Nehemiya 11

Bantu bakkala mu Jelusalemu

¹ Basololi babantu bakkala mu Jelusalemu, a bantu buyo bakauma cisolo kuti basale mukwasyi omwe kuzwa mumikwasyi iili kkumi kuti ukakkale mumunzi uusalala wa Jelusalemu, kakuli eeyo iili fuka yakeelede kuti ikakkale muminzi yawo. ² Bantu bakalumbaizya baabo bakaliyandila kuyookkala mu Jelusalemu. ³ Baisilayeli, bapaizi, Balevi, babelesi bakuŋanda ya Leza abalunyungu lwababelesi ba Solomoni bakakkala muminzi yacisi ca Juda. Umwi aumwi wakakkala mumunzi ooyo wakali wa caabilo cakwe.

Lino ngooyu mundandanda wabasololi bakazwa mucisi ca Juda kuti bakakkale ku Jelusalemu.

⁴ Kuzwa kumusyobo wa Juda kwakali ba Ataya mwana wa Uziya, mwanaa Zekaliya mwana wa Amaliya, mwanaa Syefatiya, mwanaa Mahalaleli, walunyungu lwa Pelezi, mwanaa Juda, ⁵ a Maaseiya mwanaa Baluki, mwanaa Kolihoze. Bamwi basikale bakwe bakali ba Hazaiya, Adaiya, Joiyalibu, Zekaliya walunyungu lwa Syela mwanaa Juda. ⁶ Balunyungu lwa Pelezi bakali kukkala mu Jelusalemu bakali myaanda yone amakumi aali cisambomwe alusele baalumi basicamba.

⁷ Kuzwa kumusyobo wa Benjamini kwakali Salu, mwanaa Mesyulamu, mwanaa Jowedi. Bamwi basikale bakwe bakali ba Pedaiya, Kolaiya, Maaseiya, Itiyeli, Jesyaiya, ⁸ abasazinyina ba Gabayi a Salayi. Antoomwe Babenjamini bakali kukkala mu Jelusalemu bakali myaanda iili fuka amakumi obilo alusele. ⁹ Joweli mwanaa Zikili nguwakali musololi wabo, kumane kwaza Juda mwanaa Hasenuwa.

¹⁰ Kuzwa kubapaizi kwakali Jedaiya mwanaa Joiyalibu, Jakini, ¹¹ Selaiya mwanaa Hilikiya, mwanaa Mesyulamu. Bamwi basikale babo bakali ba Zadoki, Melaiyoti a Ahitubi wakali mupaizi mupati. ¹² Baciinga eeci bakali kubelekela kuŋanda ya Leza antoomwe bakali myaanda iili lusele amakumi obilo ababili.

Kumane kwakali Adaiya mwanaa Jelohamu, mwanaa Pelaliya. Bamwi basikale bakwe bakali ba Amuzi, Zekaliya, Pasyuu, Malikija. ¹³ Antoomwe baciinga eeci bakali basololi bamikwasyi, bakali myaanda yobilo amakumi one ababili.

Kumane kwakali Amasyisayi mwana wa Azaleli, mwana wa Ahizayi. Bamwi basikale bakwe bakali ba Mesyilemoti mwana wa Ima. ¹⁴ Muciinga eeci kwakali basilumamba bacibwene, bali myaanda amakumi obilo alusele. Musololi wabo wakali Zabudiyeli umwi wamukwasyi uulaampuwo.

¹⁵ Kuzwa ku Balevi kwakali Syemaiya mwanaa Hasyubu, mwana wa Azilikamu. Bamwi basikale bakwe bakali ba Hasyabiya a Buni.

¹⁶ Syabetayi a Jozabadi bapati ba Balevi mbabakali kulanga mulimo waanze lyaŋanda ya Leza.

¹⁷ Mataniya mwanaa Mika, mwanaa Zabudi, walunyungu lwa Asafu, nguwakali kwiimbya baimbi bakuŋanda ya Leza mukukomba akulumba kwabo.

Bakibukiya nguwakali mugwasyi wakwe. Umwi wakali Abuda mwanaa Syamuwa, mwanaa Galali walunyungu lwa Jedutuni. ¹⁸ Balevi bakali mumunzi uusalala wa Jelusalemu bakali myaanda yobilo amakumi aali lusele abane.

¹⁹ Balindizi bakuŋanda ya Leza bakali ba Akubu, Talimoni, anzubo zyabo. Antoomwe bakali mwaanda amakumi aali ciloba ababili.

²⁰ Baisilayeli bamwi antoomwe abapaizi a Balevi bakakkede muminzi yacisi ca Juda, umwi aumwi wakakkede mumunzi oomo mwakali caabilo cakwe.

²¹ Babelesi bakuŋanda ya Leza bakali kukkala kukalundu ka Ofeli, bakali bapati babo mbaa Ziha a Gisyipa.

²² Wakali mupati wa Balevi mu Jelusalemu ngu Uzi mwanaa Bani, mwanaa Hasyabiya. Bamwi basikale bakwe bakali ba Mataniya, a Mika. Uzi wakali umwi walunyungu lwa Asafu aabo bakali baimbi kuŋanda ya Leza. ²³ Mwami wakapede malailile aakali kwaamba zya baimbi mbubakeelede kwiimba buzuba abuzuba.

²⁴ Petahiya mwanaa Mesyezabeli walunyungu lwa Zela wamusyobo wa Juda nguwakali kwiiminina mwami mumakani oonse aajatikizya bantu ba Isilayeli.

Bantu bakakkede muminzi imwi

²⁵ Bantu banji bakali kukkala muminzi eeyo yakali aafwifwi amyuunda yabo. Aabo bakali bamusyobo wa Juda bakali kukkala mu Kiliyatiaba, Diboni a Jekabuzeeli, atunzi twayo. ²⁶ Alimwi bakali kukkala amuminzi ya Jesyuwa, Molada, Betipeleti, ²⁷ Hazasyuwali, Biiyasyeba atunzi twayo. ²⁸ Bakali kukkala amu Zikilagi, Mekona atunzi twayo, ²⁹ Ehilimoni, Zola, Jaamuti, ³⁰ Zanowa, Adulamu, atunzi twayo. Bakali kukkala mu Lakisyi mumunzi amyuunda amu Azeka atunzi twayo. Nkokwaamba kuti bantu ba Juda bakakkede mucisi citalikila ku Biiyasyeba kuyoosika kukkuti lya Hinomu. ³¹ Babenjamini bakali ku Geba bakali kukkala mu Mikimasyi, Aija, Beteli, atunzi twayo. ³² Anatoti, Nobu, Ananiya, ³³ Hazoo, Lama, Gitaimu, ³⁴ Hadidi, Zeboimu, Nebalati, ³⁵ Lodi, Ono, amukkuti lyababezi. ³⁶ Nkamu zya Balevi zimwi zyamu Juda zyakakkede mucisi ca Benjamini.