Taitasi 3

Buumi bwa Bukilisito

¹ Kobayeezya bantu bako kuti kabalibombya kubeendelezi abaleli. Babaswiilile akucita milimo yoonse kabotu-kabotu. ² Batanoosampauli muntu naba ni pe, alimwi kuti batanoozwangani. Baleelede kulibombya alimwi akulemeka bantu boonse. ³ Nkaambo aswebo kaindi twakali bafuba-fuba, bataswiilili, basweekede. Twakali bazike bazisusi zyaandeene-andeene. Twakali kukkala muzibi mbuli bbivwe. Bantu bakali kutucimwa aswebo twakali kucimana. ⁴ Pele ciindi bubotu aluyando lwa Leza Mufutuli wesu nizyakayubununwa, ⁵ wakatufutula. Taakatufutula akaambo kamilimo iiluleme njitwakacita pe, pele akaambo kalweengelelo lwakwe. Wakatufutula akusamba kutupa kuzyalwa kupya abuumi bupya kwiindila mu Muuya Uusalala. ⁶ Muli Jesu Kilisito Mufutuli wesu, Leza wakatupa Muuya Uusalala camaanza obilo. ⁷ Wakacita eezi kuti tululamikwe muluse lwakwe akuti tukabone buumi butamani mbotulangila. ⁸ Majwi aaya ngamasimpe.

Njanda kuti zintu eezi uzyaambe anguzu kuti basyoma Leza balipe mukucita zibotu zilaampindu akugwasya bantu. ⁹ Pele kokaka nkazyanyo zyabufuba-fuba, twaambo twamazyalani, kuzwangana, kupampanina zyamilawo nkaambo eezi tazigwasyi alimwi nzyabuyo. ¹⁰ Muntu uukazya, komucenjezya ziindi zyobilo, naa tamvwi, mufutatile. ¹¹ Nkaako ulizi kuti muntu uuli boobo ulipotene, ngusizibi, walizula mwini.

Malailile aamamanino

¹² Ndaakutuma Aatemasi naba Tikikasi kulinduwe, ukafwambaane kuboola kulindime ku Nikopolisi, nkaambo ndikanzide kuyookkalila nkuko ciindi camupeyo. ¹³ Usungwaale kugwasya Zenasi simulawo a Apolosi mulweendo lwabo, ubone kuti kunyina ncobabula. ¹⁴ Bantu besu baleelede kwiiya kulipa kumilimo mibotu, kutegwa bakonzye kugwasya aayandika lugwasyo, kuti batabi bantu batakwe mpindu.

¹⁵ Boonse mbotuli aabo balakujuzya. Ubajuzye aabo batuyanda mulusyomo.

Leza akubede aaluse.