Tusimpi 9
Zyabusongo abufuba-fuba
1 Busongo bwakaliyakila ŋanda, bwabeza zicinda zili ciloba. 2 Busongo bwajaya banyama mbobujisi, bwavwelanya waini, akubamba-bamba atebule. 3 Bwatuma basimbi babelesi, kuti boongolole bantu kuzwa ansonje lyaŋanda yamunzi akuti, 4 “Boonse aabo bafuba-fuba ababoole kuno!” Mbobwaambila baabo batakwe maanu. 5 “Amuboole, mulye cilyo cangu, munywe waini ooyo ngundavwelanya. 6 Amusiye nzila zyanu zyakubula maanu, amweendele munzila zyakumvwisya zintu.”
7 Kufumbwa ooyo uulaya sikasampu-sampu, ulalisampuzya, ayooyo uukalalila muntu sizibi, ulalisinganya. 8 Utakalalili sikasampu-sampu ulaba nakusulaika. Pele tapatila muntu musongo, ulakuyanda. 9 Lailila muntu musongo, ulaba musongo kwiinda, iiisya muntu uululeme walo ulavuzya lwiiyo lwakwe.
10 Kulemeka Mwami Leza ngamatalikilo aabusongo, kuziba Uusalala nduzibo. 11 Kwiindila mulindime mazuba aako ayoovula, mubuumi bwako uyoopegwa myaka minji. 12 Kuti naa koli musongo, busongo bwako buyookulumbula. Kuti koli sikasampu-sampu yebo olikke nduwe oopenga.
13 Mukaintu mufuba-fuba ngusikumulomo, takwe maanu alimwi talisendi. 14 Ulaa ŋanda yakwe, ulakkala acuuno caŋanda ndamfu yamunzi, 15 kaita baabo bainda waawo, bali munyendo zyabo. 16 Waambila baabo bafuba-fuba kuti, “Amuboole kuno!” Mbwaambila baabo batakwe maanu ulati, 17 “Maanzi aakubba alalweela, cilyo cakusisikizya cilanona!” 18 Pele tabazi kuti bakafwa nkobabede ooko, beenzu bakwe bali mumpisi yacikkalilo cabafu.