Nehemiya 12
Bapaizi a Balevi
1 Ngaaya mazina aabapaizi a Balevi aabo bakapiluka a Zelubabeli mwanaa Syeyalitiyeli a Jesyuwa kuzwa mubwaange. Kwakali: Selaiya, Jelemiya, Ezula, 2 Amaliya, Maluki, Hatusyi, 3 Syekaniya, Lehumu, Melemoti, 4 Ido, Ginetoyi, Abija, 5 Mijamini, Maadiya, Biliga, 6 Syemaiya, Joiyalibu, Jedaiya, 7 Salu, Amoki, Hilikiya, a Jedaiya. Baalumi aaba mbibakali basololi babapaizinyina mumazuba aa Jesyuwa.
8 Balevi bakali ba: Jesyuwa, Binuyi, Kadimiyeli, Syelebiya, Juda, a Mataniya. Balo mbibakali kweendelezya zyanyimbo zyakulumba Leza. 9 Bakibukiya a Uno antoomwe a Balevinyina bakali kuvwiilana ciindi cakwiimba.
Lunyungu lwamupaizi mupati Jesyuwa
10 Jesyuwa nguwakazyala Joiyakimu, Joiyakimu nguwakazyala Eliyasyibu, Eliyasyibu nguwakazyala Joiyada, 11 Joiyada nguwakazyala Jonatani, Jonatani nguwakazyala Jaduwa.
Bapati baziinga zyabupaizi
12 Lino ciindi Joiyakimu naakali mupaizi mupati, aaba mbibakali bapati baziinga zyabupaizi. Muciinga ca Selaiya ngu Melaiya, ca Jelemiya ngu Hananiya, 13 ca Ezula ngu Mesyulamu, ca Amaliya ngu Jehohanani, 14 ca Maluki ngu Jonatani, ca Syebaniya ngu Josefa, 15 ca Halimu ngu Adina, ca Melemoti, aca Helikayi ngu Mesyulamu, 16 ca Ido, ngu Zekaliya, ca Ginetoni, 17 ca Abija ngu Zikili, ca Miniyamini aca Maadiya ngu Pilitayi, 18 ca Biliga ngu Syamuwa, ca Syemaiya ngu Jehonatani, 19 ca Joiyalibu ngu Matenayi, ca Jedaiya ngu Uzi, 20 ca Salu ngu Kalayi, ca Amoki ngu Eba, 21 ca Hilikiya ngu Hasyabiya, ca Jedaiya ngu Nataneli.
Kulembwa kwamikwasyi yabupaizi a Balevi
22 Bapati bamikwasyi ya Balevi aabo bakalembedwe mazina muziinga zyabo mbaaba: Eliyasyibu, Joiyada Johanani a Jaduwa. Mundandanda ooyu wakamanizigwa kulembwa ciindi Daliyasi naakali muleli mupati wa Pesiya.
23 Bapati bamikwasyi ya Balevi kuzoosika kuciindi ca Jehonani mwanaa Eliyasyibu aakali kulembwa mumabbuku aamakani aabulelo bwakaindi.
Kwaabilwa milimo yamuŋanda ya Leza
24 Basololi ba Balevi aaba Hasyabiya, Syelebiya, Jesyuwa mwanaa Kadimiyeli, mbabakali kugwasyanya abeenzinyina muli zyakulumba akutembaula Mwami Leza kabavwiilana mbubonya mbuli bwakalailila Devedi muntu wa Leza.
25 Balindizi bakali kulanga twaanda twaziyobwedo kumilyango mbaaba: Mataniya, Bakibukiya, Obadiya, Mesyulamu, Talimoni a Akubu.
26 Bantu aaba bakali kubeleka muciindi ca Joiyakimu mwanaa Jesyuwa mwanaa Jozadaki, amumazuba aa Nehemiya mweendelezi aa Ezula, mupaizi uuyiide.
Kupegwa kwabwaanda bwa Jelusalemu
27 Ciindi bwaanda bwamunzi wa Jelusalemu nibwakapegwa ku Mwami Leza, Balevi bakayandaulwa kufumbwa ooko nkubakabede akuletwa ku Jelusalemu kuti bazoosekelele cakutangala anyimbo zyakulumbaizya ansakalala, tuntimbwa atulumbu ciindi lyakapegwa bwaanda. 28 Baimbi abalo bakabunganyizigwa kuzwa mucisi cakazingulukide Jelusalemu akuminzi ya Netofati. 29 Kwakaboola abakali kuzwida ku Betigiligali, Geba aku Azimaveti. Baimbi bakayakide minzi munsi a Jelusalemu. 30 Ciindi bapaizi a Balevi nibakalisalazya, bakasalazya bantu, milyango abwaanda.
31 Ndakababunganya basololi ba Bajuda atala aabwaanda akubacita kuti balange nkamu mpati zyobilo zyakali kuzinguluka munzi, kaziya bulumbaizya Leza.
Nkamu yakusaanguna yakeenda atala aabwaanda kuya kumulyango wamankwisila. 32 Hosyaiya acisela cimwi cabasololi ba Bajuda cakabatobela 33 Babajuda cakatobela cakali aabantu aaba: Azaliya, Ezula, Mesyulamu, 34 Juda, Benjamini, Syemaiya, a Jelemiya. 35 Kwakali abamwi bapaizi basimyeembo alimwi a Zekaliya mwanaa Jonatani, mwanaa Syemaiya. Bamwi basikale bakwe bakali ba: Mataniya, Mikaiya, Zaku waciinga ca Asafu, 36 ooyu wakali kutobela abamwi baciinga cakwe ba: Syemaiya, Azaleli, Milalayi, Gilalayi, Maayi, Netaneli, Juda, a Hanani. Boonse bakayumwide zingwali-ngwali zili mbuli zyakali kwiimbya Devedi muntu wa Leza. Ezula wakaiide nguwakali kusolweda mulongo ooyu. 37 Nibakasika kumulyango wa kasensa, bakatanta azitantilo zyakali kuya mumunzi wa Devedi, kwiinda ŋanda yabwami ya Devedi mbaabo bapilukila kubwaanda kumulyango wa maanzi, mane kuyoosika kujwe lyamunzi.
38 Nkamu imwi ayalo yakeenda atala aabwaanda kulumwensi eelyo ndakabatobela acisela cimwi cabantu. Twakeenda kuyooinda kuŋanda ndamfu yamaoveni ndiswe twaakusika kubwaanda bukwakwabukide. 39 Tuzwe waawo twakaakwiinda ku mulyango wa Efulemu, wa Jesyana, wanswi, ndiswe kuŋanda ndamfu ya Hananeli, ndiswe baabo kumulyango wa mbelele. Twakaakugolela munsi aamulyango waŋanda ya Leza.
40 Aboobo nkamu zyoonse eezi zyobilo, zyakali kulumbaizya Leza, zyakaswaangana kubusena buyakidwe ŋanda ya Leza. Kunze abaabo balupati-pati bakali aandime, 41 kwakali abapaizi bakali kusiba myeembo ba: Eliyakimu, Maaseiya, Mijamini, Mikaiya, Eliyoyenayi, Zekaliya, Hananiya, 42 alimwi a Maaseiya, Syemaiya, Eliyazaa, Uzi, Jehohanani, Malikija, Elamu alimwi a Eza. Wakali kusolweda baimbi ngu Jezilahiya. 43 Mubuzuba oobo bakapa zipaizyo zinji kabakondedwe kapati nkaambo Leza wakabatangazya. Bamakaintu abana abalo bakali kusekelela. Kuyobeka kwabo kwakali kumvwigwa kulaale.
Mbubakapa zyakugwasya mukukomba muŋanda ya Leza
44 Ciindi eeci kwakasalwa baalumi bakulanga maanda aaziyobwedo oomo mwakali kubikkwa zyaŋanda ya Leza, kwakkumi, maila aakusaanguna, amicelo iisaanguna kubizwa mumwaka. Aaba baalumi mbabakali kuzileta kuzwa kumyuunda yaminzi yoonse kuti cibe caabilo cabapaizi a Balevi mbuli bwaamba mulawo. Bantu bamu Juda bakali boteledwe akaambo kamilimo yabapaizi a Balevi. 45 Nkaambo bakali kucita ciyanza cakusalazya azimwi eezyo Leza nzyaakalailila. Abalo baimbi abalindizi bakuŋanda ya Leza bakali kucita mbubonya mbuli bwakalailila Devedi a Solomoni mwanaakwe. 46 Kuzwa kuciindi ca mwami Devedi aca mwiimbi Asafu, basikwiimba bakali kusolweda munyimbo zyakulumbaizya, akutembaula Leza. 47 Muciindi ca Zelubabeli alimwi aca Nehemiya boonse Baisilayeli bakali kupa zipego zyabuzuba abuzuba mukugwasya baimbi abalindizi bakuŋanda ya Leza. Bantu bakali kupa zyaabilo zyeelede Balevi, abalo bakapa kubapaizi zyeelede bapaizi.