Zekaliya 10

Mwami mbwaakasyomezya kubavuna

¹ Amukumbile mvula ku Mwami Leza kumatangilo, Mwami Leza nguuleta makumbi. Ulawisizya bantu lunywanywa lwamvula, ulakuzya tusyango twamumyuunda twamuntu uuli woonse. ² Mituni ilaamba zyakubeja. Basondi babona zilengaano zyakubeja, baamba ziloto zyakubeja. Kuumbulizya kwabo nkwabuyo. Nkaako bantu balaingaila mbuli mbelele zidyaminidwe akaambo kakubula mweembezi.

³ “Lino ndanyemena beembezi mubukali bwangu, aboobo ndabasubula basololi, nkaambo Mwami Leza Singuzuzyoonse uyoobamba butanga bwakwe. Bamusyobo wa Juda ndiyoobacita kuti babe mbuli bbiza lyanguzu munkondo. ⁴ Kuzwa kumusyobo wa Juda, nkokuyoozwa bbwe lyacooko, kuzwa kulinguwo nkokuyoozwa nembe yatente, kuzwa kulinguwo nkokuyoozwa buta bwakulwanya, kuzwa kulinguwo nkokuyoozwa baleli boonse. ⁵ Boonse bayooba mbuli bantu basintanze, bayoolyatauka basinkondonyina mbuli ntimba munkondo. Nkaambo kakuti Mwami Leza uli aambabo bayoolwana akubazunda basimabbiza.

⁶ “Njooyumya musyobo wa Juda akuvuna musyobo wa Josefa. Njoobaboozya nkaambo ndababeda aankumbu.

Bayooba mbuli kuti tiindakabakakide, mukuti ndendime Mwami Leza wabo, njoobavuwa.

⁷ Baefulemu bayooba mbuli bantu basintanze,

bayootangala mumyoyo yabo mbuli bantu banywa waini.

Bana babo bayoocibona eeci, nkaako bayookondwa, myoyo yabo iyootangalila Mwami Leza.

⁸ “Njooboobola akubabunganya. Kasimpe njoobanununa, bayoovula mbuli mbubakabede kusaanguna.

⁹ Nokuba kuti ndakabamwaisya akati kabantu bambi,

pele nomuba mumasi aali kulaale banoondiyeeya.

Balo abana babo banoopona, eelyo bayoopiluka.

¹⁰ Ndiyoobaleta kuzwa ku Ijipiti, akubayobolola kuzwa ku Asiliya.

Ndiyoobaleta ku Giliyadi aku Lebanoni, nkabela ooko bayooata.

¹¹ Bayooinda mulwizi lwamapenzi, lwizi lukapaika luyoobatama,

mpisi zyoonse zyamulonga wa Nailo ziyooyuminina. Kulisumpula kwa Baasiliya kuyoomana, nguzu zya Baijipiti ziyooela.

¹² Njoobayumya mu Mwami Leza, bayooenda muzina lyakwe, mbwaamba Mwami Leza.”