Taitasi 2
Injiisyo mbotu
1 Pele yebo kogamine kwiisya njiisyo mbotu. 2 Kolailila bamanene kuti babe basitikide, balijata, bali aamaanu mulusyomo, muluyando, amulukakatilo. 3 Abalo bamacembele mbubonya babe aaziwa zyabulemu, batanootamikizyi, batabi bazike kuli zyakunywa pe, pele baleelede kunoogamine kwiisya ziluleme, 4 akuti baiisye bakaintu bacili bana kuyanda balumi babo akuyanda bana babo, 5 balibatamike, kusalala akukutauka kabotu mumaanda aabo, kabasamauka, akuswiilila balumi babo kuti makani aa Leza atasampaulwi.
6 Abalo baalumi bacili bana balaigwe mbubonya buyo kuti kabalijata beni. 7 Yebo lwako uleelede kuba citondezyo cabo mukucita milimo mibotu, nkabela mukwiisya kwako kotondezya bululami abulemu, 8 aalo majwi ngoamba abote kaanyina butongo kutegwa ooyo uukazya ausigwe nsoni, abule abubi mbwakonzya kutwaamba.
9 Alimwi kobalaililisya abalo bazike kuti kabanga kabalitesya kuli basimalelo babo muzintu zyoonse, tabeelede kuba basigama, 10 nikuba kunoobba muluce-luce, pele baleelede kunoolitondezya kuti balasyomeka, kutegwa muzintu zyoonse balemeke njiisyo zya Leza Mufutuli wesu.
11 Nkaambo Leza wakayubununa luse lwakwe kuti bantu boonse bafutulwe. 12 Muluse lwakwe ulatwiisya kusiya kasampu-sampu, zisusi zyabuntunsi, akuti tube abuumi bwakulijata, bwaluleme, abwakukomba Leza mumazuba aano. 13 Nkaambo tulangila buzuba bulelekedwe ndendilyo nituzoobona bulemu bwa Leza mupati uuli Mufutuli wesu Jesu Kilisito. 14 Walo wakalyaaba kuti atununune kuzwa kububi boone akutusalazya kuti tube bantu bakwe bankutwe mukucita milimo yoonse mibotu.
15 Eezi nzenzizyo nzyoelede kwiisya. Kobayumya-yumya bantu akubalailila canguzu. Kutabi muntu uukuubausya.