1 Samuyele 14
Busicamba bwa Jonatani
1 Lino bumwi buzuba Jonatani wakaambila mukubusi wakali kumubwezela zilwanyo kuti, “Koza, atweende kuzivuka zyabasilumamba ba Bafilisiti.” Pele Jonatani taakamwaambilide wisi. 2 Saulu wakali kukkala munsi amusamu wamapomegileneti ku Migiloni, tiikwakali kule kuzwa ku Gibeya. Nkabela baalumi mbaakali aabo bakatisike kumyaanda iili cisambomwe, 3 akati kabo kwakali mupaizi Ahija wakali kusama kabaki kabupaizi kategwa efodi, mwana wa Ahitubi munyina Ikabodi, mwanaa Fineyasi, mwana wa Eli, wakali mupaizi wa Leza ku Syilo. Lino bantu taakwe nibakazi kuti Jonatani wakainka pe.
4 Munzila eeyo Jonatani njaakatola ciindi naakazubuka kuya kuzivuka zya Bafilisiti kwakali mandomba obilo, lyomwe lyakali kubbazu lyalulyo, limwi lyakali kubbazu lyalumwensi. Limwi lyakali kwiitwa kuti Bozezi. Limwi lyakali kwiitwa kuti Sene. 5 Lyomwe lyakali kubbazu lyakumbo lyanzila, kalilangide ku Mikimasyi, limwi lyakali kujwe lyanzila, lyalo lyakalangide ku Geba.
6 Mpoonya Jonatani wakaambila mukubusi ooyo, wakali kubweza zilwanyo zyakwe kuti, “Koza, atweende, tuunke mutala liya kuzivuka zyababaya batapalwidwe. Ambweni inga Mwami Leza ulatugwasya. Kunyina cinga cakasya kuti atuzundye, nibavula nibaceya buti.”
7 Mpoonya mukubusi ooyo wakali kubweza zilwanyo zyakwe wakaingula kuti, “Kocita buyo kufumbwa mboyeeya, bona ambebo ndili ayebo.”
8 Jonatani wakati, “Ncibotu, atweende, tuzubuke kutegwa baalumi aabo batubone. 9 Kuti naa batwaambile kuti, ‘Amulindile mane tusike ooko nkomubede,’ tuyooima awo mpoonya mpotutinoobede. 10 Pele kuti naa batwaambila kuti, tuunke kulimbabo tukainke, nkaambo eeco nceciyooba citondezyo cakuti Mwami Leza watuzundya.”
11 Eelyo bakalibonya ku Bafilisiti, balo bakati, “Amubone, Bahibulu batalika kuzwa mumena mubayubide.” 12 Mpoonya basilumamba ba Bafilisiti bakaita Jonatani asikumubwezela zilwanyo zyakwe bakati, “Kamuza muzoolibonene.”
Lino Jonatani wakaambila mukubusi ooyo wakabwezele zilwanyo zyakwe kuti, “Nditobele. Nkaambo Mwami Leza wabaaba ku Baisilayeli.”
13 Mpoonya Jonatani wakatanta cakukalaba kabelesya maanza amaulu, asikumubwezela zilwanyo wakamutobela. Lino Jonatani wakalwana Bafilisiti akubauma kabawa, mukubusi ooyo wakali sikumubwezela zilwanyo wakali kubasaulula. 14 Ciindi eeci Jonatani asikumubwezela zilwanyo bakajaya baalumi bakatisike kumakumi obilo mubusena buli mbuli bbanga lyalimwa lyomwe. 15 Nkabela Bafilisiti boonse aabo bakali musokwe bakayoowa kapati, kubikkilizya ampi zyabo. Nyika yakazungaana, nkaako kwakali kunyongana.
Kuzundwa kwa Bafilisiti
16 Lino balindizi ba Saulu ku Gibeya wa Benjamini, bakabona basinkondo ba Bafilisiti kabatija cakunyongana. 17 Saulu wakaambila bantu bakwe kuti, “Amubungane, tubone naa nguni uutawo.” Nkabela nibakabungana, bakajana kuti Jonatani asikumubwezela zilwanyo tiibakaliwo pe. 18 Mpoonya Saulu wakati kuli Ahija mupaizi, “Leta bbokesi lya cizuminano ca Leza.” Nkaambo ciindi eeco bbokesi lyakali aa Baisilayeli. 19 Saulu kacaambaula amupaizi akwalo kunyongana kuzivuka zya Bafilisiti kwakaindila, mpoonya Saulu wakati kulinguwe, “Leka buyo.” 20 Eelyo Saulu abantu boonse mbaakali aabo bakanyamuka akuya kukulwana. Bakajana balinyongene kapati cakuti bakali kuyasana muli cabo. 21 Nkabela aabo Bahibulu bakali kubbazu lya Bafilisiti, bakalipatula alimwi banjila nkamu ya Saulu a Jonatani. 22 Baisilayeli bakayubide munyika ya mutulundu-lundu ya Efulemu bakamvwa kuti Bafilisiti batija, mpoonya abalo bakayubunuka akugwasya Baisilayelinyina. 23 Mbombuboobu Mwami Leza mbwaakavuna Baisilayeli mubuzuba oobo. Nkabela nkondo yakainda moonse mu Betaveni.
Jonatani mbwaakatyola mulawo wa Saulu
24 Lino buzuba oobo Baisilayeli zyakabamana nguzu alimwi bakafwa nzala kapati, nkaambo Saulu wakakonkezya kuti, “Asinganyizigwe ooyo uutilye sunu nketanazunda basinkondoma.” Aboobo buzuba oobo ncobeni taakwe wakalya nokaceya. 25 Lino basinkondo boonse bakanjila mucisaka, nkabela kwakali buci ansi. 26 Lino bantu nibakanjila mucisaka, bwakali kungwenga nikuba boobo taakwe naba omwe wakalya buci oobo pe, nkaambo bantu boonse bakali kuyoowa cikonke ca Saulu. 27 Pele Jonatani taakwe naakamumvwa wisi kalailila basilumamba, aboobo wakayasa cimbulu cabuci walya. Mpoonya ameso agweemuka, walimvwa kabotu. 28 Mpoonya aawo umwi wabasilumamba aabo wakati, “Toonse tulifwide nzala, pele uso wakonkezya kuti, ‘Asinganyizigwe ooyo uutilye sunu.’ Ncenciceeco balilengukide.”
29 Mpoonya Jonatani wakati, “Taata wakatazya bantu besu. Amubone mebo ameso andigweemuka akaambo katuci ootu ntundalabila. 30 Nicabota kapati bantu nibalya zyazeezyo nzibanyanga basinkondonyina. Nkaambo nikwali boobo nitwajaya Bafilisiti banji.”
31 Buzuba oobo Baisilayeli bakali kuya bujaya Bafilisiti kuzwa ku Mikimasyi mane kuyoosika ku Aijaloni. Lino bakakatala. 32 Mpoonya bakavuumukila zeezyo nzibakasaala kuzwa kuli basinkondonyina, bakabweza mbelele, basune, aboombe, bakazijaya abusena mpoonya awo, bakali kulya nyama antoomwe abulowa. 33 Lino bakaambila Saulu kuti, “Bona! Bantu babisizya Mwami Leza, mukuti balya nyama iijisi bulowa.” Saulu wakati, “Mwabisya. Amukunkulisye bbwe pati okuno.” 34 Saulu wakalailila kuti, “Kamuya akati kabantu, mubaambile boonse kuti balete basune ambelele zyabo kuno. Baleelede kuzijaya akuzilya kuno nkukonya. Batabisizyi Mwami Leza mukulya nyama iijisi bulowa.” Masiku aayo ngoonya omwe omwe wabo wakaleta musune akumujaya ooko nkukonya. 35 Saulu wakayakila Mwami Leza cipaililo, eeco cakali nciindi cakusaanguna ncaakacita boobo.
36 Lino Saulu wakabaambila kuti, “Atuselele, tukalwane Bafilisiti masiku, tukabasaale mane do kubucedo tukabajaye boonse.”
Bantu bakaingula kuti, “Cita kufumbwa ncoyeeya kuti ncibotu.” Pele mupaizi wakati, “Atusaangune kubuzya Leza.”
37 Mpoonya Saulu wakabuzya Leza kuti, “Sena nkabalwane Bafilisiti? Sena uyootuzundya?” Mwami Leza taakwe naakaingula buzuba oobo pe. 38 Eelyo Saulu wakati kuli basilutwe babasilumamba bakwe, “Kamuza kuno tuvuntauzye naa cinyonyoono cacitwa. 39 Mbubuli Mwami Leza uufutula Baisilayeli mbwali muumi kuti naa kujanwe kuti ngu Jonatani mwanaangu ngulaamulandu, ncobeni ulafwa.” Aawo taakwe naba omwe wakaamba ijwi. 40 Mpoonya Saulu wakaambila basilumamba kuti, “Nywebo nyoonse amwiimine kuya, mebo a Jonatani mwanaangu tulaimina waano.”
Mpoonya bantu bakaingula kuti, “Kocita kufumbwa ncoyeeya kuti ncibotu.”
41 Lino Saulu wakakomba ku Mwami Leza wa Isilayeli, “O Mwami Leza, ino nkaambo nzi nootandiingula sunu? O Mwami Leza wa Isilayeli, ndiingula kwiindila mu Ulimu a Tumimu. Kuti naa cinyonyoono cacitwa amwanaangu Jonatani naa ndime wiingule a Ulimu, pele kuti naa cacitwa abantu bako Baisilayeli, wiingule a Tumimu.” Lino Jonatani a Saulu cakabawida, bantu tiibakawidwa. 42 Mpoonya Saulu wakati, “Amuume cisolo akati kesu tobilo, mebo a Jonatani mwanaangu.” Mpoonya Jonatani cakamuwida. 43 Saulu wakabuzya Jonatani kuti, “Ndaambila ncinzi ncoocita?”
Jonatani wakamwaambila kuti, “Ndalabila tuci kumpela lyakasako kangu. Sena ono mfwe?”
44 Saulu wakati kulinguwe, “Mwami Leza andisubule nikuba kundijaya kuti naa yebo utafwi!”
45 Basilumamba bakati kuli Saulu, “Sena ono Jonatani afwe, ooyu waleta luzundo luli boobu ku Isilayeli? Peepe. Mbubuli Mwami Leza mbwali muumi taakwe anokaba kasusu kakwe katiwide ansi. Eeci ncaacita sunu cacitwa alugwasyo lwa Leza.” Mbombuboobu bantu mbobakavuna Jonatani kuti atajaigwi.
46 Mpoonya Saulu wakaleka kutandaanya Bafilisiti, abalo bakapiluka kucisi cabo.
Kulela kwa Saulu amukwasyi wakwe
47 Musule Saulu naakaba mwami wa Isilayeli wakatalika kulwana basinkondonyina boonse mumasena oonse, wakalwana Bamowabu, Baamoni. Baedomu, abamami baku Zoba, alimwi a Bafilisiti. Kufumbwa ooko nkwaakainka kuyoolwana wakali kubazunda. 48 Wakalwana canguzu akuzunda Baameleki. Wakavuna Baisilayeli kuzwa kuli boonse bakali kubasaala.
49 Bana balombe ba Saulu bakali ba: Jonatani, Isyivi, a Malikisyuwa. Musimbi wakusaanguna wakali Melabu muniini wakali Mikalo. 50 Mukaintu wa Saulu wakali Ahinowamu, mwanaa wa Ahimaazi, Silutwe wabasilumamba bakwe wakali Abina mwanaa Nee wisi umwi Saulu. 51 Wisi Saulu wakali Kisyi, wisi Abina wakali Nee, bakali bana ba Abiyeli.
52 Mumazuba oonse aabuumi bwakwe Saulu wakali kulwana Bafilisiti canguzu. Lyoonse wanoonga kufumbwa ajana mwaalumi Muisilayeli singuzu sicamba, Saulu wakali kumutola akumubikka muli basinkondo bakwe.