Zekaliya 6

Cilengaano cankalaki zyone

¹ Ndakalanga mujulu alimwi, ndakabona nkalaki zyone kumbele lyangu kazizwida akati kazilundu zyobilo, zyakali zilundu zyamukuba! ² Nkalaki yakusaanguna yakajisi mabbiza aasalala, yabili akali kusiya, ³ yatatu akali kutuba, yane akali aamabala-mabala, oonse akali aanguzu. ⁴ Ndakabuzya mungelo ooyu ngundakali kukanana aawe kuti, “Ino ninzi eezi, osimalelo wangu?”

⁵ Mungelo wakandiingula kuti, “Eeyi myuuya yone yakujulu, yawa kumbele lya Mwami Leza wanyika yoonse.” ⁶ Uulya uuli ankalaki iijisi mabbiza aasiya uya kunyika yakunyika, uuli ankalaki iili aamabbiza aatuba uya kumbo, uuli amabbiza aamabala-mabala uya kunyika yakumusanza.

⁷ Lino mabbiza aanguzu naakainka akali kuyanda kuunka munyika yoonse. Mpawo wakati, “Kamuya munyika yoonse!” Nkaako akainka munyika yoonse.

⁸ Mpawo wakandiita wakati, “Langa aalya aainka kunyika iili kunyika apa Muuya wangu kuti nyika iili kunyika ibe aaluumuno.”

Musini wakalaililwa Josyuwa

⁹ Mpoonya majwi aa Mwami Leza akandisikila aakuti, ¹⁰ “Bweza nsiliva angolida zyakaleta baange ba Helidayi, Tobija a Jedaiya, aabo bakaboola kuzwa ku Babuloni. Uunke ndilyonya sunu kuŋanda ya Josiya mwanaa Zefaniya. ¹¹ Bweza nsiliva angolida, panga musini, wamana uusamike Josyuwa mupaizi mupati mwanaa Jehozadaki. ¹² Ambila mupaizi kuti mboobu mbwaamba Mwami Leza Singuzuzyoonse ulati, ‘Ngooyu muntu wiitwa kuti Mutabi, uyoozanduka kuzwa mubusena bwakwe kuti akayake ŋanda ya Mwami Leza.’ ¹³ Ngonguwe uuyooyaka ŋanda ya Mwami Leza, uyoosamikwa zyabulemu, nkabela uyookkala akulela acuuno cakwe cabwami. Mupaizi unooli munsi aacuuno cakwe cabwami. Nkabela banoomvwana aaba bobilo. ¹⁴ Musini uyoopegwa kuli Helidayi, Tobija, Jedaiya a Heni mwanaa Zefaniya kuti cibe ciibalusyo muŋanda ya Mwami Leza. ¹⁵ Aabo bali kulaale bayooboola kuti bazoogwasye kuyaka ŋanda ya Mwami Leza, ndendilyo nomuyooziba kuti Mwami Leza Singuzuzyoonse nguwakandituma. Eeci ciyoocitika kuti naa mumuswiilile Mwami Leza wanu cabunkutwe.”