Tusimpi 16
1 Mizeezo yoonse izwa mumoyo wamuntu,
pele Mwami Leza nguupa mulaka mbuuelede kwiingula.
2 Nzila zyoonse zyamuntu zilibonya mbuli
kuti zilasalala kulinguwe,
pele Mwami Leza nguuziba moyo wamuntu.
3 Kolipa anzyocita zyoonse ku Mwami Leza,
ndendilyo makanze aako naayoozwidilila.
4 Mwami Leza ulizi zintu zyoonse mpoziyoogolela,
nobaba basizibi wakababambila buzuba mbwayoobaletela mapenzi.
5 Mwami Leza ulasulaika kulisumpula kwamoyo koonse.
Ncoelede kuziba ncakuti balisumpula takabaleki buyo katabasubuli pe.
6 Luyando akusyomeka nzezimanya cinyonyoono,
kwiindila mukulemeka Mwami Leza muntu ulasiya bubi.
7 Ciindi muntu neenda munzila zibotezya ku Mwami Leza,
nibaba basinkondonyina boonse balakkala muluumuno anguwe.
8 Ncibotu kuba aacintu nociceya mubululami,
kwiinda kujana lubono lunji munzila iitaluzi.
9 Muntu ulayeeya mumoyo wakwe nzila njayanda kweendela,
pele Mwami Leza nguumweenzya munzila eeyo.
10 Milomo yamwami ilaamba majwi aabulelo,
mulomo wakwe tuubisyi mukubeteka.
11 Cipimyo aceelesyo ceelede zizwa ku Mwami Leza,
mabwe aakweelesya aali munkomo nguwakaapanga.
12 Bamami balasesemwa milimo mibi,
nkaambo bululami mbobukkazika cuuno cabwami.
13 Mwami ulabotelwa bantu baamba zyakasimpe,
ulamuyanda muntu waamba zyabwini.
14 Bukali bwamwami bulatola kulufu,
pele muntu musongo ulakonzya kubutontozya.
15 Kuti mwami waseka-seka caamba kuti mbuumi,
kubotelwa kwakwe kuli mbuli mvula yamamanino amainza.
16 Kujana busongo nkubotu kwiinda kujana ngolida,
kumvwisya zintu nkubotu kwiinda kujana nsiliva.
17 Mugwagwa wabantu baluleme ulagwisya kububi,
ooyo uulibamba mukweenda ubamba moyo wakwe.
18 Kulisumpula kusolweda kulunyonyooko,
kami-kami kalasolweda kukuwa.
19 Ncibotu kulibombya akukkala akati kabadyaminidwe,
kwiinda kwaabana zyasaala balisumpula.
20 Kufumbwa ooyo uuswiilila malailile ulazwidilila.
Ulilelekedwe ooyo uusyomeka mu Mwami Leza.
21 Basongo mumyoyo balangwa kuti bali amaanu,
majwi mabotu alayungizya luzibo.
22 Kumvwisya zintu nkasensa kabuumi kuli baabo bakujisi,
pele bufuba-fuba mbobuletela baungule cisubulo.
23 Moyo wamuntu musongo ulasolweda mulomo wakwe,
milomo yakwe ilayungizya luzibo.
24 Majwi mabotu ali mbuli cimbulwe,
manono kumvwa, alaponya mafuwa.
25 Kuli nzila iilangika kuti nimbotu kumuntu,
pele kumamanino itola kulufu.
26 Nkosya yasimilimo njiimupa kubelekesya,
nzala njamvwide njiimupa kuzumanana.
27 Muntu mubi ulakanza bubi,
kwaamba kwakwe kuli mbuli mulilo uuyupulula.
28 Muntu uupilingene ulabusya mazwanga,
kuvwiya kujaya bulongwe.
29 Muntu walutuzi ulayunga-yunga mweenzinyina,
ulamweenzya munzila iitali kabotu.
30 Ooyo uufunyina umwi uuyeeya cintu cibi,
ooyo uufundumika mulomo ucita bubi.
31 Imvwi ngomusini wabulemu,
kuba anzizyo citondezya kuti muntu ulalilemeka mubuumi bwakwe.
32 Ncibotu kukkala amuntu uusitikide kwiinda kukkala amulwani.
Ncibotu kukkala amuntu uujata moyo,
kwiinda muntu uusaala munzi.
33 Cisolo cilaumwa azibelo,
pele coonse cilungululwa cizwa ku Mwami Leza.