Taitasi 1

¹ Ndime Paulu mubelesi wa Leza, mutumwa wa Jesu Kilisito. Ndakasalilwa kuyumya lusyomo lwabasale ba Leza akubasolweda kukasimpe nkotwiisya, ² kayakidwe alulangilo lwabuumi butamani mbwaakasyomezya kale-kale Leza uutabeji. ³ Nkabela muciindi ceelede wakayubununa cisyomezyo eeci mumajwi aakwe. Lino ndakambauka majwi aaya mbuli mbwindakatumwa mukulailila kwa Leza Mufutuli wesu.

⁴ Ndakujuzya Taitasi mwanaangu mwini mulusyomo ndotujisi.

Leza Taata a Kilisito Jesu Mufutuli wesu bakubede aaluse akukupa luumuno.

Zyamilimo ya Taitasi ku Kiliti

⁵ Ncindakakusiila ku Kiliti nkuti ubambulule oonse makani aatanamana mbuli aakusala baalu bazikombelo muminzi yoonse mbubonya mbundakakulailila. ⁶ Mwaalu wacikombelo abe muntu uutakwe kampenda, uukwete mukaintu omwe buyo. Bana bakwe babe basyomi, batali badakwa naa bataswiilili. ⁷ Mweendelezi mbwali mubanzi wa Leza, uleelede kuba muntu uutakwe kampenda. Teelede kuba syaacivulemwangu, nikuba uufwambaana kunyema, naa mukolwi, naa simanyongwe, nikuba sikuyandisya mpindu. ⁸ Pele uleelede kuba sicimwa beenzu, uuyandisya kucita bubotu, uulibatamika, uululeme, uusalala, sikulijata. ⁹ Uleelede kujatisya kapati makani aakasimpe mbubonya mbuli mbwaaiisigwa, kutegwa akonzye kupa malailile anjiisyo zini-zini alimwi kutegwa azunde aabo bazikazya mbubonya.

¹⁰ Nkaambo mpobali bantu banji-banji batakwe bulaye, baamba majwi aabuyo aakweena, kwaambisya aabo bankamu yabupalule. ¹¹ Aaba mbabeelede kuti kukambauka kwabo kulesegwe, nkaambo banyonganya mikwasyi yoonse eeyo njibasikila cakwiimaninizya mukwiisya zintu nzobateelede kwiisya. Balacita oobo kuti bavubile mpawo. ¹² Umwi musinsimi wabo beni wakati, “Ba Kiliti lyoonse mbabeji, mbabi mbuli banyama, alimwi mbaasindya batolo.” ¹³ Makani aayo ali kasimpe ncobeni. Nkaambo kaako ubatapatile canguzu kutegwa bayume mulusyomo. ¹⁴ Kutaamba kuti bagame kuswiilila twaambo twabuyo twatunsiya-nsiya twa Bajuda amilawo yabantu buyo bakaka zyamasimpe. ¹⁵ Kubasalali zintu zyoonse zilasalala, pele kubantu basofweede batazumini, taakwe cintu cisalala niciba comwe pe, nkaambo miyeeyo amanjezeezya aabo alisofweede. ¹⁶ Balyaamba kuti balimuzi Leza pele balamutama kwiindila mumilimo yabo. Mbantu basesemya, bataswiilili, bateelede kucita milimo mibotu niiba buti pe.