2 Samuyele 4
Isyibosyeti mbwaakajaigwa
1 Isyibosyeti, mwanaa Saulu, naakamvwa kuti Abina wakafwa ku Hebuloni, wakatyompwa, a Baisilayeli boonse bakayoowa. 2 Lino mwanaa Saulu wakalijisi baalumi bobilo bakali basilutwe bampi zisaala, zina lyaumwi wakali Bana, umwi wakali Lekabu, bana ba Limoni Mubenjamini uuzwa ku Biiloti, Biiloti ndubazu lwa Benjamini, 3 lino Babiiloti bakatijila ku Gitayimu, ooko nkobacili bacili bazwakule asunu.
4 Jonatani mwanaa Saulu wakalijisi mwana mulombe wakalemene maulu. Cakacitika boobu, kali aamyaka yosanwe makani aalufu lwa Saulu a Jonatani akasika kuzwa ku Jezuliili. Eelyo uumulela wakamubweza, akutija, cakufwambaana. Mukucita boobo mwana wakawida ansi walemana. Mwana ooyo wakali Mefibosyeti.
5 Lino bana balombe ba Limoni Mubiiloti bakali ba: Lekabu a Bana, bakeenda zuba kalili acilungu-lungu, bakasika kuŋanda ya Isyibosyeti ciindi ncaakalede abulo kalyookezya sikati. 6 Mukaintu wakali mulindizi waŋanda wakali kuuma maila, pele wakafwa ŋonzi, mpoonya wakoona. Nkaako Lekabu a Bana bakanjila cakusobelela. 7 Nibakanjila muŋanda Isyibosyeti wakalilede kubulo, bakamuyasa akumujaya bamukosola mutwe. Bakabweza mutwe wakwe, batola nzila iiya ku Alaba bakeenda masiku oonse kuleta mutwe wa Isyibosyeti kuli Devedi ku Hebuloni. 8 Mpawo bakati kulinguwe, “Ngooyu mutwe wa Isyibosyeti, mwanaa Saulu, sinkondonyoko, wakali kuyanda kukujaya. O mwami wangu simalelaangu, Mwami Leza wabweedezya bubi sunu kuli Saulu akubana bamukwasyi wakwe.”
9 Pele wakaingula Lekabu a Bana munyina, bana ba Limoni Mubiiloti kuti, “Mbubonya mbuli Mwami Leza mbwali muumi, wakanununa buumi bwangu kuzwa kumapenzi oonse, 10 ciindi umwi muntu naakandaambila kuti, ‘Langa, Saulu ulifwide,’ wakali kuyeeya kuti wandeetela makani mabotu, pele mebo ndakamujata akumujaya nkukonya ooko ku Zikilagi, ncecilumbo ncendakamupa kumakani aakwe. 11 Lino sena taciindi kubija eeci cintu cakuti baalumi basizibi bajaya mwaalumi uululeme muŋanda yakwe mwini abulo bwakwe? Sena nseelede kubweedezya cisubulo kulindinywe akaambo kakwe, akumugwisya anyika?” 12 Eelyo Devedi wakalailila basilumamba bakwe, mpawo bakabajaya akukosola maboko amaulu aabo akubaanzika kumbali akaziba kaku Hebuloni. Pele bakabweza mutwe wa Isyibosyeti akuyoouzikka mucuumbwe ca Abina ku Hebuloni.