Zekaliya 1

Mwami Leza mbwaakaita bantu bakwe kuti bapilukile kulinguwe

¹ Mumwezi walusele mumwaka wabili wakulela kwa Daliyasi, majwi aa Mwami Leza akasikila Zekaliya musinsimi mwanaa Belekiya mwana wa Ido. Akati, ² “Mwami Leza wakanyemenede basikale banu. ³ Nkaako ambila bantu bokwanu kuti, ‘Mboobu mbwaamba Mwami Leza Singuzuzyoonse, amupilukile kulindime ambebo ndapilukila kulindinywe.’ Mbwaamba Mwami Leza Singuzuzyoonse. ⁴ Mutabi mbuli basikale banu, aabo basinsimi bakasaanguna mbubakali kwaambila kuti, ‘Mboobu mbwaamba Mwami Leza Singuzuzyoonse ulati, amuleke nzila zyanu zibi amilimo yanu mibi. Pele tiibakaswiilila nokuba kuteya matwi aabo kulindime,’ mbwaamba Mwami Leza. ⁵ Ino sunu bali kuli basikale banu? Sena basinsimi balapona kwalyoonse alyoonse? ⁶ Sena majwi aangu amalailile aangu ngindakalailila babelesi bangu basinsimi taakacita kuti basikale banu bapenge? Lino nibakeempa bakati, ‘Mwami Leza Singuzuzyoonse watucita bweelede nzila amilimo yesu, kweendelana amakanze aakwe.’”

Cilengaano camusinsimi camabbiza

⁷ Mubuzuba bwamakumi obilo aane bwamwezi wa Syebati, mumwaka wabili wakulela kwa Daliyasi, majwi aa Mwami Leza akasikila Zekaliya musinsimi mwanaa Belekiya mwana wa Ido.

⁸ Masiku ndakabona cilengaano, kumbele lyangu ndakabona mwaalumi katantide abbiza lisalala! Wakaimvwi akati kamikoka mukalonga. Kusule lyakwe kwakali mabbiza aasalala pyu, asalaluka aatuba bu!

⁹ Aawo ndakabuzya kuti, “Ino nzinzi eezi simalelo wangu?” Mungelo ooyo ngundakali kwaambaula aawe wakandiingula kuti, “Ndilakutondezya naa nzinzi.” ¹⁰ Lino muntu ooyo wakaimvwi akati kamikoka wakaamba kuti, “Eezi nzenzizyo Mwami Leza nzyaakatuma munyika yoonse kuti zyeendeende.”

¹¹ Lino zyakalungulwida mungelo wa Mwami Leza wakaimvwi akati kumukoka kati “Twaluunkide munyika yoonse ono twajana kuti nyika yoonse ilibateme muluumuno.”

¹² Mpawo mungelo ooyo wa Mwami Leza wakati, “O Mwami Leza Singuzuzyoonse ino uyooleka lili kuteengelela munzi wa Jelusalemu aminzi ya Juda eeyo njonyemenede kwamyaka iili makumi aali ciloba?” ¹³ Nkaako Mwami Leza wakaamba majwi mabotu aaluzyalo aakuumbulizya kumungelo ngundakali kukanana aawe.

¹⁴ Mpawo mungelo ooyo ngundakali kukanana aawe wakati, “Ambilizya majwi aaya kuti, mboobu mbwaamba Mwami Leza Singuzuzyoonse ulati, ‘Munzi wa Jelusalemu uuli ngo Ziyoni nduuyandisya.’ ¹⁵ Pele ndinyemede kapati misyobo eeyo iiliibide. Ndakanyemede aasyoonto, pele balo baliyungizizya mapenzi.

¹⁶ “Nkaako mboobu mbwaamba Mwami Leza ulati, munzi wa Jelusalemu njooweengelela, ŋanda yangu iili mumo iyooyakululwa. Lutambo lwakupimya luyoolandabulwa amunzi wa Jelusalemu, mbwaamba Mwami Leza.”

¹⁷ Kwaambilizya alimwi kuti, mboobu mbwaamba Mwami Leza Singuzuzyoonse ulati, “Minzi yangu iyoozula lubono alimwi Mwami Leza uyooumbulizya Ziyoni uyoosala munzi wa Jelusalemu alimwi.”

Cilengaano cameja

¹⁸ Mpoonya ndakalanga, lino kumbele lyangu kwakali meja one! ¹⁹ Ndakabuzya mungelo ooyo ngundakali kukanana aawe kuti, “Ino ninzi eezi?”

Wakandiingula kuti, “Aaya ngameja aakamwaya Juda, Isilayeli a Jelusalemu.”

²⁰ Mpawo Mwami Leza wakanditondezya bafuzi bone. ²¹ Ndakabuzya kuti, “Ino abalo baboolela kuzoocita nzi?”

Wakandiingula kuti, “Aaya ngameja aakamwaya Juda kutegwa kutabi muntu naba omwe uukola, pele bafuzi aaba baboolela kuzoobayoosya akuzoosowa meja aaya kumisyobo yakalwana nyika ya Juda kuti bantu bayo bamwaikizyanye.”