Tusimpi 5

Umucenjelele muvuule

¹ Mwanaangu, teya matwi aako kubusongo bwangu, koswiilila kulaya kwamajwi aangu, ² kuti umvwisye zintu kuti milomo yako kiiamba zyaluzibo. ³ Milomo yamukaintu muvuule ili mbuli tuci, alimwi kukanana kwakwe kulabombeka kwiinda mafuta. ⁴ Pele kumamanino ulalula mbuli mululwe, ulabosya mbuli panga likwengedwe koonse-koonse. ⁵ Maulu aakwe atola kulufu, ntaamo zyakwe zitola kucuumbwe. ⁶ Taakwe ambwalimvwa anzila yabuumi, kweenda kwakwe nkwakubbabbalika, pele walo tazi.

⁷ Lino nobana bangu, amundiswiilile, mutaleyi kulizeezi nzendimwaambila. ⁸ Amumutantamuke mukaintu uuli boobu, mutasweni aafwiifwi aŋanda yakwe, ⁹ inga mwaba nomuubuka, inga mwaba nomufwida mumaanza aabasilunya. ¹⁰ Kwamana bazwamasi mbabayoolya mbono zyanu, milimo yanu iyoovubya bamwi. ¹¹ Kumamanino aabuumi bwanu muyootongela, mwaakutyoka misana, nguzu zyamumanina. ¹² Muyooti, “Maawe! ndakakaka kwaambilwa, moyo wangu wakasampaula lulayo.” ¹³ Tiindakaswiilila bamayi bangu, nikuba kuswiilila basikundilaya. ¹⁴ Ono ndiyanda kunyonyooka, akati kambungano yoonse.

¹⁵ Nywa maanzi aazwa mucitelekezyo cako, maanzi aakunka kuzwa mumukalo wako. ¹⁶ Sena ncibotu kuti maanzi aako amwaike mumigwagwa, abe tulonga mumabbuwa? ¹⁷ Aabe aako olikke, atabi aabasinyenda. ¹⁸ Kasensa kako kalelekwe, kotangala amukaintu wabukubusi bwako. ¹⁹ Abe mbuli mbaambi iiyandika yeebeka, luyando lwakwe lukutolele moyo, weelede kulamwa anguwe lyoonse. ²⁰ Mwanaangu, sena ncibotu kuti muvuule akutolele moyo? Ino nkaambo nzi ncoelede kukumbatana amukamuntu? ²¹ Mwami Leza ulabona nzila zyamuntu, ulalanga-langa munzila zyakwe zyoonse. ²² Milandu yasizibi ilamuca, ulajatwa atukole twazibi zyakwe mwini. ²³ Ulafwa akaambo kakukaka kulaigwa ulasweeka akaambo kabufuba-fuba bwakwe butaambiki.