Myeelwe 5
Bantu batasalali
1 Lino Mwami Leza wakaambila Mozesi kuti, 2 “Lailila Baisilayeli kuti batande kuzwa muzivuka muntu oonse uujisi cinsenda naa dondamwaka, naa uulisofwaazya akuguma mutumba. 3 Tanda mwaalumi naa mukaintu kuti batasofwaazyi zivuka ooko nkwebede abantu bangu. 4 Nkabela Baisilayeli bakacita oobo. Bakabatandila kunze boonse kuzwa muzivuka mbubonya mbuli Mwami Leza mbwaakalailila Mozesi.”
Kupilusya zintu zyabamwi
5 Lino Mwami Leza wakaambila Mozesi kuti, 6 “Ambila Baisilayeli kuti ciindi mwaalumi naa mukaintu nabisizya umwi munzila niiba buti, tasyomeki ku Mwami Leza, uli aamulandu. 7 Uleelede kulyaamba cibi cakwe eeco ncaakacita alimwi aboozye zyoonse nzyakanyonyoona akubbadela kwasanu kupa yooyo ngwaakabisizya. 8 Pele kuti ooyo wakabisizigwa kali wakafwa alimwi kuti katajisi wamukowa uukonzya kubbadelwa, nkokuti ciyoobbadelwa ciyoopegwa ku Mwami Leza kuti cikabe camupaizi. Abbadela ape amugutu wacipaizyo cakumanya mulandu wacibi cakwe. 9 Azyalo zipego zyoonse Baisilayeli nzibapa kuli Leza inga zinooli zyamupaizi ooyo wazitambula kuzwa kulimbabo. 10 Zyoonse muntu nzyayanda kupa kuli Leza nzizyakwe, pele kufumbwa ncaapa kumupaizi ncamupaizi.”
Zyamukaintu uutasyomeki
11 Lino Mwami Leza wakalailila Mozesi kuti, 12 aambile Baisilayeli kuti, “Na mukaintu wasiya mwaalumi wakwe akucita zyakutasyomeka 13 mukweenda aaumbi, nkabela makani aaya kaatazizilwe amwaalumi kuti mukaintu walisofwaazya, alimwi kakunyina kamboni, 14 kuti naa mwaalumi waba abufwi naa kumuyeeyela, nikuba kuti taakacicita, 15 ooyo mwaalumi uleelede kutola mukaintu kumupaizi. Alimwi uleelede kutolelela cituuzyo cansangwa yabusu bwamaila, pele teelede kubuvwela amafuta aaoliva nituba tununkilizyo, nkaambo kakuti ncituuzyo cabufwi cakuyubununa masimpe.”
16 Lino mupaizi ulaleta mukaintu aafwiifwi akumwiimika kubusena bwa Mwami Leza. 17 Mupaizi akatile maanzi aasalala mumutiba wabulongo alimwi akabweze alusuko lwaacibuye catente lyakuswaanganina akulubikka mumaanzi aayo. 18 Amana mupaizi uyoopombosola masusu aamukaintu ooyo, ndendilyo nayoobikka mumaanza aakwe busu bwacituuzyo caciyubunuzyo nkokuti cabufwi. Walo mumaanza unoojisi maanzi aayo aalula aakonzya kuleta lusinganyo. 19 Lino mupaizi uyoomukonkya mukaintu akuti, “Kuti naa tookeenda aaumbi akulisofwaazya kokwetwe, utacisigwi amaanzi aaya aalula aakonzya kuleta lusinganyo. 20 Pele kuti koli wakalisofwaazya mukweenda amwaalumi uumbi nkokuti wabisizya mulumaako.”
21 Eelyo mupaizi aambile mukaintu ooyo majwi aaya aalusinganyo, “Leza akucite kuti bantu bako bakusampaule akukusinganya waakubola zibelo akuzimba da. 22 Maanzi aaya aakonzya kuleta lusinganyo anjile mwida lyako kuti lizimbe azibelo zibole.”
Nkabela ooyo uyooingula kuti, “Mbubo acicitike.” 23 Lino uyoolemba lusinganyo oolu mubbuku, amana alinyike mumaanzi aalula aayo kuti majwi aseemuke. 24 Mpoonya anywisye mukaintu ooyo maanzi aalula aakonzya kuleta lusinganyo, nkabela maanzi aayo alamunjila akumucisya kapati.
25 Pele katanamunywisya, mupaizi uyootambula cituuzyo cabusu cabufwi kuzwa kumukaintu, nkabela uyoozumbaanya cituuzyo eeco ku Mwami Leza akuyoocibikka acipaililo. 26 Amana mupaizi ulabuula janza lyabusu akubutenta acipaililo, cibe caciibalusyo. Amana buyo anywisye mukaintu maanzi aayo. 27 Kuti naa ncobeni wakalisofwaazya akucita cakutasyomeka kumulumaakwe, maanzi aayo aalula aakonzya kuleta lusinganyo aanywa alanjila mwida akumucisya, nkabela da lyakwe lilazimba azibelo zyakwe zilabola. Nkaako ooyo mukaintu ulaba cisesyo akati kabantu bokwabo. 28 Pele kuti naa mukaintu ooyo taakalisofwaazya, kasalala, mulandu wamana, ulakonzya kuzyala.
29 “Ooyu ngomulawo wabufwi ciindi mukaintu watasyomeka akulisofwaazya kakwetwe, 30 niciba ciindi mulumi naafwida mukaintu wakwe bufwi. Mupaizi uleelede kwiimika mukaintu kubusena bwa Leza akucita mbubonya mbuli bwaamba mulawo ooyu. 31 Kuti kali wakacicita, uyoosubulwa mbubweelede cibi cakwe, pele mwaalumi twakwe mulandu pe.”