Tusimpi 18
1 Muntu uulizandula utobela zintu zyakuliyandila tayandi zintu zibotu zyamaanu.
2 Mufuba-fuba tabotelwi mukumvwisya zintu,
pele ulabotelwa mukwaamba zili kumoyo wakwe zyalo.
3 Naa bubi bwasika,
kasampu-sampu akalo kalasika,
cintu cuusya nsoni ciletela masampu.
4 Majwi aamulomo wamuntu ali mbuli maanzi malamfu,
pele kasensa kabusongo nkalonga katuntumuna maanzi.
5 Tacili cibotu kutasalulula sizibi,
nikuba kutacitila muntu uululeme bweelede.
6 Milomo yamufuba-fuba imuletela nkondo,
mulomo wakwe ulamuumya.
7 Mulomo wamufuba-fuba ndunyonyooko lwakwe,
milomo yakwe mwini ilamuca.
8 Majwi aamuntu uuvwiya ali mbuli mikusu mibotu,
alanjila mukati mwini.
9 Muntu mutolo mumilimo yakwe,
mmunyina amuntu uunyonyoona.
10 Zina lya Mwami Leza lili mbuli ŋanda ndamfu njumu,
muntu uululeme nkwatijila, nkabela ulafutulwa.
11 Lubono lwamuvubi ndolukwakwa lwakwe,
lulamukwabilila mbuli bwaanda bwamunzi bulamfu.
12 Muntu katanawa moyo wakwe ulalisumpula pele
kulibombya nkokusolweda kubulemu.
13 Ooyo wiingula katanaswiilila,
mmufuba-fuba alimwi ulalijazya nsoni.
14 Moyo wamuntu ulakonzya kuyumina bulwazi,
pele nguni uukonzya kuyumya-yumya moyo uutyompedwe?
15 Moyo wamuntu uumvwisya zintu ulajana luzibo,
matwi aamusongo alalungulula.
16 Cipego cilajalula nzila yamuntu wapa,
cilamusiya kumbele lyabantu bali aampuwo.
17 Uusaanguna kwaamba zyamulandu wakwe ulangika mbuli kuti nguuluzi,
mane kusikila umwi aboole amubuzye-buzye.
18 Kuuma cisolo nkokulesya kupampana,
alimwi nkokwaandaanya baabo bazwangana.
19 Wabunyina uugwasigwa uli mbuli munzi
muyumu, pele kupampana kuli mbuli zipingizyo zyalukwakwa.
20 Kuzwa kumicelo yamulomo wakwe muntu ulatambula zitobela, zilamukkutya.
21 Mulaka ulijisi nguzu zyabuumi alufu,
ooyo uuyanda uyoolya micelo yawo.
22 Ooyo uujana mukaintu wajana cintu cibotu,
nkabela awalo Mwami Leza ulamufwida luzyalo.
23 Muntu mucete ulalikombelezya,
pele muntu muvubi ulaingula cabukali.
24 Kuli bantu balitondezya mbuli kuti mulamvwana ncobeni,
pele kuli mulongwe omwe uukuyandisya kwiinda munyoko.