuwa, Nefegi, Jafiya, 16 Elisyama, Eliyada, a Elifeleti.
Devedi mbwaakazunda Bafilisiti
17 Ciindi Bafilisiti nibakamvwa kuti Devedi wakananikwa bwami bwa Isilayeli, cakufwambaana boonse bakainka kuti bakajate Devedi. Pele Devedi naakamvwa boobo wakainka kubusena bukwabililidwe. 18 Lino Bafilisiti bakaza akuzoondandama mukkuti lya Lefaimu. 19 Nkaako Devedi wakabuzya Mwami Leza kuti, “Sena nkabalwane Bafilisiti? Sena ubaaba kulindime?”
Leza wakati kuli Devedi, “Iiyi, koya, nkaambo ncobeni ndabaaba Bafilisiti kulinduwe.” 20 Aawo Devedi wakasika ku Baalapelazimu, kwalo nkwaakaakubazundila Bafilisiti. Mpoonya wakati, “Mwami Leza wandimwaila basinkondoma mbubonya mbuli maanzi aafwasuka.” Ncenciceeco busena oobo ncobwiitwa kuti Baala-pelazimu. 21 Ooko Bafilisiti nibakatija bakasiya mituni yabo, nkabela Devedi abantu bakwe bakaza kuzooitola.
22 Alimwi Bafilisiti bakaboola kuzoondandama mumonya mukkuti lya Lefaimu. 23 Ciindi Devedi naakabuzya Mwami Leza, wakaambilwa kuti, “Utabagami, pele koya ukabazwide kusule, ukabavumpe cakubasyaanikizya kumangwabale. 24 Lino waakumvwa musindo wakweenda atala azisamu, koya ubalwane nkaambo eeci citondezya kuti ndakusolweda kale kuyoozunda Bafilisiti.” 25 Aboobo Devedi wakacita mbuli mbwaakalaililwa a Mwami Leza. Bakalikujaya Bafilisiti kuzwida ku Geba kuyoosika ku Geza.