Nehemiya 3
Mbubwakayakululwa bwaanda bwa Jelusalemu
1 Lino mupaizi mupati Eliyasyibu abapaizinyina bakayakulula mulyango wambelele. Bakuusalazya akubikka zitendele zyawo. Bakayakulula kuyoosika kubusena butegwa ŋanda ndamfu yamwaanda. Bamane bwaanda mbubakayaka bakabusalazya. Bakayakulula alimwi kuyoosika kuŋanda ndamfu ya Hananeli.
2 Baku Jeliko mbabakanunga, kuzwa alimbabo kwakanunga Zaku mwana wa Imuli.
3 Baciinga ca Hasena mbabakayakulula mulyango Wanswi. Bakabikka zicinda azitendele mubusena bwazyo, zyaanzyo, azipingizyo zyazitendele.
4 Melemoti, mwana wa Uliya, mwanaa Hakozi, nguwakanunga kuzwa waawo.
Mesyulamu, mwanaa Belekiya, mwanaa Mesyezabeli nguwakanunga kuzwa waawo. Zadoki, mwanaa Baana nguwakanunga kuzwa waawo. 5 Baalumi baku Tekowa mbabakanunga kuzwa waawo. Pele basololi bamunzi bakakaka kucita mulimo ngubakapegwa abalangi bamilimo.
6 Joiyada mwanaa Paseya, a Mesyulamu mwanaa Besodeiya bakayakulula mulyango wa Jesyana. Bakabikka zicinda azitendele mubusena bwazyo, zyaanzyo azipingizyo zyazitendele.
7 Melatiya waku Gibeyoni, a Jadoni waku Memelonoti abaalumi bamwi bazwa ku Gibeyoni a Mizipa mbibakanunga kuzwa waawo, mane kuyoosika kuŋanda yamweendelezi wacisi cakumbo lyamulonga wa Yufuletisi.
8 Uziyeli mwanaa Halaiya mufuzi wangolida, nguwakanunga kuzwa waawo. Hananiya wakacibwene kubamba nsende nguwakanunga kuzwa waawo mane kuyoosika kubusena butegwa Bwaanda bwakakwakwabukide.
9 Lefaiya mwanaa Huu wakali kulela cisela cacisi ca Jelusalemu nguwakanunga kuzwa waawo.
10 Jedaiya mwanaa Halumafu nguwakanunga mubusena bwakali munsi aaŋanda yakwe. Hatusyi mwanaa Hasyabineiya nguwakanunga kuzwa waawo.
11 Malikiya mwanaa Halimu, alimwi a Hasyubu mwanaa Pahatimowabu, mbabakanunga kuzwa waawo kuyoosika kuŋanda ndamfu ya Maoveni.
12 Syalumu mwanaa Halohesyi wakali kulela cisela cimwi cacisi ca Jelusalemu, nguwakanunga kuzwa waawo. Wakali kugwasigwa abana bakwe basimbi mumulimo ooyu.
13 Hanuni abantu bakali kukkala mumunzi wa Zanowa mbabakayakulula mulyango wakkuti. Bakabikka zitendele mubusena bwazyo azyaanzyo, kubikkilizya azipingizyo zyazitendele. Bakabuyakulula kuzwa waawo kuyoosika kumulyango wamankwisila. Busena oobo bwakali kulampa tukokola tuli cuulu.
14 Malikija mwanaa Lekabu wakali kulela cisi ca Betihakelemu, nguwakayakulula mulyango wamankwisila. Wakabikka zitendele mubusena bwazyo, zyaanzyo azipingizyo zyazitendele.
15 Syalumu mwanaa Kolihoze wakali kulela cisi ca Mizipa nguwakayakulula mulyango wakasensa, acivumbilizyo caamulyango, kubikkilizya azitendele mubusena bwazyo, azipingizyo. Alimwi wakayakulula bwaanda bwa ziba lya Silowamu lili munsi aamuunda wamwami mane kuyoosika kumaselemukilo aazwida mumunzi wa Devedi.
16 Nehemiya mwana wa Azibuki, wakali kulela cisi ca Batezuu nguwakanunga kuzwa waawo mane kuyoosika kucuumbwe ca Devedi, kuziba lyakulisida akumaanda aabasilumamba.
Balevi bakagwasilizya mukuyakulula bwaanda
17 Lino mbaaba Balevi aabo bakagwasya mukuyakulula bwaanda. Lehumu mwanaa Bani nguwakanunga kuzwa waawo, Hasyabiya wakali kulela cisela cacisi ca Keila nguwakanunga kuzwa waawo kwiiminina cisi cakwe.
18 Bavayi mwanaa Henadadi wakali kulela cimwi cacisela ca Kaila, nguwakanunga kuzwa waawo.
19 Eza mwanaa Jesyuwa wakali kulela munzi wa Mizipa nguwakanunga kuzwa waawo kumbele lyakuyobwedwa zilwanyo, kuyoosika kucooko cabwaanda.
20 Baluki mwanaa Zabayi, nguwakanunga kuzwa waawo mane kuyoosika kumanjililo aaŋanda ya Eliyasyibu, mupaizi mupati.
21 Melemoti, mwana wa Uliya mwanaa Hakozi nguwakanunga kuzwa waawo mane kuyoosika nkoimanina ŋanda ya Eliyasyibu.
Bapaizi bakagwasilizya mukuyakulula bwaanda
22 Bapaizi bakkala mucisi cizingulukide Jelusalemu bakanunga kuzwa waawo.
23 Benjamini a Hasyubu bakanunga kuzwa waawo kumbele lyamaanda aabo. Azaliya mwanaa Maaseiya mwana wa Ananiya nguwakanunga kuzwa waawo kusika munsi aaŋanda yakwe.
24 Binuyi mwanaa Henadadi, nguwakanunga kuzwida kuŋanda ya Azaliya mane kuyoosika kucooko cabwaanda.
25 Palali, mwana wa Uzayi, nguwakanunga kuzwida acooko caŋanda ndamfu iili aŋanda yabwami, mane kusikila kulubuwa lwabalindizi. 26 Pedaiya mwanaa Palosi ababelesi bakuŋanda ya Leza bakali kukkala ku Ofeli, mbabakanunga kuzwa waawo mane kusikila kumamanino aa Mulyango wa Maanzi uuli kujwe kumbali aŋanda ndamfu yakusompelela mukukwabilila ŋanda ya Leza.
Zyabayaki bamwi
27 Mpoonya baalumi bazwa ku Tekowa bakayakulula alimwi kuzwida abusena buli munsi-munsi aŋanda ndamfu yakusompela kuyoosika kubwaanda bwa Ofeli.
28 Nkamu yabapaizi yakanunga kuzwa kumulyango wamabbiza, omwe-omwe kuzwida aaŋanda yakwe.
29 Zadoki, mwana wa Ima wakanunga kuzwida munsi aŋanda yakwe.
Syemaiya mwanaa Syekaniya mulindizi wamulyango wakujwe nguwakanunga kuzwa waawo.
30 Hananiya mwanaa Syelemiya a Hanuni mwana mulombe wacisambomwe wa Zalafu mbabakanunga alimwi kuzwa waawo.
Mesyulamu mwanaa Belekiya nguwakanunga kuzwida munsi aaŋanda yakwe.
31 Malikija mufuzi wangolida wakanunga kuzwa waawo mane kuyoosika kuŋanda yakali yababelesi bakuŋanda ya Leza abasambazi, yakali munsi aamulyango wa Mifukadi mane kuyoosika kuŋanda ya Leza kumbali aakaanda kamujulu kali kunyika lwaajwe lyacooko cabwaanda.
32 Bafuzi bangolida abasambazi mbabakanunga kuzwida akaanda aako kali aacooko mane kuyoosika kumulyango Wambelele.