Zekaliya 3

Cilengaano cabantu ncibakabona mupaizi mupati

¹ Mpoonya wakanditondezya Josyuwa mupaizi mupati wakaimvwi kumbele lyamungelo wa Mwami Leza, a Saatani kaimvwi kubbazu lyalulyo lwakwe kuti amutamikizye. ² Mungelo wa Mwami Leza wakati kuli Saatani, “Mwami Leza aakusubule O Saatani! Mwami Leza wakasala Jelusalemu, aakusubule! Sena muntu ooyu tali cisisi ciyaka casikkulwa mumulilo?”

³ Lino Josyuwa wakasamide zisani zyatombe ciindi naakaimvwi kumbele lyamungelo. ⁴ Mungelo ooyo wakati kulibaabo bakaimvwi kumbele lyakwe, “Amumusamunune zisani zyatombe.”

Mpawo wakati kuli Josyuwa, “Bona ndagwisya cinyonyoono cako, ndakusamika zisani zidula zyeebeka.”

⁵ Aawo ndakati, “Amumusamike cingundu cisalala cibotu.” Mpawo bakamusamika cingundu cisalala cibotu kumutwe akumusamika zisani, mungelo walo wa Mwami Leza wakaliimvwi kumbali.

⁶ Lino mungelo wa Mwami Leza wakalailila Josyuwa kuti, ⁷ Mboobu mbwaamba Mwami Leza Singuzuzyoonse ulati, “Kuti naa kotobela nzila zyangu akucita nzendikwaambila, uyookonzya kweendelezya ŋanda yangu akubamba mabuwa aaŋanda yangu, ambebo nenjookukkazika akati kabaaba baimvwi waawa.

⁸ “Lino swiilila Josyuwa omupaizi mupati, antoomwe abeenzinyoko aaba bakkede kumbele lyako, bali ncitondezyo cazintu ziyoocitika. Ndiyooleta mubelesi wangu zina uuitwa kuti ngu mutabi. ⁹ Bona bbwe eelyo ndindaimika kumbele lya Josyuwa! Bbwe lyomwe eeli lilijisi meso aali ciloba, nkabela njoolemba malembo alindilyo, mbwaamba Mwami Leza Singuzuzyoonse, eelyo njoogwisya zinyonyoono zyanyika eeyi mubuzuba bomwe.

¹⁰ “Mubuzuba oobo umwi aumwi wanu uyootamba mweenzinyina kuti azookkale munsi aamusaansa amukuyu wakwe, mbwaamba Mwami Leza Singuzuzyoonse.”