Zekaliya 5

Cilengaano cakabbuku kauluka

¹ Alimwi ndakalanga, ndakabona kabbuku kauluka kumbele lyangu. ² Wakandibuzya kuti, “Ino ubwene nzi?” Ndakaingula kuti, “Ndibwene kabbuku kauluka kalampa tukokola tuli makumi obilo atukokola tuli kkumi mubwamba.”

³ Wakati kulindime, “Eciya ndusinganyo luunka munyika yoonse, nkaambo mbokulembedwe kubbazu limwi kulati, kufumbwa mubbi uyootandwa, kubbazu limwi kulembedwe kuti kufumbwa uukonka cakubeja uyootandwa. ⁴ Mwami Leza Singuzuzyoonse ulati, ‘Njoolutuma, nkabela luyoonjila muŋanda yamubbi amuŋanda yaukonka cakubeja muzina lyangu. Luyookkala muŋanda yakwe oomo kwiinyonyoona, mapulanga oonse amabwe aayo.’”

Cilengaano camukaintu wakali mucinzuma

⁵ Mpawo mungelo ooyo ngundakali kukanana aawe wakaboola kumbele akuzooti kulindime, “Langa mujulu ubone naa ncinzi ciya cilibonya.”

⁶ Ndakabuzya kuti, “Ino ncinzi?” Wakaingula kuti, “Ncinzuma cakupimya.” Wakaindilizya akuti, “Eeci ncinyonyoono cabantu munyika yoonse.”

⁷ Mpawo civunisyo calubulo cakavununwa, nkabela mucinzuma mwakakkede mukaintu! ⁸ Wakati, “Oobu mbubi!” Amane wakamutonkela mucinzuma alimwi, amane wakavunika civunisyo calubulo alincico. ⁹ Mpawo ndakalanga, lino ndakabona bakaintu bobilo kumbele lyangu kabauluka amababa aanguzu kuza kulindime! Bakajisi mababa aali mbuli aatongola, bakabweza cinzuma eeco bacitola mujulu akati kati kajulu anyika.

¹⁰ “Ino cinzuma ciya bacitola kuli?” Mbundakabuzya mungelo ooyo ngundakali kukanana aawe?

¹¹ Wakaingula kuti, “Bacitola kucisi ca Babuloni kuti bakaciyakile ŋanda. Yamana kuyakwa, cinzuma ciyookkala ooko mubusena bwaco.”