1 Samuyele 15
Saulu mbwaatakaswiilila Mwami Leza
1 Lino Samuyele wakati kuli Saulu, “Ndime ngwaakatuma Mwami Leza kuti nzookunanike kuti ube mwami wabantu Baisilayeli. 2 Lino swiilila ncaamba Mwami Leza, Singuzuzyoonse ulati, ‘Ndiyoosubula Baameleki nkaambo bakakasya Baisilayeli ciindi nibakazwa ku Ijipiti kwiinda. 3 Koya ukalwane Baameleki, ukanyonyoone zyoonse nzyobajisi. Utakasiyi cintu nociba comwe, ukajaye boonse baalumi, bakaintu, bana, ŋombe, mbelele nkamela ambongolo.’”
4 Mpawo Saulu wakaita basilumamba bakwe, ku Telaimu wababala, basilumamba basikweenda aamaulu bali zyuulu zili myaanda yobilo a kkumi bakazwida kumusyobo wa Juda. 5 Saulu abasilumamba bakwe bakainka kumunzi wa Baameleki, wakabayubilila mumimpata. 6 Mpoonya Saulu wakacenjezya Bakeni wakati, “Amuzwe musiye Baameleki kuti ntamujayilizyi antoomwe ambabo. Nkaambo nywebo mwakabeda aaluse Baisilayeli ciindi nibakazwa ku Ijipiti.” Aawo Bakeni bakazwa.
7 Lino Saulu wakalwana Baameleki kuzwa ku Havila mane kusikila ku Syuu kujwe lya Ijipiti. 8 Saulu wakajata mwami Agagi wa Baameleki kalanga pele wakajaya bantu bakwe boonse. 9 Saulu abantu bakwe tiibakamujaya Agagi kubikkilizya mbelele, ŋombe, boombe baneneede, tubelele alimwi azimwi zyakali zibotu. Zimwi zyakasampukide bakazinyonyoona.
Saulu mbwaakakakwa a Mwami Leza
10 Lino Mwami Leza wakaambila Samuyele kuti, 11 “Ndausa kuti ndakacita Saulu kuti abe mwami, nkaambo wandifutatila, alimwi taatobela malailile aangu.” Lino Samuyele wakanyema kapati, masiku oonse aayo wakali kulilila Mwami Leza. 12 Nibwakaca cifumo-fumo wakainka kuyoobonana a Saulu. Pele wakaambilwa kuti Saulu waya ku Kameli, ooko nkwakaakulibumbila ciibalusyo, amane wakaindilila waya ku Giligali. 13 Ciindi Samuyele naakabonana a Saulu, Saulu wakamujuzya wati, “Mwami Leza akuleleke. Ndaatobela malailile aa Mwami Leza.”
14 Samuyele wakabuzya kuti, “Ino ŋombe ambelele nzyemvwide kulila nzyanzi?”
15 Saulu wakaingula kuti, “Basilumamba mbibazileta kuzwa ku Baameleki. Bakazisiila kuti kabapaizya ku Mwami Leza wabo, zimwi twakazinyonyweeda limwi.”
16 Mpoonya Samuyele wakalailila Saulu kuti, “Swiilila ndikwaambile eeco Mwami Leza ncaandaambila sunu masiku.” Saulu wakati, “Ndaambila.”
17 Samuyele wakati, “Nikuba kuti wakali kulitenga, sena ono nduwe silutwe wabantu bamisyobo yoonse ya Isilayeli? Mwami Leza wakakunanika kuti ube mwami wa Baisilayeli. 18 Lino Mwami Leza wakakutuma kuti ukanyonyweede limwi bantu babi baya Baameleki. Ubalwane kusikila bazimaane. 19 Ino nkaambo nzi ncootakaswiilila Mwami Leza? Nkaambo nzi ncookasaala zintu akucita cibi ku Mwami Leza?”
20 Mpawo Saulu wakaingula Samuyele kuti, “Peepe, ndakamuswiilila Mwami Leza, kayi ndakainka ooko mbubonya mbuli mbwaakandaambila, ndakajaya Baameleki boonse, ndaleta buyo mwami Agagi. 21 Pele basilumamba mbibakasaala mbelele aŋombe mbotu, mukuti kabapaizya ku Mwami Leza wako ku Giligali.”
22 Mpawo Samuyele wakati,
“Sena Mwami Leza ulabotelelwa muzipaizyo zyakutenta azituuzyo, kwiinda mbwabotelwa mukuswiilila ijwi lyakwe?
Bona, kuswiilila nkubotu kwiinda kupaizya, kumvwa nkubotu kwiinda kupaizya mafuta aabagutu.
23 Nkaambo buzangi buli mbuli cinyonyoono cakusonda, alimwi busicinguni cili mbuli bubi bwakukomba mizimo.
Lino nkaambo kakuti waakaka majwi aa Mwami Leza, mbubonya awalo wakukaka kuti kocili mwami.”
24 Saulu wakati kuli Samuyele, “Ndabisya, nkaambo ndasotoka mulawo wa Mwami Leza amalailile aako, nkaambo kakuti ndakayoowa bantu ndakacita ncobayanda. 25 Lino ndakukomba lekelela cinyonyoono cangu, wamana tubweede ayebo kutegwa nkakombe Mwami Leza.”
26 Pele Samuyele wakaingula Saulu kuti, “Nsikoobweeda ayebo pe, nkaambo kakuti wakaka majwi aa Mwami Leza, aboobo awalo wakukaka kuti koli mwami wa Isilayeli.”
27 Samuyele naakanyona kuti ainke, Saulu wakajata moombe wacisani cakwe, cakayauka. 28 Mpoonya Samuyele wakaambila Saulu kuti, “Awalo Mwami Leza wakuyawida bulelo bwa Isilayeli mubuzuba buno, wabupa kuli simunzinyoko, ooyo uuli kabotu kwiinda nduwe. 29 Mwami Leza uuli mbobulemu bwa Isilayeli takonzyi kubeja pe, nikuba kusandula muzeezo wakwe. Nkaambo kakuti tali muntu uukonzya kusandula muzeezo wakwe.”
30 Mpawo Saulu wakaingula kuti, “Ndabisya. Nikuba boobo akaka kondilemeka kumbele lyabapati babantu bangu, abantu boonse ba Isilayeli. Tubweede ayebo kutegwa nkakombe Mwami Leza wako.” 31 Lino Samuyele wakabweeda kusindikila Saulu, nkabela wakakomba Mwami Leza.
32 Mpoonya Samuyele wakati, “Ndiletela kuno mwami Agagi wa Baameleki, wakasika calumwemwe. Kayeeya kuti, Lufu lwainda.” 33 Pele Samuyele wakati,
“Mbubonya mbuli panga lyako mbulyakali kujaya bakaintu abana babo.
Lino abalo banyoko sunu balafwidwa mwana akati kabakaintunyina.”
Mpoonya Samuyele wakakosoola Agagi munsi aacipaililo ca Mwami Leza ku Giligali.
34 Amane Samuyele wakainka ku Lama, Saulu wakainka kumunzi wakwe ku Gibeya wa Saulu. 35 Kuzwa ciindi eeco Samuyele wakafwa aakufwa kabatabonani a Saulu nikuba kuti wakali kumulilila. Awalo Mwami Leza wakausa kuti wakacita Saulu kuti abe mwami wa Isilayeli.