2 Samuyele 11
Devedi a Batisyeba
1 Lino kumatalikilo aamwaka, ciindi bami nibakainka kuyoolwana, Devedi wakatuma Jowabu abalupati-pati bankondo kuti bainke abasilumamba bamwi ba Baisilayeli. Nkabela bakaakunyonyoona Baamoni akusinkilizya munzi mupati wa Laba. Walo Devedi wakasyeede ku Jelusalemu.
2 Eelyo ciindi cimwi mangolezya, Devedi wakabuka kuzwa abulo bwakwe akweendeenda atala alululi lwaŋanda yakwe yabwami. Kali aawo wakabona mukaintu wakali kusamba, nkabela mukaintu ooyo wakali mubotu kapati. 3 Mpawo Devedi wakatuma muntu kuyoobuzya-buzya zyamukaintu ooyo. Mpoonya wakaambilwa kuti, “Ngu Batisyeba, mwana wa Eliyamu, muka Uliya Muhiti.” 4 Devedi wakatuma basikumwiitila, eelyo mukaintu ooyo wakaboola kulinguwe, mpoonya wakoona anguwe. Lino eeci nceciindi ncaakaba kabotu. Bamane wakapilukila kuŋanda yakwe. 5 Bweende-bweende wakamita, mpoonya wakatuma mulomo kuli Devedi wakuti ndibubi.
6 Devedi wakatumina mulomo kuli Jowabu kuti, “Nditumina Uliya Muhiti kuno.” Eelyo Jowabu wakatuma Uliya kuli Devedi. 7 Ciindi Uliya naakasika kulinguwe, Devedi wakabuzya mbuli Jowabu mbwaakali kupona, abantu boonse mbubakabede, ambuli nkondo mboyakali kweenda. 8 Mpoonya Devedi wakati kuli Uliya, “Koya kuŋanda yako, ukabone mutumbu wako.” Uliya wakazwa muŋanda yamwami. Mwami wakapa Uliya cipego. 9 Pele Uliya wakalala kumulyango waŋanda yamwami antoomwe ababelesi bamwami boonse, taakwe naakainka kuŋanda yakwe pe. 10 Nkabela ciindi Devedi naakaambilwa kuti, “Uliya taakwe naakainka kuŋanda yakwe.” Devedi wakati kuli Uliya, “Tee kayi wakeenda musinzo mulamfu? Ino nkaambo nzi ncotainki kuŋanda yako?”
11 Uliya wakati kuli Devedi, “Ibbokesi lyacizuminano ca Mwami Leza, bantu ba Isilayeli abantu ba Juda bali muzivuka, awalo simalelo wangu Jowabu abasinkondo bamwami boonse boona musokwe, ino inga ndainka buti kuŋanda yangu kuyoolya akuyoonywa akubona mutumbu wangu? Ndakonkezya kuti masimpe cintu eeci nsikonzyi kucicita pe.”
12 Mpawo Devedi wakati kuli Uliya, “Kocikkede okuno asunu, juunza nzookuleka uunke.” Aboobo Uliya wakakkala mu Jelusalemu mubuzuba oobo, abwakatobela. 13 Eelyo Devedi wakamwiita akulya anguwe akunywa kapati cakuti mane wakamukozya. Nkabela nikwakaba kumangolezya wakainka kuti akalale abulo bwakwe antoomwe ababelesi bamwami wakwe, pele taakwe naakainka kuŋanda yakwe.
14 Nibwakaca, Devedi wakalemba lugwalo kuli Jowabu walupa Uliya kuti atole. 15 Mulugwalo wakalemba kuti, “Bikka Uliya kumbele lyamundando mutaanzi ooko nkondo nkwiili nkali, eelyo mumulekelezye kutegwa bamuyase afwe.” 16 Nkabela Jowabu mbwaakasinkilizizye munzi, wakabikka Uliya kubusena oobo mbwaakazi kuti kuli basinkondo banguzu. 17 Nkabela basinkondo bamumunzi bakazwa akuzoolwana Jowabu, mpawo bamwi basinkondo ba Devedi bakajaigwa, a Uliya Muhiti wakajaigwa.
18 Eelyo Jowabu wakatuma sikwaambila Devedi makani aankondo oonse. 19 Alimwi wakalailila mutumwa kuti, “Waakumana kwaamba makani oonse aankondo kumwami, 20 naa mwami akanyeme akuti kulinduwe, ‘Nkaambo nzi nimwaakuvula afwiifwi amunzi? Sena taakwe nimwakazi kuti bayoofusa mivwi kuzwa abwaanda? 21 Nguni wakajaya Abimeleki mwanaa Jelubesyeti? Sena tamuzi kuti umwi mukaintu nguwakamujaya ku Tibezi naakamuwaala ziyo kuzwa abwaanda? Ino nkaambo nzi nimwaakuswena afwiifwi abwaanda?’ Mpoonya ukaambe kuti, ‘Mubelesi wako Uliya awalo wafwa.’”
22 Mpawo mutumwa wakainka, wakasika akwaambila Devedi zyoonse eezyo Jowabu nzyaakamutuma kuti azooambe. 23 Mutumwa wakati kuli Devedi, “Bantu bakali anguzu kwiinda ndiswe, aboobo bakasika ooko nkutwakabede musokwe, pele twakabatandila musule mane bakaakusika kumulyango mupati wamunzi. 24 Mpawo basimata bakali kufusa basinkondo bako mivwi kuzwa aabwaanda, bamwi babasinkondo bamwami bakafwa, awalo mubelesi wako Uliya Muhiti wakafwa.”
25 Eelyo Devedi wakati kumutumwa, “Mboobu mboti kaambe kuli Jowabu, ‘Aaya makani atakukatazyi pe, nkaambo nkondo tiisali, amuyume mukulwana munzi muunyonyoone. Ukamuyumye-yumye boobo.’”
26 Lino ciindi muka Uliya naakamvwa kuti mulumaakwe wafwa, wakamulila. 27 Dilwe nilyakamana, Devedi wakatuma akuyoomuleta kuŋanda yakwe, mpawo wakaba mukaintu wakwe. Nkabela wakazyala mwana mulombe. Pele cakacita Devedi cakabijila Mwami Leza.