Nehemiya 4
Mulimo wakuyakulula bwaanda
1 Sanibalati naakamvwa kuti swebo to Bajuda twakatalika kuyakulula bwaanda, wakanyema akutalika kutusampaula. 2 Kabamvwide beenzinyina alimwi ampi yaku Samaliya, Sanibalati wakati, “Ino Bajuda aaba bazezenkana waawa bayeeya kuti nzi? Sena bayeeya kuti inga buuyakulula munzi ooyu? Sena bayeeya kuti banoopaizya? Sena inga buumana mulimo woonse mubuzuba bomwe? Sena inga babwezelela mabwe aakuyasya kuzwa mumankwisyila aakapya aaya?”
3 Tobiya, Muamoni ooyo wakaimvwi kumbali lyakwe wakayungizya akuti, “Ani inga aaba bayaka bwaanda buli buti? Aantazi mwaaba inga ulaboola!”
4 Aboobo ime nde Nehemiya ndakakomba ndati, “O Leza, komvwa mbobatusampaula. Babweedezezye kusampaula kwabo. Cita kuti babbidwe zyoonse nzebajisi, akuti balo batolwe mubwaange kunyika iimbi. 5 Utabalekeleli bubi mbobacita, uteengeleli zinyonyoono zyabo, nkaambo batukana ndiswe notuyaka.”
6 Aboobo twakacili kuya ambele kuyakulula bwaanda, nkabela cakufwambaana bwakasika mucisela cabulamfu bwawo bwakuya mujulu, nkaambo bantu bakalisungweede mukubeleka.
7 Lino Sanibalati Tobiya, alimwi abantu baku Alabiya, Amoni abaku Asyidodi nobakamvwa kuti twakali kuyabuzwidilila mukuyakulula bwaanda bwa Jelusalemu akuti myaako twakaisinka-sinka, bakanyema kapati. 8 Nkaako bakabungana kuti bazoolwane Jelusalemu akupyopyonganya bantu. 9 Pele swebo twakakomba kuli Leza wesu alimwi twakabikka basikulanga akulindila munzi kuti baukwabilile kuli basinkondoma sikati amasiku.
10 Bamusyobo wa Juda bakati,
“Twabomba kubweza mikuli,
avulisya mankwisyilila aakuyola.
Ani tubuyake buti bwaanda sunu?”
11 Nkaambo basinkondoma bakali kuyeeya kuti inga tatukoobabona pe, nikuba kuziba zicitika mane kusikila bazootuvumpa, batujaye akulesya mulimo wesu. 12 Kwaciindi aciindi Bajuda aabo bakali kukkala akati kabasinkondoma bakali kuboola kuzootucenjezya zyazeezyo zyakali kukanza basinkondoma. 13 Nkaako bantu ndakabapa mapanga, masumo, alimwi amata, akubandandamika muziinga zyabo kunze lyabwaanda, kufumbwa aawo mputwatakamanizizye.
14 Ndakabona kuti bantu bapenga mumyoyo azeezi, aboobo ndakabaambila balo, basololi babo, abapati-pati kuti, “Mutabayoowi basinkondoma pe. Amuzibe kuti Mwami Leza mupati alimwi ulayoosya, aboobo amulwanine basicisinyoko, bana, bakaintu, alimwi amaanda aanu.” 15 Lino basinkondoma bakaziba kuti twakaamvwa makanze aabo bakabona kuti Leza wakoma miyeeyo yabo. Kumane twakapilukila kumulimo wesu wabwaanda.
16 Lino kuzwa ciindi eeco, cisela cabantu bangu cakali kubeleka, cimwi cakali kulanga basinkondoma, kabasamide zyankondo alimwi kabajisi masumo, ntobo, amata. Abalo basololi bakagwasilizya bantu, 17 bakali kuyakulula bwaanda, bakali kubweza ziyasyo. Bakali kunga balabeleka ajanza lyomwe eeli limwi cilwanyo. 18 Boonse bakali kuyaka bakasyomede mapanga muzibuno. Sikusiba mweembo wakucenjezya bantu wakali aandime. 19 Ndakaambila bantu, balupati-pati abasololi babo kuti, “Mulimo ngotucita ulikwakwabukide kapati cakuti tulitanteene abwaanda. 20 Mwamvwa mweembo muzoobungane kulindime. Leza wesu uzootulwanina.” 21 Aboobo buzuba abuzuba kuzwida kubucedo mane kusikila litalika kubala nyenyezi, cisela cesu cakali kuyakulula bwaanda cimwi cakali kulangilila basinkondoma amasumo.
22 Muciindi eeci nciconya ndakaambila balanga zyamilimo kuti balo alimwi abagwasyi babo, kabakkala mu Jelusalemu ciindi camasiku mukuti tukonzye kulangilila munzi ciindi camasiku akubeleka sikati. 23 Mebo taakwe nindakali kusamununa naaba masiku abalo beenzuma mbubonya oobo kubikkilizya ababelesi, abalindizi bangu. Toonse twakalijisi azilwanyo.