Nahumu 1
1 Ngaaya makani aaamba zyamunzi wa Nineva. Eeli ndibbuku lyaamba cilengaano ca Nahumu Muelikosyi.
Mwami Leza mbwaakanyemena baku Nineva
2 Mwami Leza ngu Leza sibufwi, uutalekeleli bakomba bambi. Mwami Leza ulabweedezya bubi,
uzwide bukali. Mwami Leza ulababweedezezya aabo bamulwana,
ulanyemena basinkondonyina.
3 Mwami Leza tafwambaani kunyema, ngusinguzu zinji,
Mwami Leza takabaleki buyo katabasubuli aabo bali aamulandu.
Nzila yakwe ili mukambizi amuguwo, makumbi ndusuko lulundumuka ciindi neenda.
4 Ulatapatila lwizi eelyo lulayuminina, ulayuminizya milonga yoonse.
Zilundu zyamu Basyani aca Kaameli zyayuma aalo malanga-langa aamu Lebanoni apusama.
5 Zilundu zilatenkaana kumbele lyakwe atwalo tulundu tulayaaya.
Nalibonya nyika ilazyangama, yika yoonse antoomwe abaabo bakkala mulinjiyo.
6 Nguni uukonzya kwiimina bukali bwakwe? Nguni uukonzya kuyumina bukali bwakwe bupati?
Bukali bwakwe bulapoomoka mbuli mulilo, myaala ilaandauka kumbele lyakwe.
7 Mwami Leza mmubotu, ngematijilo ciindi camapenzi. Ulababamba aabo basyoma mulinguwe,
8 pele azambangulwe pati uyoomanizya bamu Nineva,
uyootandaanya bamulwana kusikila bakanjile mumudima.
9 Kufumbwa eezyo nzyobakanza Mwami Leza uyoozimanizya.
Mapenzi taakabooli lwabili.
10 Bayoopatila akati kamamvwa, bayookolwa waini wabo,
bayoosyukutwa mbuli zifumpu ziyumu.
11 Mulinduwe omunzi wa Nineva, mumwazwa yooyo uukanza kucita bubi ku Mwami Leza, nzyalailila nzibi zyalo. 12 Mboobu mbwaamba Mwami Leza ulati, “Nikuba kuti bati balaanguzu alimwi mbanji, bayoogonkwa akufwa. Nokuba kuti ndakamupenzya nobamu Juda, nsiciyoomupenzyi alimwi pe. 13 Ndiyootyoloola joko lili munsingo zyanu akudunsaula nketani zyanu.”
14 Mwami Leza wakatulailila kwaamba zyako omunzi wa Nineva akuti, “Tokabi aalunyungu oolo lunoobandwa zina lyako. Ndiyoonyonyoona zikozyanyo zibeze amituni yalubulo muŋanda yakukombela baleza bako. Njookubambila cuumbwe, nkaambo ulisampukide.”
15 Langa, abota maulu aamuntu uuli muzilundu uuleta makani mabotu, waambilizya luumuno! Kosekelela mapobwe aako ocisi ca Juda, zuzikizya zikonke zyako. Bantu babi tabakakusaali limbi, bayoonyonyweedwa limwi.