Myeelwe 36
Kukona kwabakaintu
1 Lino bapati bamikwasyi muciinga ca Giliyadi mwanaa Makii, mwanaa Manase, mwanaa Josefa, bakaza kuli Mozesi abasololi bamikwasyi ya Baisilayeli 2 bakati, “Mwami Leza naakalailila simaleleesu kwaabanya Baisilayeli nyika, wakalailila kuti cipaanzi camukwesu Zelofehadi cipegwe kubana basimbi. 3 Pele atwaambe kuti naa bakwatwa kulibaziinga zimwi, nkokuti cipaanzi ciya ciyooba cabambi, caamba kuti cipaanzi cesu cilaceya. 4 Waakusika mwaka walutangalo, cipaanzi cabo ciyooswaanganyizigwa kucipaanzi cabaabo bakwata, aboobo cainkila limwi.”
5 Lino Mwami Leza wakalailila Mozesi kuti aambile Baisilayeli kuti, “Caamba bamusyobo wa Manase cililuleme. 6 Ngaaya malailile aa Mwami Leza kubana basimbi ba Zelofehadi. Bakwatwe kufumbwa muntu ngubayanda, pele abe waciinga cawisi. 7 Taakwe cipaanzi canyika mu Isilayeli cikonzya kukonwa aciinga cimbi, ciinga comwe-comwe cinookkede mukatongo kaco. 8 Atwaambe musimbi uukonede weelede buyo kukwata muciinga cawisi, mbombuboobu Muisilayeli mbwanoojisi lukono lwawisi. 9 Taakwe cipaanzi canyika Muisilayeli cikonzya kukonwa aciinga cimbi, ciinga comwe-comwe cijatilile kucipaanzi caco.”
10 Lino bana basimbi ba Zelofehadi bakacita mbubonya mbuli Mwami Leza mbwaakalailila Mozesi. 11 Nkaambo kaako Mala, Tiliza, Hogila, Mika a Nowa, bakakwatwa kubasazinyina. 12 Bakakwata mumikwasyi ya Bamanase mwanaa Josefa, kutegwa cipaanzi cabo cikkalilile.
13 Eeyi njemilawo amalailile Mwami Leza njaakapa Baisilayeli kwiindila muli Mozesi mumabanda aa Mowabu mutala lyamulonga wa Jolodani kuzwa ku Jeliko.