Myeelwe 6
Milawo ya Bunazili
1 Lino Mwami Leza wakaambila Mozesi kuti, 2 “Lailila Baisilayeli kuti kufumbwa mwaalumi naa mukaintu uukonzya kuti ulaba mu Bunazili akulyaaba ku Mwami Leza, 3 teelede kunywa waini naa zimwi zikola nuuba musinza wansaansa uusaside. Atalyi nsaansa niziba ziyanikidwe. 4 Ciindi nacili mu Bunazili, teelede kulya zyansaansa, nseke naaba makwa pe.
5 “Kwaciindi coonse nacili mu Bunazili kweendelana acikonke cakwe, teelede kunyoolwa nikuba kugelwa pe. Abe kalondokede mane ciindi ncaakalyaaba ku Mwami Leza ciinde. Uyoolekelela masusu kuti alampe. 6 Ciindi eeci coonse atasweni munsi amutumba pe. 7 Nikuba kuti wafwidwa wisi nibaba banyina naba munyina naba mucizi wakwe, teelede kulisofwaazya akaambo kakuswena munsi amufu, nkaambo cikonke cakulyaaba ku Mwami Leza cili alinguwe. 8 Ciindi coonse nacili mu Bunazili ulilyaabide ku Mwami Leza.
9 “Kuti naa muntu wafwa lufu lwakwaanzuka munsi lyakwe, masusu aakwe alasofwaala, nkaako uleelede kulindila mazuba aali ciloba kuti alinyoole akulisalazya. 10 Nkabela mubuzuba bwalusele alete bana bankwilimba bobilo naa nziba zyobilo, azipe kumupaizi kumulyango watente lyakuswaanganina. 11 Lino mupaizi uyoopaizya cimwi cibe cipaizyo cacinyonyoono alimwi cimwi cibe cakumanya mulandu, nkaambo wakabisya mukuba aafwiifwi amutumba. Mubuzuba bwalusele oobo uyoosalazya masusu aakwe alimwi. 12 Alisalazye ku Mwami Leza kwamazuba ngalyaabide kulinguwe. Nkabela alete kagutu kamwaka omwe, kabe cipaizyo cakumanya mulandu. Aboobo ciindi cakusaanguna tacicibalwi nkaambo wakasofwaala akati kaco.
13 “Lino ngooyu mulawo wa Bunazili ciindi cakulyaaba kwakwe camana. Uleelede kuletwa kumulyango watente lyakuswaanganina. 14 Ooko akape zipaizyo zyakwe eezi ku Mwami Leza: kagutu kamwaka omwe katakwe kampenda kacipaizyo cakutenta, kabelele kazyazi kamwaka omwe kacipaizyo cacinyonyoono, alimwi amugutu uutakwe kampenda wacipaizyo calumvwano. 15 Atuuzye maila, azyakunywa, lusuwo lwazinkwa zitakwe mimena, maseke aakagaigwa busu bunante buvweledwe mafuta atunkwa tupapalete tulambidwe amafuta aaoliva.
16 “Lino mupaizi uyoozileta kubusena bwa Mwami Leza akupaizya cipaizyo cacinyonyoono acipaizyo cakutenta. 17 Ape lusuwo lwazinkwa zitakwe mimena akupaizya mugutu, abe cipaizyo calumvwano ku Mwami Leza antoomwe acituuzyo camaila acakunywa.
18 “Lino Munazili uleelede kulinyoola masusu ngaakapa ku Mwami Leza kumulyango watente lyakuswaanganina. Abikke masusu aaya acipaililo kunsi kwacipaizyo calumvwano eeco.
19 “Lino zyamana eezi mupaizi akabweze kuulu kwamugutu kwa kumbele akujike antoomwe akkekke akankwa kapapalete kuzwa mulusuwo azibikke mumaanza aa Munazili. 20 Nkabela mupaizi uyoozizumbaanya ku Mwami Leza, zibe cipaizyo cakuzumbaanya. Zilasalala, nzyamupaizi antoomwe akatiti kazumbaanywa acibelo capegwa. Kuzwa waawo Munazili ulakonzya kunywa waini.
21 “Eeyi njemilawo ya Munazili wakonka akulyaaba ku Mwami Leza kubikkilizya azimwi zyoonse nzyakonzya kupa. Mbubonya mbuli kucikonke cakwe uleelede kucita kweendelana amulawo wa Bunazili.”
Kuleleka kwabapaizi
22 Lino Mwami Leza wakalailila Mozesi kuti, 23 aambile Aloni abana bakwe kuti, “Mboobu mbomunooleleka Baisilayeli, kamuti, 24 ‘Mwami Leza amuleleke akumubamba.
25 Mwami Leza amulange muluyando akumubeda aaluse.
26 Mwami Leza amulange muluyando akumupa luumuno.
27 Mbombuboobu mbubayoobikka zina lyangu a Baisilayeli,
nkabela njoobaleleka ncobeni.’”