Tusimpi 12
1 Kufumbwa uuyanda kulaigwa ulayanda luzibo,
pele ooyo uusulaika kululamikwa mmuungule.
2 Muntu mubotu Mwami Leza ulamufwida luzyalo,
pele Mwami Leza ulasinganya muntu mumpelenge.
3 Muntu takonzyi kwiimikila nji mububi,
pele baluleme tabakonzyi kuzyulwa pe.
4 Mukaintu uulilemeka mmusini wamulumi wakwe,
pele mukaintu uusya nsoni uli mbuli zifuwa zibolede mumubili wakwe.
5 Mizeezo yabaluleme ililuzi,
pele malailile aabasizibi ngalucengo.
6 Majwi aabasizibi alayubilila bantu.
Pele kukanana kwabaluleme kulabavuna.
7 Bantu basizibi balaatulwa,
tabacibonwi limbi,
pele ŋanda yabaluleme ilaima nji.
8 Muntu ulalumbaizigwa kwiindila mubusongo bwakwe,
pele bantu bapotene balasampaulwa.
9 Ncibotu kuba mbuli muntu buyo kwamana kojisi mubelesi,
kwiinda kulicengeezya kuba muntu wini-wini wamana ulicifuswa makowa.
10 Muntu uululeme ulalela kabotu zivubwa zyakwe,
pele luzyalo lwamuntu sizibi ndunya.
11 Ooyo uulima nyika yakwe ulajana cakulya cinji,
pele ooyo uutobela zintu zyabuyo, takwe maanu.
12 Ŋanda ndamfu yabantu basizibi ilanyonyooka,
pele muyanda wabaluleme ulaima nji.
13 Muntu mubi ulajatwa kwiindila mumakani aakwe mabi,
pele muntu uululeme ulayuba mapenzi.
14 Muntu ulatambula zintu zibotu kwiindila mumajwi aakwe,
mbubonya mbuli milimo yakwe mbwiimulumbuzya.
15 Nzila yamufuba-fuba ilibonya mbuli kuti ililuleme kulinguwe,
pele muntu musongo ulaswiilila kulaigwa.
16 Mufuba-fuba ulalibonya kufwambaana kunyema,
pele muntu uucenjede nasampaulwa ulanga buyo.
17 Kamboni uusyomeka ulaamba zyabwini,
pele kamboni mubi ulaamba zyakubeja.
18 Majwi mabi alayasa mbuli panga,
pele mulaka wamusongo ulaponya,
19 Milomo yaamba zyabwini ilakkalilila lyoonse alyoonse,
pele mulaka uubeja ngwakaindi kasyoonto buyo.
20 Kuli lucengo mumyoyo yabaabo bakanza bubi,
pele abasekelele aabo bayeeya zyaluumuno.
21 Taakwe kucisa kusikila baluleme,
pele basizibi balazula mapenzi.
22 Mwami Leza ulasesemwa milomo iibeja,
pele ulabotelwa mubantu baamba zyabwini.
23 Muntu uucenjede ulasisa luzibo lwakwe,
pele myoyo yabantu batakwe maanu ilaamba zyabufuba-fuba.
24 Maanza aamunkutwe alalela,
pele butolo butola mucibbalo.
25 Kulibilika kwamuntu kumucita kuti abe mbuli kuti uyumwide mukuli mumoyo wakwe,
pele jwi bbotu limucita kuti akondwe.
26 Muntu uululeme ulizi kabotu zyabulongwe bwakwe,
pele nzila yabasizibi ilabasowa.
27 Muntu mutolo talijayili kaputa,
pele muntu munkutwe ulajana lubono luyandika.
28 Munzila yamululami muli buumi,
pele nzila yabubi itola kulufu.