1 Makani 14

Milimo ya Devedi mu Jelusalemu

¹ Lino mwami Hilamu waku Taya wakatuma batumwa bakwe kuli Devedi. Wakamutumina masamu aamulombe abasikuyasya mabwe ababezi kuyoomuyakila ŋanda mpati yabwami. ² Devedi wakaziba kuti Mwami Leza nguwakkazika bwami bwakwe mu Isilayeli, akuti Leza wabusumpula bwami bwakwe akaambo kabantu bakwe Baisilayeli. ³ Mu Jelusalemu Devedi wakakwata abambi bakaintu eelyo wakazyala bana banji balombe abasimbi. ⁴ Ngaaya mazina aabana mbaakazyalila kooko: Syamuwa, Syobabu, Natani, Solomoni, ⁵ Ibaa, Elisyuwa, Elipeleti, ⁶ Noga, Nefegi, Jafiya, ⁷ Elisyama, Beeliyada, a Elifeleti.

Kuzundwa kwa Bafilisiti

⁸ Ciindi Bafilisiti nibakamvwa kuti Devedi nguwakananikwa kuba mwami wa Baisilayeli boonse, kwakaza mpi iilibambilide kuzoomulangaula. Pele Devedi wakamvwa, aboobo wakainka kuyoobalwana. ⁹ Bafilisiti bakasika akusaala kkuti lya Lefaimu. ¹⁰ Nkaako Devedi wakabuzya Mwami Leza kuti, “Sena nkabalwane Bafilisiti? Sena ulabaaba kulindime?” Mwami Leza wakati, “Ii, koya, nkaambo ncobeni ndabaaba Bafilisiti kulinduwe.” ¹¹ Lino Devedi abasilumamba bakwe bakaakubalwana ku Baalipelazimu akubazunda. Eelyo Devedi wakati, “Mbubonya mbuli bupola maanzi, Leza woola basinkondoma kwiindila mulindime.” Aboobo busena oobo bwakaitwa kuti Baalipelazimu. ¹² Ooko Bafilisiti nibakatija bakasiya mituni yabo, Devedi wakalailila kuti itentwe.

¹³ Alimwi Bafilisiti bakaboola kuzoosaala kkuti eelyo. ¹⁴ Ciindi Devedi nakabuzya Mwami Leza wakaambilwa kuti, “Utabagami, pele koya ukabazwide kusule, ukabavumpe cakubasyaanikizya kumangwabale. ¹⁵ Lino waakumvwa misindo yakweenda atala aazisamu, ukabalwane nkaambo eeci cintondezya cakuti ndakusolweda kale kuyoozunda Bafilisiti.” ¹⁶ Aboobo Devedi wakacita mbuli mbwaakalaililwa a Mwami Leza. Bakali kujaya Bafilisiti kuzwida ku Gibeyoni kuyoosika ku Geza. ¹⁷ Mbombubo oobo Devedi mbwaakaduma mumanyika oonse. Aawo Mwami Leza wakacita kuti Devedi ayoowegwe amisyobo yoonse.