Zekaliya 13

¹ “Mubuzuba oobo musyobo wa Devedi abantu bakkala mu Jelusalemu bayoojalwidwa kasensa kuti bakasalazigwe kuzwa kuzinyonyoono akubusofwaazi bwabo. ² Mubuzuba oobo, njoozimaanya mazina aamituni yabo kuzwa munyika, taikayeeyegwi limbi, mbwaamba Mwami Leza Singuzuzyoonse. Joolesya businsimi amuuya wabusofwaazi munyika. ³ Kuti naa umwi kaciyoosinsima, wisi abanyina, bakamuzyala bayooti kulinguwe, ‘Weelede kufwa, nkaambo waamba zyakubeja muzina lya Mwami Leza.’ Aakusinsima bazyali bakwe mwini bayoomuyasa.

⁴ “Mubuzuba oobo musinsimi umwi aumwi uyoofwa nsoni akaambo kabusinsimi bwakwe mwini. Takasami jansi lyabusinsimi lyaboya kutegwa aambe zyakucenga. ⁵ Uyooamba kuti, ‘Nsili musinsimi. Ndimulimi, mebo ndiponena mubulongo kuzwa kubukubusi bwangu.’ ⁶ Kuti naa umwi akamubuzye kuti, ‘Ino zyuumo eezi zili amubili wako nzyaanzi?’ Uyooingula kuti, ‘Eezi nzyuumo ciindi nindakaumwa kuŋanda yabeenzuma.’”

Kuumwa kwamweembezi wa Mwami Leza

⁷ “Amumuume mweembezi wangu, mumuume muntu uuli aafwiifwi andime! Mbwaamba Mwami Leza Singuzuzyoonse. Amumuume mweembezi, nkabela mbelele zilamwaika, bana basyoonto njoobauma. ⁸ Munyika yoonse, mbwaamba Mwami Leza, zibeela zyotatwe zyabantu ziyooumwa bayooumwa nkabela bayooloba, cibeela comwe catatu ciyoosyaala munyika. ⁹ Eeci cibeela comwe catatu ciyoosowelwa mumulilo, njoobasalazya mbuli nsiliva, akubasola mbuli ngolida. Bayooita zina lyangu mukukomba, ambebo njoobavuwa, ndiyooti, ‘Mmbantu bangu,’ abalo bayooti, ‘Mwami Leza ngo Leza wesu.’”