Zekaliya 4

Cilengaano cacikkazikilo calambe

¹ Mpoonya mungelo ooyo ngundakali kwaambaula aawe wakaboola kuzoondibusya, mbubonya mbuli businsimuka woona. ² Wakandibuzya kuti, “Ubwene nzi?”

Ndakaingula kuti, “Ndibwene cikkalilo calambe cangolida cijisi citililo camafuta ajulu, alimwi cilijisi malambe aali ciloba mulincico, kuli atubunda tuli ciloba twamalambe. ³ Alimwi kuli misamu yaoliva yobilo kumbali aaco, umwi kubbazu lyalulyo lwacitililo akulumwensi lwaco.”

⁴ Ndakabuzya mungelo ngundakali kwaambaula aawe kuti, “Ino nzinzi eezi osimalelo aangu?”

⁵ Wakaingula kuti, “Sena tozizi eezi kuti ninzi?” Ndakaingula kuti, “Peepe nsizizi osimalelo wangu.” ⁶ Mpawo wakati kulindime, “Ngaaya majwi Mwami Leza ngaambila Zelubbabeli ulati, ‘Uyoozunda kutali kunsana nomuba munguzu pe, pele kwiindila mu Muuya wangu.’ ⁷ Ino nduweni ocilundu ciyumu? Uyooolwa kumbele lya Zelubbabeli akubambasikwa. Eelyo bbwe lyakucooko noliyoosimpwa, aawo bantu bakapozomoke bakati, ‘Leza aleleke! Leza aleleke! Cabota! Cabota!’”

⁸ Majwi aa Mwami Leza akandisikila akuti, ⁹ “Zelubbabeli nguwakasya ntalisyo yaŋanda ya Leza eeyi, alimwi nguwenya nguuyooimanizya. Ndendilyo nomuyooziba kuti Mwami Leza Singuzuzyoonse nguwakandituma. ¹⁰ Nguni uusampaula buzuba bwazintu zisyoonto? Bantu bayoosekelela baakubona cipimyo mujanza lya Zelubbabeli. Eezi zili ciloba mmeso aa Mwami Leza aalanga munyika yoonse.”

¹¹ Mpawo ndakabuzya mungelo kuti, “Misamu yobilo yaoliva iimvwi kululyo akulumwensi lwacikkazikilo calambe eeci njanzi?” ¹² Ndakamubuzya alimwi kuti, “Ino njanzi eeyi mitabi yobilo yaoliva iili kumbali lyatupulo tobilo twangolida tugwisya mafuta aali mbuli ngolida?”

¹³ Wakandiingula kuti, “Sena ulizizi eezi kuti ninzi?”

Ndakati, “Peepe osimalelo wangu.”

¹⁴ Nkaako wakati, “Aaba mbabaabo bobilo bananikidwe kuti babelekele Mwami Leza munyika yoonse.”