1 Makani 13

Bbokesi lyacizuminano mbulyakagwisigwa kuzwa ku Kiliyatijeyalimu

¹ Lino Devedi wakabuzya-buzya umwi aumwi wabalupati-pati bakwe, kubalailili babali zyuulu, ababali myaanda. ² Naakamana kwaambila Baisilayeli boonse wakati, “Kuti naa mwazumina, alimwi kuti naa Mwami Leza wesu kayanda tutumye makani akuli bamwi besu mumanyika oonse aa Baisilayeli abapaizi a Balevi bali muminzi yabo iijisi macelelo, tuzoobe aamwi ambabo. ³ Twamana tuzooinke kuyooleta bbokesi lya Leza wesu nkaambo tiitwakali kulilanganya ciindi Saulu naakali mwami.” ⁴ Boonse bakacizumina eeci nkaambo cakababotela.

⁵ Mbombuboobu Devedi mbwaakabunganya Baisilayeli boonse kuzwida kumulonga wa Syiho ku Ijipiti kuyoosika kumweenya wa Hamati kuti bakalete bbokesi lya Leza kuzwa ku Kiliyatijeyalimu. ⁶ Aawo Devedi a Baisilayeli boonse bakainka ku Baala waku Juda uuli ngo Kiliyatijeyalimu. Bakaakuleta bbokesi lya Mwami Leza uuli ngo Mwami. Ngonguwe uukkede akati kabakelibu abbokesi liitwa zina lyakwe. ⁷ Bakagwisya bbokesi lya Leza muŋanda ya Abinadabu balibikka mucikwiliba cipya. Uza a Ahiyo mbibakali kulyeenzya. ⁸ Devedi lwakwe a Baisilayeli boonse bakali kutangala anguzu zyabo zyoonse kumbele lya Leza. Bakali kwiimba nyimbo zyatuntimbwa, tulumbu, nsakalala amyeembo.

⁹ Lino nibakasika kucuumino caku Kidoni basune bakalitenkaanya, aawo Uza wakalijatilila. ¹⁰ Mpawo bukali bwa Mwami Leza bwakabukila Uza wakamujaya nkaambo wakajatilila bbokesi. Mbombuboobu Uza mbwaakafwa kumbele lya Leza. ¹¹ Aawo Devedi wakabijilwa kapati nkaambo Mwami Leza wakajaya Uza. Ncenciceeco busena oobo asunu ncobutegwa Peleziuza.

¹² Lino akaambo kakuyoowa Leza, Devedi wakati, “Ino mbubuti mbwenga ndalitola bbokesi lya Leza eeli?” ¹³ Nkaako Devedi taakalitola kumunzi wakwe. Wakalitola kuŋanda ya Obediedomu Mugiti. ¹⁴ Bbokesi eelyo lyakakkala muŋanda ya Obediedomu kwamyezi yotatwe, eelyo Mwami Leza wakaleleka mukwasyi wa Obediedomu azintu zyoonse nzyaakajisi.