Nahumu 2
Kuwa kwa Nineva
1 Sikulwana waboola aafwiifwi omunzi wa Nineva.
Kwabilila mayubilo, lindilila mumigwagwa.
Nomukkala mumunzi ooyu amulibambile, amuzyandamane.
2 Mwami Leza uyoobukulusya bulemu bwa Jakobo,
bube mbuli bulemu bwa Isilayeli,
nokuba kuti basikunyonyoona babazunda,
banyonyoona misaansa yabo.
3 Ntobo zyabasilumamba bakwe zilasalala,
balwani basamide zisalala pyu.
Lubulo lwankalaki lulabeka mubuzuba oobo mbuzyabikkwa kuti zilibambile,
masumo aalusako lwa mupulanga alabeka-beka.
4 Nkalaki zilazuzaana mumigwagwa, zilazuzaana ooku akooku.
Zilangika mbuli minzenge iivwilima, zilapambana mbuli ndabo.
5 Ulaita basilumamba bakwe, pele balalifumpula munzila.
Balazuzila kubwaanda, kwamana balayaamika ntobo zyabo.
6 Zijazyo zyamulonga zilajaluka, ŋanda yabwami ilooleka.
7 Kwakalaililwa kuti munzi woonse utolwe mubwaange.
Bana basimbi bawo balile mbuli nziba akulyuuma-uma azyamba.
8 Munzi wa Nineva uli mbuli ziba, maanzi aalyo alazwa.
Balati, “Ima-ima!” Pele taakwe uupiluka pe.
9 Amusaale nsiliva! Amusaale ngolida! Zintu ziyandika tazimani,
lubono luzwa muziyobwedo zyawo zyoonse ndunji.
10 Munzi woolwa, wasaalwa, wagwisigwa zyoonse! Myoyo yanetuka,
mumazwi mwatontola, mibili ilazyangama, bantu boonse babijilwa.
11 Ino lino bwina bwabasyuumbwa buli kuli,
ooko nkobakali kusaninina bana babo,
ooko kwakali kukkala syuumbwa mweenze amuzyazyi abana babo,
kaatakwe ncobakali kuyoowa?
12 Syuumbwa mweenze wakajaila bana bakwe banyama banji,
wakali kusina banyamanyina kuti muzyazyi alye, mayubilo aakwe akazwide
nzyaakali kuweza, mena aakwe akazwide banyama mbaakajaya.
13 “Ndilakulwana yebo.” Mbwaamba Mwami Leza Singuzuzyoonse. “Ndiyootenta nkalaki zyako amulilo, bana bako bayoojaigwa munkondo. Taakwe banyama mbendiyoosiya anyika kuti kojaya. Majwi aabatumwa bako taakamvwigwi alimwi pe.”