Myeelwe 9
Pobwe lyabili Lyakwiindilila
1 Lino Mwami Leza wakakanana a Mozesi munkanda ya Sinai mumwezi mutaanzi mumwaka wabili ciindi Baisilayeli kabazwide kale mu Ijipiti wakati, 2 “Baisilayeli baleelede kubamba Pobwe Lyakwiindilila muciindi cibikkidwe. 3 Kutalikila kumangolezya mubuzuba bwakkumi aane mumwezi nguwenya ooyu, mulibambe kweendelana amalailile aalyo oonse.” 4 Aboobo Mozesi wakaambila Baisilayeli kubamba Pobwe Lyakwiindilila. 5 Nkabela bakacita mbubonya oobo ciindi camangolezya mubuzuba bwakkumi aane mumwezi mutaanzi kabacili munkanda ya Sinai. Bantu bakacita zyoonse mbubonya mbuli mbobakalaililwa a Mozesi.
6 Pele baalumi bamwi tiibakakonzya kusekelela antoomwe abeenzinyina nkaambo bakaguma mutumba, wakabasofwaazya. Bakainka kuli Mozesi a Aloni 7 akwaamba kuti, “Iswe tulisofweede nkaambo twaguma mutumba, nikuba boobo nkaambo nzi ncotutakonzyi kupa cipaizyo ku Mwami Leza a Baisilayelima muciindi eeci cibikkidwe?”
8 Mozesi wakaingula kuti, “Amulindile, mbone mbuli Mwami Leza mbwatilailile andinywe.”
9 Lino Mwami Leza wakalailila Mozesi kuti aambile Baisilayeli kuti, 10 “Kuti naa umwi wanu naa walunyungu lwanu wasofwaala akaambo kakuguma mutumba, nikuba yooyo uuli mulweendo, ulakonzya kubamba Pobwe Lyakwiindilila lya Mwami Leza. 11 Aabo balizumizidwe kubamba pobwe eeli kakwiindide mwezi omwe muciindi camangolezya mubuzuba bwakkumi aane mumwezi wabili. Nkabela bayoolibamba mukulya zinkwa zitakwe mimena anduluulu. 12 Tabeelede kusiya cakulya kusikila buce, alimwi tabeelede kupwaya kafuwa nobalya. Bayoobamba pobwe kweendelana amalailile aamilawo yalyo yoonse. 13 Pele kuti kakuli umwi uutasofweede alimwi katali mulweendo, kwamana tabambi pobwe eeli, ooyo takooyoobalilizigwa kuti ngumwi wabantu bangu. Kayi taakwe naapa cipaizyo kulindime muciindi cibikkidwe. Uleelede kusubulwa bweelede.
14 “Kuti naa muzwamasi uukkala andinywe kayanda kubamba Pobwe Lyakwiindilila, kalibamba kweendelana amalailile aamilawo yalyo. Eeci cilajatikizya sicisi naa muzwamasi.”
Zyakkumbi lyakuvumbilila cikombelo
15 Lino mubuzuba tente lyacizuminano ca Leza nilyakaimikwa, kkumbi lyakalivumba. 16 Ciindi camasiku lyakali kuboneka mbuli mulilo. 17 Ciindi kkumbi nilyakeenda, Baisilayeli bakalonga, alimwi kkumbi nilyakaima, bakayaka zivuka mpolyakaimina. 18 Bantu bakalonga akuyaka Mwami Leza naakabalailila. Kwaciindi kkumbi nilyakavumbide tente, bakalikkede. 19 Nikuba kuti likkale kwaciindi cilamfu cili buti, tiibakalonga pe. 20 Cimwi ciindi kkumbi lyakakkede buyo mazuba masyoonto, mbombuboobu mbubakeenda naa kukkala mbuli bwaamba malailile aa Mwami Leza. 21 Cimwi ciindi kkumbi lyakakkala buyo kuzwa mangolezya kusikila cifumo-fumo, mbulyakeendela buyo abalo nkulonga. Naaba masiku naa masikati mbulyakeendela buyo abalo nkulonga. 22 Nikuba kuti mazuba ngabili, nuuba mwezi omwe, nuuba mwaka omwe, kkumbi nilyakakkede atente abalo bakalikkede. Pele kuti na lyeenda, abalo nkweenda. 23 Bakali kuyaka naa kulonga kweendelana amalailile aa Mwami Leza.