Tusimpi 1

Zyatusimpi

¹ Ntootu tusimpi twa Solomoni mwanaa Devedi, mwami wa Isilayeli. ² Ntwakuti bantu bazibe busongo alulayo, kuti bamvwisye majwi aaluzibo. ³ Kuti batambule lulayo lwakucita zintu mubusongo, mubuluzi bweelede. ⁴ Kuti bantu babe aamaanu. Kuti bakubusi bajane luzibo akumvwisya. ⁵ Kuti muntu musongo awalo aswiilile ayungizizye lwiiyo, asimaanu ajane lulayo. ⁶ Kuti bantu bamvwisye tusimpi azikozyanyo, bamvwisye twaambyo atulabi twabasongo.

⁷ Kulemeka Mwami Leza ngamatalikilo aaluzibo, pele bafuba-fuba balasampaula lulayo.

Kucenjezegwa kwabakubusi

⁸ Mwanaangu, koswiilila zikulaya uso, utaubausyi zikulaya banyoko. ⁹ Kwiisya kwazyo kuyookuletela bukkale bubotu mbuli musini akawenge kazyo mbozibotya uuzisamide.

¹⁰ Mwanaangu, naa basizibi bakoongelezya utabazuminini. ¹¹ Naa baamba kuti, “Boola tuyubilile bantu tubacise. Boola tulindilile bantu banyina mulandu, ¹² Tubamene buumbulu, tubavumbe mbuli cuumbwe, mbubonya mbuli bazikkwa. ¹³ Twamana tujane zintu zyoonse ziyandika. Tuzuzye maanda eesu azisaalwa, ¹⁴ Twauma cisolo anduwe twaabane ncotuyoobba.”

¹⁵ Mwanaangu, utainki ambabo, utakasoli kweenda munzila zyabo pe. ¹⁶ Nkaambo bazuzila zibi, balafwambaana kutila bulowa. ¹⁷ Tacigwasyi kuteya kakole bayuni kababwene. ¹⁸ Bantu aaba balindilila bulowa bwabo beni, balaliyubilila beni. ¹⁹ Mbwaabede mamanino aabantu boonse bayandaula buvubi munzila mbi eeyi. Bulajaya mbabonya aabo babujana.

Busongo bucenjezya babubula

²⁰ Busongo bulaliitila mumigwagwa, bulapozomoka muzisambalilo, ²¹ bulaliitila atala aabwaanda bwa munzi, mumilyango yamunzi lulaamba kuti,

²² “Nywebo nobafuba-fuba, ino muyooleka lili kuyandisya nzila zyanu zyabufuba-fuba? Anywe nomusampaula muyooleka lili kubotelwa mukusampaula? Nywebo nobafuba-fuba muyooleka lili kusulaika luzibo? ²³ Nimwaliswiilile kutapata kwangu nindamwaambila zili mumoyo wangu akumwaambila mizeezo yangu. ²⁴ Mukuti ndamwiita pele nywebo mwakaka kumvwa, ndatandabika janza lyangu, taakwe naba omwe waswiilila. ²⁵ Mukuti mwaubausya kulaya kwangu tamubikki myoyo mukucenjezya kwangu ²⁶ ambebo njoomuseka mwaakunjila mumapenzi, mwaakuyoowa njoomusampaula. ²⁷ Buyoofu buyoomusikila mbuli guwo, mapenzi ayoomukukula mbuli kambizi, mause amakatazyo ayoomusikila. ²⁸ Lino bayoondiita, pele nsikooyoovuwa, bayoondiyandaula pele tabakooyoondijana. ²⁹ Mukuti bakasulaika luzibo tiibakasala kulemeka Mwami Leza, ³⁰ bakakaka kuswiilila lulayo lwangu bakasampaula kucenjezya kwangu, ³¹ nkaako bayoolya micelo yamilimo yabo bayookkuta micelo yamakanze aabo. ³² Nkaambo bafuba-fuba balajaigwa munzila zyabo, kuliiba kwabafuba-fuba kulabanyonyoona. ³³ Pele ooyo uundiswiilila uyookkala kabotu, uyoolikkalila, kakunyina ncayoowa kuti ciyoomucisa.”