Nehemiya 8
Ezula mbwaakabalila bantu mulawo
1 Lino mumwezi waciloba Baisilayeli bakalikkede muminzi yabo. Mubuzuba butaanzi bwamwezi ooyu bantu boonse bakabungana mu Jelusalemu, mulubuwa lwaku mulyango wa maanzi. Nkabela bantu bakakumbila Ezula mupaizi alimwi wakaiide kabotu zyamulawo kuti abale bbuku lya Mulawo ooyo Mwami Leza ngwaakapede Baisilayeli kwiindila muli Mozesi. 2 Aboobo Ezula wakaleta bbuku akulitola ooko kwakabungene bantu, kwakali bakaintu, alimwi abana aabo bakali kukonzya kumvwa zintu. 3 Nkabela ooko kulubuwa kumbali aamulyango wamaanzi wakababalila Mulawo kuzwida kubucedo mane kusikila acilungu-lungu boonse bakali kuswiilila.
4 Ezula wakali kubala kaimvwi aciimino cazisamu aasumpukide, cakayakwa kuti cizoobelesegwe ciindi camuswaangano. Bantu bakaimvwi kululyo lwakwe mbaaba, Matitiya, Syema, Anaiya, Uliya, Hilikiya a Maaseiya. Aabo bakaimvwi kulumwensi lwakwe mbaa: Pedaiya, Misyayeli, Malikija, a Hasyumu, Hasyibadana, Zekaliya a Mesyulamu.
5 Lino Ezula wakaima aanonomokede kuti bantu boonse kabamulangide. Mbwaakavunwida buyo bbuku, bantu boonse bakaimikila. 6 Mpoonya wakati, “Aalumbwe Mwami Leza Mupati!”
Bantu boonse bakatambika maboko aabo mujulu baingula bati, “Akube boobo, akube boobo!” Bamane bavuntama bakomba.
7 Mpoonya bantu bakaima mumasena aabo, Balevi aaba mbibakabapandulwida Mulawo wa Leza: Jesyuwa, Bani, Syelebiya, Jamini, Akubu, Syabetayi, Hodiya, Maaseiya, Kelita, Azaliya, Jozabadi, Hanani a Pelaiya. 8 Bakali kupandulula Mulawo wa Leza, bakuupandulula cakuti bantu bakakonzya kuumvwa kabotu.
9 Lino bantu nibakamvwa zyakali kwaamba Mulawo, cakabayasa cakuti bakatalika kulila. Nehemiya mweendelezi a Ezula mupaizi wakaiide kabotu zyamulawo a Balevi bakali kubapandulwida, bakaambila bantu boonse kuti, “Sunu mbuzuba busalala ku Mwami Leza wanu. Tamweelede koomoka naa kulila pe. 10 Lino amubweede kumaanda aanu mukalye pobwe. Amukaabe zilyo awaini kuli baabo batajisi zinji. Sunu mbuzuba busalala ku Mwami Leza wesu, aboobo mutausi pe. Amukabotelwe nkaambo lutangalo luzwa ku Mwami Leza alimwi nguumuyumya.”
11 Balevi bakali kuya bweendeenda kababatamika bantu kabati, “Amuumune, mutausi pe, nkaambo sunu mbuzuba busalala.” 12 Aboobo bantu boonse bakainka aabo baakulya kabatangede akwaabila bamwi nzibakajisi, bakacita oobo nkaambo bakazimvwisisya zyakalembedwe.
Pobwe lyazivuka
13 Nibwakaca, bapati baziinga antoomwe abapaizi a Balevi, bakainka kuli Ezula kuyooiya njiisyo zya Mulawo. 14 Bakaakujana kuti ooyo Mulawo Mwami Leza ngwaakapede kwiindila muli Mozesi, wakali kuti Baisilayeli kabakkala muzivuka mu ciindi capobwe lyamwezi waciloba. 15 Nkaako bakapa malailile aaya ngubakatumina mu Jelusalemu yoonse, muminzi amutunzi bakati, “Kamuya kuzilundu mukalete mitabi yamipulanga, mioliva, misiwe, tukunka ayamisamu imwi muyake zivuka, mbubonya mbuli bulembedwe mumulawo.”
16 Eelyo bantu bakainka, baakuleta mitabi bayaka zivuka atala aanduli zyamaanda aabo, mumbuwa zyabo mubbuwa lyaŋanda ya Leza, mubbuwa lya kumulyango wa maanzi, akumulyango wa Efulemu. 17 Bantu boonse bakaboola kuzwa mubwaange bakaliyakila zivuka akukkala mulinzizyo. Oolu ndolwakusaanguna kucita zintu eezi kuzwa nizyakacitidwe mumazuba aa Josyuwa mwanaa Nuni. Boonse bakatangala akubotelwa. 18 Kuzwida mubuzuba bwakusaanguna bwapobwe mane kusikila kubuzuba bwamamanino aalyo, bakali kubala cipaanzi cimwi ca Mulawo wa Leza buzuba abuzuba. Bakalya pobwe kwamazuba aali ciloba, nkabela mubuzuba bwalusele kwakaba muswaangano wakujala pobwe, mbubonya mbuli bwaamba mulawo.