1 Makani 15
Mbubakalibambila kugwisya bbokesi lyacizuminano
1 Lino Devedi naakamana kuliyakila maanda mu Jelusalemu. Wakabamba busena bwakubikkila bbokesi lyacizuminano aawo mpaakalisimpila tente. 2 Amane wakati, “Taakwe uumbi kunze lya Balevi weelede kubweza bbokesi lyacizuminano pe, nkaambo Mwami Leza nguwakabasala kuti kababweza bbokesi lyakwe akumukutaukila lyoonse.” 3 Aawo Devedi wakabunganya bantu boonse bamu Jelusalemu kuti bakalete bbokesi lyacizuminano kubusena mbwaakabaambila. 4 Azwe waawo wakaita balunyungu lwa Aloni a Balevi bamwi. 5 Kuzwa kulunyungu lwa Kohati kwakali Uliyeli musololi wabali mwaanda amakumi obilo. 6 Kuzwa kulunyungu lwa Melali kwakali Asayiya musololi wabali myaanda yobilo amakumi obilo. 7 Kuzwa kulunyungu lwa Gesyoni kwakali Joweli musololi wabali mwaanda amakumi otatwe. 8 Kuzwa kulunyungu lwa Elizafani kwakali Syemaiya musololi wabali myaanda yobilo. 9 Kuzwa kulunyungu lwa Hebuloni kwakali Eliyeli musololi wabali makumi aali lusele. 10 Kuzwa kulunyungu lwa Uziyeli kwakali Aminadabu musololi wabali mwaanda akkumi ababili. 11 Mpawo Devedi wakaita Zadoki a Abiyata bapaizi, alimwi a Balevi bamwi bali cisambomwe ba Uliyeli, Asayiya, Joweli, Syemaiya, Eliyeli a Abinadabu. 12 Wakabaambila kuti, “Ndinywe basololi bamikwasyi ya Balevi. Nywebo a Balevinyoko mulisalazye lwanu nobeni kuti mukalete bbokesi lya Mwami Leza wa Isilayeli kuzoolibikka mubusena mbundakalibambila. 13 Amubone nkumwatakaliko kusaanguna Mwami Leza wakatunyemena, mukuti tiitwakatobela ciyanza cambolinyamunwa.”
14 Aboobo bapaizi a Balevi bakalisalazya kuti bakalete bbokesi lya Mwami Leza wa Isilayeli. 15 Balevi bakalibweza atukulisyo amakuko mbubonya mbuli Mozesi mbwaakalailila kweendelana a majwi aa Mwami Leza.
16 Lino Devedi wakalailila basololi ba Balevi kuti basale bamwi babo kuti kabaimba nyimbo cakutangala kabalizya tulumbu, tuntimbwa, ansakalala. 17 Kuzwa kubaimbi Balevi bakasala bantu aaba, Hemani mwanaa Joweli a Asafu mwanaa Belekiya siluzubonyina. Kuzwa kuciinga ca Melali bakasala Etani mwanaa Kusyaiya. 18 Kubagwasya bakasala Balevi aaba bakazi kulizya tuntimbwa tulilisya: Zekaliya, Jaaziyeli, Syemilamoti, Jehiyeli, Uni, Eliyabu, Benaiya, Maaseiya, Matitiya, Elifelehu, Mikineiya, Obediedomu a Jeiyeli aaba kumwi bakali balindizi bamilyango. 19 Baimbi bakali ba: Hemani, Asafu, a Etani kumwi mbibakali kulizya nsakalala zyamukuba, 20 Zekaliya, Aziyeli, Syemilamoti, Jehiyeli, Uni, Eliyabu, Maaseiya a Benaiya, mbibakali kulizya tulumbu tulilisya. 21 Matitiya, Elifelehu, Mikineiya, Obediedomu, Jeiyeli a Azaziya mbibakali kulizya tuntimbwa tulendema. 22 Kenaniya silutwe wa Balevi nobaimba nyimbo nguwakali kubasolweda nkaambo wakali cibwene kapati. 23 Belekiya a Elikana bakasalwa kuba balindizi ba bbokesi lyacizuminano. 24 Syebaniya, Josyafati, Netaneli, Amasayi, Zekaliya, Benaiya a Eliyezaa bapaizi mbibakali kusiba myeembo kumbele lyabbokesi lya Leza. Obediedomu a Jehiya abalo bakeelede kuba balindizi babbokesi lyacizuminano.
Bbokesi lyacizuminano mbulyakatolwa ku Jelusalemu
25 Lino Devedi abapati ba Baisilayeli, abalailili babasilumamba bali cuulu bakainka kuyooleta bbokesi lyacizuminano ca Mwami Leza kuzwa kuŋanda ya Obediedomu kumwi kabatangala. 26 Bakapaizya bapoho bali ciloba ambelele zili ciloba mukuti Leza agwasye Balevi aabo bakalibweza. 27 Aawo Devedi wakasamide jansi lyandeketela mbubonya mbuli Balevi bakayumuna bbokesi abaimbi alimwi a Kenaniya wakali kubaimbya. Devedi kumwi wakasamide kabaki kabupaizi kategwa efodi. 28 Mbombubo oobu Baisilayeli boonse mbubakaleta bbokesi lyacizuminano ca Mwami Leza ku Jelusalemu, kabaulubuzya kabasiba nyeele, myeembo akuuma nsakalala, tulumbu atuntimbwa.
29 Lino bbokesi kalinjizigwa mumunzi, Mikalo mwanaa Saulu wakasondela ampulungwido. Naakabona mwami Devedi kazyana mukulemeka Mwami Leza, wakamusampaula mumoyo wakwe.