2 Samuyele 12
Makani aa Natani akweempa kwa Devedi
1 Lino Mwami Leza wakatuma Natani kuli Devedi. Wakasika kulinguwe akumwaambila kuti, “Mumunzi umwi mwakali baalumi bobilo. Umwi wakali muvubi, umwi wakali mucete. 2 Mwaalumi muvubi wakajisi mbelele aŋombe zinji. 3 Pele mucete taakwe ncaakajisi pele buyo kabelele komwe kapwizi nkaakaulide. Wakakalela kuŋanda yakwe antoomwe abana bakwe. Aaka kabelele kakalizibide kulya munsuma wakwe mwini, kunywida munkomeki yakwe, akulala akaango kakwe, nkabela kulinguwe kakali mbuli mwana musimbi wakwe. 4 Lino muvubi wakaswaigwa mweenzu, nikuba boobo taakwe naakayanda kuti ajaile mweenzu niiba yomwe yambelele zyakwe, naa ŋombe yakwe pe, pele wakabweza kabelele kamucete, wakajaila mweenzu wakwe ooyo wakaza kuzoomuswaya.”
5 Mpoonya Devedi wakanyema. Eelyo wakati kuli Natani, “Mbubonya mbuli Mwami Leza mbwali muumi, ncobeni ooyo mwaalumi wakacita boobo uleelede kufwa. 6 Alimwi aako kabelele uleelede kukabbadela kone, nkaambo wacita eeci cintu, alimwi nkaambo tajisi luse.”
7 “Nduwe mwaalumi ooyo.” Mbwaakaamba Natani kuli Devedi. “Mboobu mbwaamba Mwami Leza wa Isilayeli, ‘Ndakakunanika kuti ube mwami wa Isilayeli, akukuvuna kuzwa kuli Saulu, 8 alimwi ndakakupa buvubi bwasimalelo wako, abakaintu bakwe, akukupa musyobo wa Isilayeli awa Juda, nikwakali kuti naa eezi zyakakuceela nindakakupa azimwi ziinda waawa.’ 9 Ino nkaambo nzi nconyansya majwi aa Mwami Leza akucita cibi eeci? Wajaya Uliya Muhiti apanga akutola mukaintu wakwe kuti abe mukaintu wako, wacitya kuti Baamoni bamujaye apanga. 10 Nkaako kulwana takukamani mumukwasyi wako, nkaambo wandinyansya mebo, alimwi watola muka Uliya Muhiti kuti abe mukaintu wako. 11 Ndalumbizya kuti, ‘Njookubusizya bubi kuzwa mumukwasyi wako omwini, alimwi njoobatola bakaintu bako akuyoobapa kumweenzinyoko, ooyo uyoolalika bakaintu bako mukaanzambwene. 12 Eeci cintu wakacicita mukusisikizya, pele mebo cintu ncenticite ndacicita Baisilayeli boonse kababwene zuba kalitwamwaaba.’”
13 Mpawo Devedi wakati kuli Natani, “Ndabisizya Mwami Leza.” Eelyo Natani wakati kuli Devedi, “Awalo Mwami Leza walekelela cibi cako, tokoofwa pe. 14 Nikuba boobo, nkaambo kaceeci ncookacita mukunyansya Mwami Leza, mwana ooyo uutikazyalwe takaimi.” 15 Amane Natani wakabweeda kuŋanda yakwe.
Mwanaa Devedi mbwaakafwa
Lino Mwami Leza wakacisya mwana ngwaakazyala muka Uliya kuli Devedi. 16 Nkaako Devedi wakakombela mwana ku Mwami Leza, eelyo Devedi wakaliimya kulya, wakanjila muŋanda akulala ansi masiku oonse. 17 Mpawo bapati bamukwasyi wakwe bakaima munsi aanguwe kuti bamubusye kuzwa waawo mpaakalede, pele wakakaka. Taakwe naakabuka, nikuba kulya cilyo ambabo pe. 18 Lino mubuzuba bwaciloba mwana wakafwa. Nkabela babelesi ba Devedi bakayoowa kuyoomwaambila kuti mwana wafwa. Nkaambo bakati, “Mubone mwana naacili muumi twakasola kwaambaula anguwe, nikuba boobo taakwe naakatuswiilila pe, ino mbubuti mbotunga twamwaambila kuti mwana wafwa? Ambweni alicise.”
19 Pele Devedi naakabona kuti babelesi bakwe balavwiya-vwiya, wakaziba kuti mwana wafwa. Mpoonya Devedi wakati kubabelesi bakwe, “Sena mwana wafwa?”
Bakati, “Iiyi, wafwa.”
20 Aawo Devedi wakabuka wasamba akunana mafuta akusama zisani zimbi. Mpoonya wakanjila mucikombelo ca Leza akukomba. Amane wakainka kuŋanda yakwe, nkabela naakakumbila, bakamubikkila zyakulya, eelyo wakalya.
21 Babone boobo babelesi bakwe bakati kulinguwe, “Ino ninzi eeci ncoocita? Mwana naacili muumi, wali kuliimya kulya akulila, pele ciindi mwana naafwa, wabuka walya cilyo.”
22 Walo wakati, “Ciindi mwana naacili muumi, ndali kuliimya kulya akulila, nkaambo ndali kuti, ‘Ino nguni uuzi ambweni Leza ulandifwida luzyalo kuti mwana apone?’ 23 Pele lino wafwa kale, ino nkaambo nzi nceceelede kuliimya kulya? Sena ndakonzya kumuboozya? Mebo njooinka kulinguwe, pele walo takooyooboola kulindime pe.”
24 Mpoonya Devedi wakasangalazya mukaintu wakwe Batisyeba, wakamusandukila. Kumane wakazyala mwana mulombe ooyo ngwaakaulika kuti Solomoni. Awalo Mwami Leza wakayandisisya Solomoni. 25 Lino wakatumya makani kuli Devedi kwiindila muli Natani musinsimi, ncenciceeco Devedi ncaakamuulikila kuti Jedidiya nkokuti Muyandwi wa Leza kweendelana amajwi aa Mwami Leza.
Devedi mbwaakazunda munzi wa Laba
26 Lino Jowabu wakalwana munzi wa Laba awa Baamoni, akuzunda lubazu lumwi lwamunzi ooyo. 27 Mpawo Jowabu wakatuma batumwa kuli Devedi akwaamba kuti, “Ndaulwana munzi wa Laba, alimwi ndasaala mikalo yamunzi ooyu. 28 Lino kobunganya basinkondo boonse aabo basyeede, uze uzooyake zivuka kuzoozinguluka munzi uuzunde woonse, mukuti ndauzunda inga uyooitwa zina lyangu.” 29 Aboobo Devedi wakabunganya basinkondo boonse akuunka ku Laba kuyoolwana, mpawo wakazunda. 30 Mpoonya wakasamununa mwami wakooko musini, musini ooyo wakali kulema talenta lyomwe lyangolida, mulinguwo kwakali abbwe lidula. Devedi wakasamikwa musini ooyo. Alimwi wakaletelezya azisaalo zyamunzi zinji. 31 Wakaletelezya abantu bakali mulinguwo, wakabapa mulimo wakubelesya masaha, mapiki, tweembe akubabelesya mulimo wakuuma zitina. Mbombuboobu Devedi mbwaakali kucita kuminzi ya Baamoni yoonse. Mpoonya Devedi abantu boonse bakapilukila ku Jelusalemu.