Zekaliya 2

Cilengaano calutambo lwakupimya

¹ Mpawo ndakalanga, eelyo ndakabona muntu kumbele lyangu wakajisi lutambo lwakupimya mujanza lyakwe! ² Ndakabuzya kuti, “Ino uya kuli?” Wakandiingula kuti, “Ndiya kukweeleka Jelusalemu, ndizibe naa ulampa buti mubwamba amubulamfu bwawo.”

³ Mpoonya mungelo ooyo ngundakali kukanana aawe wakainka, eelyo kwakaboola mungelo uumbi kuzoomucingauzya, ⁴ wakati kulinguwe, “Zuzaana ambila mukubusi uulya kuti, ‘Jelusalemu unooli munzi uutakwe bwaanda akaambo kakuvula kwabantu azivubwa mulinguwo. ⁵ Mebo lwangu ndiyooba lukwakwa lwamulilo kuuzinguluka,’ mbwaamba Mwami Leza, alimwi ndiyooba bulemu bwawo mulinguwo.”

⁶ “Ee buya! Ee buya! Amutije muzwe munyika yakunyika, mbwaamba Mwami Leza, nkaambo ndamumwaila kumyuuwo yone yakujulu. Mbwaamba Mwami Leza.

⁷ “Amutije nobamu Ziyoni! Amutije nomukkala mumunzi wa Babuloni! ⁸ Kayi mboobu mbwaamba Mwami Leza Singuzuzyoonse ulati, ‘Lino naakamana kundilemeka akundituma kuyoolwana misyobo eeyo yakamusaala, nkaambo kufumbwa ooyo uumulwana ulwana nceyandisisya. ⁹ Kasimpe mebo ndiyoobalwana cakuti bazike babo bayoobasaala. Ndendilyo nomuyooziba kuti Mwami Leza Singuzuzyoonse nguwakandituma.’

¹⁰ “Koongolola, utangale omunzi wa Ziyoni. Ndilaboola ndizookkale akati kako, mbwaamba Mwami Leza. ¹¹ Misyobo minji iyooboola ku Mwami Leza mubuzuba oobo, nkabela bayooba bantu bangu. Ndizookkala akati kanu, ndendilyo nomuzooziba kuti Mwami Leza Singuzuzyoonse nguwakandituma. ¹² Mwami Leza uyookona cisi ca Juda mbuli caabilo calukono lwakwe munyika iisalala, uyoosalala munzi wa Jelusalemu alimwi. ¹³ Amuumune kumbele lya Mwami Leza nobantu baansi nyoonse, nkaambo wanyamuka abusena bwakwe busalala.”