Myeelwe 4
Milimo yaciinga ca Kohati
1 Lino Mwami Leza wakaambila Mozesi a Aloni kuti, 2 “Mutalike kubala Bakohati kuzwa ku Balevi bamwi muziinga amumikwasyi yabo. 3 Mubale boonse aabo baalumi bali aamyaka iisika kumakumi otatwe kusikila kuli bali aamyaka iili makumi osanwe bakonzya kubelekela mutente lyakuswaanganina. 4 Mbabanoobamba zintu zisalalisya oomo.
5 “Lino ciindi cakulonga Aloni abana bakwe baleelede kunjila mutente lyakuswaanganina, bakaangunune cisitilizyo cili kumbele lyabbokesi lyacizuminano, bamana bakalivumbe ancico. 6 Bakabikke kkutu lisukidwe kabotu atala aacisitilizyo, mpoonya bakabikke mulembo wacijulu-julu alindilyo, bamana bakasekke tukulisyo mulindilyo.
7 “Lino bayale mulembo uumbi wacijulu-julu atala atebule libikkwa cinkwa cisalala cili alindilyo lyoonse. Alinguwo babikke mitiba, myuungo, mfulu, ankomeki zyakupaizya cakunywa. Cinkwa eeco batakacigwisyi pe. 8 Lino bakavumbe azintu zili mpawo amulembo uusalala pyu alimwi akkutu lisukidwe kabotu. Bamana bakasekke tukulisyo.
9 “Bakabweze amulembo wacijulu-julu bakavumbe cikkazikilo calambe amalambe aaco, atumanzyo, nkaye alimwi ansazi zyoonse. 10 Bayooziputaila zyoonse eezyo mukkutu lisukidwe kabotu akuzibikka atukulisyo.
11 “Lino cipaililo cangolida bakacivumbe amulembo wacijulu-julu alimwi akkutu lisukidwe kabotu akusekka tukulisyo. 12 Babweze zibelesyo zyoonse zyamubusena busalala zikaputailwe mumulembo wacijulu-julu alimwi akkutu lisukidwe kabotu, akuzibikka atukulisyo.
13 “Bakagwisye twe kuzwa acipaililo, nkabela bakavumbe mulembo wacisombo alincico. 14 Kwamana bakabikke alincico zibelesyo zyaco zyoonse, nkokuti nkaye, ngobyoobyo, mafosyolo, amitiba. Bakazivumbe eezi akkutu lisukidwe kabotu. 15 Bamana bakasekke tukulisyo baakumanizya kuvumba zibelesyo zyoonse eezi, bamukowa wa Kohati mbabayoozibweza. Pele tabeelede kuziguma pe, inga bafwa. Ncobeelede nkubweza buyo.
16 “Lino Eliyazaa mwana wa Aloni mupaizi, ngunooyoolanga mungwimba wamalambe aatente, tununkilizyo, cipaizyo camaila, mafuta aakunana, alimwi azintu zimwi zili mutente zipedwe ku Mwami Leza.”
17 Lino Mwami Leza wakaambila Mozesi a Aloni kuti, 18 “Mutalekeli kuti Bakohati banyonyooke 19 mukuti baswena aafwiifwi azintu zisalalisya eezi. Mboobu mbomweelede kucita. Aloni abana bakwe bakanjile mubusena busalalisya akupa Bakohati umwi aumwi mulimo amukuli wakwe. 20 Pele balo lwabo batakanjili nikuba kulanga zintu zisalalisya naaceya kuti batafwi.”
Milimo yaciinga ca Gesyoni
21 Lino Mwami Leza wakaambila Mozesi kuti, 22 “Bala Bagesyoni muziinga amumikwasyi yabo. 23 Bala baalumi boonse bali aamyaka iili makumi otatwe kusikila kuli bali aamyaka iili makumi osanwe, boonse bakonzya kubelekela mutente lyakuswaanganina. 24 Njeeyi milimo yaciinga ca Gesyoni. 25 Kabayumuna zisitilizyo zyaanze zyatente lyakuswaanganina acivumbyo calyo, akkutu lisukidwe kabotu alincico, acisitilizyo caamulyango watente, 26 azisitilizyo zyabbuwa zizingulukide tente acipaililo acisitilizyo cakumulyango wabbuwa, azyaanzyo azimwi zibelesegwa kuliyaka. Bagesyoni babambe milimo yoonse eeyi. 27 Banoobalanga nibabweza nikuba kucita milimo eeyi ngu Aloni abana bakwe. 28 Eeyi njemilimo ya Bagesyoni kutente lyakuswaanganina. Bayooicita kabalangwa a Itamaa mwana wa Aloni mupaizi.
Milimo yaciinga ca Melali
29 “Bala abalo Bamelali muziinga amumikwasyi yabo. 30 Bala baalumi boonse bali aamyaka iili makumi otatwe kusikila kuli bali aamyaka iili makumi osanwe, boonse bakonzya kubelekela mutente lyakuswaanganina. 31 Aaba mulimo wabo ngwakubweza zibeela zyatente aminkulu yazyo, zicinda azikkazikilo zyazyo, 32 zicinda zizingulukide bbuwa azikkazikilo zyazyo, nembe zyalyo, zyaanzyo, azibelesyo zyakucitya milimo yazyo. Muntu umwi aumwi apegwe milimo njeelede kucita. 33 Eeyi njemilimo yapegwa Bamelali yakubeleka kutente lyakuswaanganina. Bayooicita kabalangwa a Itamaa mwana wa Aloni mupaizi.”
Kubalwa kwa Balevi
34 Lino Mozesi a Aloni abapati babuleya bakabala baalumi Bakohati muziinga amumikwasyi yabo, 35 kuzwa kuli bali aamyaka iili makumi otatwe kusikila kuli bali aamyaka iili makumi osanwe, boonse bakonzya kubelekela mutente lyakuswaanganina. 36 Mweelwe wabo wakali zyuulu zyobilo amyaanda iili ciloba amakumi osanwe. 37 Ooyu wakali ngomweelwe wamukowa wa Kohati aabo bakabelekela mutente lyakuswaanganina, aabo Mozesi a Aloni mbibakabala mbuli Mwami Leza mbwaakalailila Mozesi. 38 Mweelwe wa Bagesyoni muziinga zyabo amumikwasyi yabo, 39 kuzwa kuli boonse bali aamyaka iili makumi otatwe kusikila kuli bali aamyaka iili makumi osanwe, boonse bakonzya kubelekela kutente lyakuswaanganina. 40 Mweelwe wabo wakali zyuulu zyobilo amyaanda iili cisambomwe amakumi otatwe. 41 Ooyu wakali ngomweelwe wamukowa wa Gesyoni aabo bakabelekela kutente lyakuswaanganina, aabo Mozesi a Aloni mbibakabala mbuli mbwaakalailila Mwami Leza.
42 Mweelwe wa Bamelali muziinga amumikwasyi yabo 43 kuzwa kuli boonse bakali aamyaka iili makumi otatwe kusikila kuli bali aamyaka iili makumi osanwe, boonse bakonzya kubelekela kutente lyakuswaanganina, 44 mweelwe wabo wakali zyuulu zyotatwe amyaanda yobilo. 45 Ooyu wakali ngomweelwe wamukowa wa Melali, aabo Mozesi a Aloni mbibakabala mbuli Mwami Leza mbwaakalailila Mozesi.
46 Mbuboobo Mozesi, Aloni abapati ba Baisilayeli mbubakabala Balevi muziinga amumikwasyi yabo. 47 Baalumi boonse kuzwa kuli bali aamyaka iili makumi otatwe kusikila kuli bali aamyaka iili makumi osanwe. Babeleka akuyumuna tente lyakuswaanganina 48 bakali zyuulu zili lusele amyaanda yosanwe amakumi aali lusele. 49 Muntu umwi aumwi wakapegwa milimo yakwe akubweza ncaakeelede mbuli Mwami Leza mbwaakalailila Mozesi.
Lino bakabalwa mbubonya mbuli Mwami Leza mbwaakalailila Mozesi.