Obadiya
1 Nceeci cilengaano ca Obadiya. Mboobu mbwaamba Mwami Leza azyacisi ca Edomu.
Leza ulasubula cisi ca Edomu
Twakamvwa mulumbe uuzwa ku Mwami Leza. Kwakatumwa mutumwa kuti ainke
akaambile bamasi kuti, “Amunyamuke tuunke tukalwane cisi ca Edomu.”
2 Bona, ndiyoocita kuti ube musyoonto akati kamisyobo, uyoosampaulwa kapati.
3 Kulisumpula kwamoyo wako kwakakucenga,
yebo ookkala mumpangala zyamabwe,
ooyakide ajulu, yebo ooamba kuti,
“Nguni uunga ulandiwisizya ansi?”
4 Nikuba kuti uuluke mujulu mbuli sikwaze
akuyaka citeente cako akati kanyenyezi,
kuzwa kooko,
njookusisisya ansi, mbwaamba Mwami Leza.
5 Nikwali kuti babbi bakakusikila, nikwali kuti bafumpi bakakuboolela masiku,
maawe walikunoonyonyooka! Sena nibatakabba mbuli mbobakonzya?
Nikwali kuti basikucela nsaansa kabakuboolela, sena nibatakasiya nsaansa zisiya batebula?
6 Nywebo nolunyungu lwa Isau ziyobwedo zyanu zisisidwe ziyoosaalwa!
7 Bantu boonse mbomumvwana limwi bayoomutandila kumunyinza,
beenzinyoko bayoomucenga akumuzunda,
aabo mbomulya limwi bayoomuteya tukole, pele nywebo tamukatuboni pe.
8 Mwami Leza ulati, “Mubuzuba oobo,
njoojaya bantu basongo bamu Edomu, bantu balaaluzibo muzilundu zya Isau.
9 Basilumamba banu, nobamu Temani bayooyoowa!
Bantu boonse bayoojaigwa muzilundu zya Isau.”
Citi subuzye Baedomu
10 Akaambo kamanyongwe ngomwacita kumwanookwanu Jakobo,
muyoousigwa nsoni, muyoonyonyweedwa limwi mane kukabe kutamani.
11 Mubuzuba oobo mwakaide kudankamana kakuli bazwakule babweza lubono,
bazwamasi bakanjilila mumilyango yaminzi yanu, akuwaala cisolo
kuti basaale Jelusalemu, anywebo mwakali babi mbubonya mbuli mbabo.
12 Tamweelede kulekelezya mwanookwanu mubuzuba bwamapenzi
nokuba kusekelela akaambo kakuzundwa kwabamu Juda mubuzuba bwakunyonyoonwa kwabo,
nikuba kulisumpula kapati mubuzuba bwamakatazyo aabo.
13 Tamweelede kwiinda mumilyango yabantu bangu mubuzuba bwamapenzi aabo,
nokuba kubalekelezya mubuzuba bwamapenzi aabo, nokuba kutola lubono lwabo mubuzuba bwamapenzi aabo.
14 Tamweelede kubayubilila mumaswaanganino aamigwagwa
kuti mujaye basyeede, nokuba kwaaba baabo bacipona mubuzuba bwamakatazyo aabo.
Leza uyoobeteka misyobo
15 “Buzuba bwa Mwami Leza buli aafwiifwi kuti abeteke misyobo yoonse,
mbubonya mbuli mbumwakali kucita, ciyoocitika akulindinywe, milimo yanu iyoomupilukila.
16 Mbubonya mbuli mbumwakali kunywida acilundu cangu cisalala, mbubonya oobo bamasi bayoonywida mpawo cakutaleka,
bayoonywa cisubulo cakunywida limwi, mane bakazimaane.
Kuzunda kwa Baisilayeli
17 “Pele acilundu ca Ziyoni kuyooba nkamu yabantu batijide,
inoosalala, musyobo wa Jakobo uyootola lukono lwawo.
18 Bantu bamusyobo wa Jakobo, awa Josefa bayooba mbuli mulilo uuvwilima,
bayoonyonyoona Baisau mbuli mulilo mbuunyonyoona zisiko.
Taakwe naba omwe Muisau uuyoosyaala. Mebo nde Mwami Leza ndime ndaamba.
19 “Bajuda bayoozwida ku Negevu kumusanza bayookkala muzilundu zya Isau,
bakumbo bali kunselelo zyatulundu bayookkala munyika ya Bafilisiti.
Bamwi bayookkala mucisi ca Efulemu amunzi waco wa Samaliya,
bamusyobo wa Benjamini bayootola cisi ca Giliyadi.
20 Nkamu ya Baisilayeli eeyo yakazwa mubwaange iili mu Kenani iyootola nyika mane kuyoosika ku Zalefati,
baange bakazwa ku Jelusalemu bali mu Sefaladi bayootola minzi iili ku Negevu kumusanza.
21 Bavuni bayootanta acilundu ca Ziyoni,
kuti beendelezye zilundu zya Isau. Bulelo bunooli bwa Mwami Leza.”