Myeelwe 35
Minzi yakapegwa Balevi
1 Mumabanda aa Mowabu mutala lyamulonga wa Jolodani kuzwa ku Jeliko, Mwami Leza wakaambila Mozesi kuti, 2 “Ambila Baisilayeli bape Balevi minzi yakukkala munyika njibatambula antoomwe amacelelo aazingulukide. 3 Mbombuboobu mbobatibe aaminzi amacelelo amatanga aabo. 4 Macelelo aaya anookwakwabukide tukokola tuli cuulu kuzwida kulukwakwa kusikila nkwaagolela kuzinguluka munzi woonse, 5 caamba kuti bbazu lyomwe-lyomwe kuzwa kumagolelo kusikila amwi lilampa tukokola tuli zyuulu zyobilo.”
Minzi yakulivunina
6 Minzi iili cisambomwe muliyeeyo njomuyoopa Balevi ibe yakulivunina, ooko wajaya muntunyina nkwakonzya kulivunina. Kunze aayeeyo mukape aimwi minzi iili makumi one aibili. 7 Nkokuti antoomwe njomuyoopa Balevi iili makumi one alusele kubikkilizya amacelelo aayo. 8 Minzi eeyi igwisigwe kuzwa kuminzi iyoojanika muzisi zyamisyobo imwi. Musyobo mupati upe minzi minji, musyobo muce upe mice.
9 Lino Mwami Leza wakaambila Mozesi kuti 10 alailile Baisilayeli kuti, “Mwaakumana kuzubuka mulonga wa Jolodani alimwi mwaakukkalilila munyika ya Kenani, 11 mukasale minzi iiyooba yakulivunina ooko muntu wajaya muntunyina muntenda nkwakonzya kuyoolivunina. 12 Muntu uyooinka ooko kuti akalivune katanabetekwa kunkuta. 13 Minzi eeyi iili cisambomwe njomuyoopa njeminzi yanu yakulivunina. 14 Minzi yotatwe ibe kutala lino lya Jolodani, imwi yotatwe mu Kenani. 15 Kuminzi eeyi nkobayoolivunina Baisilayeli abamasi bakkala ambabo kutegwa kufumbwa wajaya muntunyina muntenda nkwayootijila.
16 “Pele kuti naa wamuumya cibulo, wamana waumwa wafwa, ooyo mujayi, uleelede kujaigwa awalo. 17 Alimwi kuti naa wamuumya bbwe wamana waumwa wafwa, ooyo mujayi uleelede kujaigwa awalo. 18 Alimwi kuti naa wamuumya cisamu, wamana waumwa wafwa, ooyo mujayi uleelede kujaigwa awalo. 19 Simukowa wayooyo wajaigwa nguuelede kujaya ooyo kufumbwa mpaamuswaanina.
20 “Alimwi kuti naa muntu wayasa muntunyina acaali nikuba kumuyubilila kumuumya cintu, kwamana waumwa wafwa, 21 naa wamuumya ntuku kwamana ooyo waumwa wafwa, ooyo mujayi uleelede kujaigwa awalo. Simukowa wayooyo wajaigwa nguuelede kujaya ooyo.
22 “Pele kuti naa muntu katazi wauma umwi nikuba kumuyasa muntenda, 23 naa katamubwene walosya bbwe, akumujaya, eelyo mukuti taakali sinkondonyina alimwi taakamucisa acaali, 24 aboobo basinkuta bayoovuninina wakajaya kuzwa kuli simukowa wayooyo wakajaigwa. 25 Wamana balamutumina kumunzi ooko nkwaakatijilide. Muntu ooyu unooli kooko, lufu lwamupaizi mupati ndoluyoomwaangununa.
26 “Pele kuti naa wajaya ooyo wazwida anze lyamagolelo aamunzi wakulivunina, 27 wamana simukowa wayooyo wakajaigwa wamujana, ulakonzya kumujaya katakwe mulandu pe. 28 Nkankakaako nceelede kukkala mumunzi ooyo kusikila kulufu lwamupaizi mupati. Wamana ulakonzya kupilukila kwakwe. 29 Malailile aaya ajatikizya ndinywe alunyungu lwanu kufumbwa nkomuyookkala.
30 “Lino mujayi ajaigwe buyo kuti kakuli bakamboni, taakwe weelede kujaigwa naa kakuli buyo kamboni omwe pe. 31 Mujayi atanununwi pe, pele ajaigwe ncobeni. 32 Muntu wakajaya wamana watijila kumunzi wakulivunina atanununwi akupiluka kwakwe kusikila lufu lwamupaizi mupati. 33 Mutasofwaazyi cilawo ncomukkede, nkaambo mujayi usofwaazya cilawo. Cilawo cikonzya kusalala naa mujayi wajaigwa. 34 Mutasofwaazyi nyika oomo momukkede oomo mwebede ambebo, nkaambo mebo nde Mwami Leza ndili akati ka Baisilayeli.”